Конституциялык кеңешме 7-июнда Жогорку Кеңештин имаратында өз ишин улантып, жумушчу топ тарабынан даярдалган Конституцияга өзгөртүү жана кошумча киргизүү тууралуу мыйзам долбоорун жактырды. Ага ылайык президент бир мөөнөткө беш жылга шайланыш керек. Эми долбоор жалпы элдик талкууга коюлмакчы. Бул күнү да Жогорку Кеңештин алдына 30дан ашуун адам пикетке чыгып, Конституцияга Элдик курултай тууралуу Конституциялык орган киргизилишин талап кылды. Бирок Конституциялык кеңешменин мүчөлөрү бул сунушту кабыл алышкан жок.
