БИШКЕК. Азыркы бийликке сын айтыш, алардын жүргүзүп жаткан саясатына карама-каршы көз карашыңды билгизүү коркунучтуу болуп калды, бирок депутат Кубатбек Байболов коркпостон сын пикирлерин ачык айтып келүүдө, деп билдирди Жогорку Кеңештин төрага орун басары Эркинбек Алымбеков 21-январда депутат Кубатбек Байболовго “Манас руху” эл аралык сыйлыгын тапшыруу аземинде. Ал эми сыйлык ээси чындап эле эл үчүн кызмат кылуучу адамдардын өмүрүнө учурда опурталдуу болуп калганын, мындай сыйлык моралдык-руханий колдоо экендигин белгиледи. Талас шаарында жайгашкан “Манас руху” эл аралык нарк насил фонду буга чейин Түркиянын экс-президенти Сулайман Демирелге, Казакстандын президенти Нурсултан Назарбаевге, АКШнын экс-президенти Билл Клинтонго өз сыйлыктарын тапшырган. Аталган фондун эл аралык сыйлыгы Кыргызстандын өнүгүүсүнө кошкон салымы үчүн депутат Кубатбек Байболовго жана анын жубайы шаардык кеңештин төрайымы Нуржамал Байболовага 21-январда тапшырылды.
