Москвада өрттөн жабыр тарткан кыргызстандык эки жарандын абалы оор бойдон калууда. Бул тууралуу Кыргызстандын Орусиядагы элчилигинин экинчи катчысы Айымкан Кулукеева “Азаттыкка” билдирди. Анын айтымында, өрттөн жараат алган 4 баланын ата-энеси Гүлназ Өкүмалиева менен Кожоназар Арзыматов ооруканада эсине келе албай жатат.
18-сентябрдын түнүндө Москвадагы көп кабат үйлөрдүн биринде өрт чыгып, төрт кыргызстандык мерт кеткен. Алар: 20 жаштагы Эрлан Абдыкаров, Анваржон уулу Баяман, жубайлар Урмат Токтосунов жана Айжаркын. Алардын сөөгү Москванын №5 өлүкканасында сакталууда.
Дем алуу органдары жабыркаган беш жаштагы Кожоназар кызы Элнура, эки жашар Кожоназар уулу Улар, алты айлык Арзыматова Акмаанай жана Күнбеков Байэл жакынкы күндөрү ооруканадан чыгары айтылууда.(UEz)
