Босниядагы айылдардын биринде «Ислам мамлекети» радикал уюмунун желектери илингени жөнүндө маалымат чыккандан кийин полиция рейд жүргүздү. 5-февралда тартип коргоочулар Горния Макоа айылындагы бир нече үйдү тинтип чыгышты. Алдыңкы күнү жергиликтүү телеканалдардын бири чатырларда согушкерлердин желеги желбиреп турган сүрөттөрдү көргөзгөн. Соңку жылдары вахабилердин жергиликтүү жолдоочулары бир нече жолу полициянын текшерүүлөрүнө туш болгон.
Босниянын чалгындоо кызматынын болжолунда Bрак менен Сириядагы жихадчылардын катарында 150 чакты жергиликтүү жаран согушуп жүрөт.
