Кыргызстандын президенти Алмазбек Атамбаев баштаган кыргыз делегациясы бүгүн Австрияга учуп кетти. Расмий сапардын жүрүшүндө мамлекет башчысы Австриянын президенти Хайнц Фишер, Австриянын парламентинин жогорку палатасынын спикери Соня Цвацл менен жолугушуп, кыргыз-австрия бизнес-форумуна катышат.
Мындан тышкары ал баңги заттар жана кылмыштар боюнча Бириккен улуттар уюмунун башкармалыгынын аткаруучу директору Юрий Федотов, ЕККУнун башкы катчысы Ламберто Заньер менен сүйлөшүүлөрдү өткөрөт.
25-март күнү мамлекет башчысы Франциянын президенти Франсуа Олланд менен жолугуп, кыргыз-француз бизнес-форумуна катышат.
Президент 26-мартта Швейцария конфедерациясынын президенти Симонетта Соммаруга жана тышкы иштер министри Дидье Буркхальтер менен эки тараптуу сүйлөшүүлөрдү өткөрөт.
26-30-мартында президент Бельгиянын Королу Филипп, ошондой эле Европа союзунун институттарынын жетекчилери -Европа парламентинин төрагасы Мартин Шульц, Европа комиссиясынын төрагасы Жан-Клод Юнкер жана Европа кеңешинин төрагасы Дональд Туск менен жолугушат. 31-марттан 1-апрелге чейин өлкө башчысы Германияда болуп, президент Йоахим Гаук жана канцлер Ангела Меркелдин кабыл алуусунда болот.
Европага сапарынын алкагында саясый, соода-экономикалык, маданий-гуманитардык жана башка тармактарда кызматташууну өнүктүрүүгө багытталган бир катар эки тараптуу макулдашууларга кол коюлары болжонуп жатат. (AzK)
