Өзбекстандын мурдагы президенти Ислам Каримовдун эстелигин тургузууга эл аралык сынак жарыяланды. Тиешелүү документке мамлекеттин жаңы шайланган президенти Шавкат Мирзиёев кол койду.
2-декабрда кол коюлган жарлыктын тексти маалымат каражаттарында шаршембиде жарыяланды.
Өлкөнү 1989-жылдан бери башкарып келген Каримов 2-сентябрда 78 жашында көз жумган. Кийинчерээк Ташкенттеги байыркы мечиттердин бирине анын ысымы ыйгарылган.
2003-жылдан бери өкмөт башчысынын кызматын аркалап келген Шавкат Мирзиёев 4-декабрда өткөн президенттик шайлоодо жеңишке жетти.