Кырсыктан жабыркаган эки адам оор абалда ооруканага жеткирилген. Тогузу медициналык кароодон өткөн, азыр алардын абалы туруктуу. Бул тууралуу Өзгөчө кырдаалдар министрлиги билдирди.
Маалыматка караганда, 23-октябрда Бишкектин Октябрь районундагы Аалы Токомбаев көчөсүндө "Авангард-стиль" курулуш компаниясы салып жаткан имараттын экинчи кабатынын монолити кулап түшкөн.
Экологиялык жана техникалык коопсуздук боюнча мамлекеттик инспекция мунун чоо-жайын иликтөө боюнча комиссия түздү.
Аталган курулуш компаниясы эки кабат имараттын чатырынын конструкциясы урап калганын, жанында курулуп жаткан көп кабат үйгө анын тиешеси жок деп маалымдады. (NT)