Кытай Элдик жумуриятынын лидери Си Цзинпин коммунисттик партиянын баш катчылыгына кайрадан шайланды. Саясий бюронун туруктуу комитетинде андан тышкары премьер-министр Ли Кэцян гана өз ордунда калды. Комитетке салт боюнча лидердин мураскери делген саясатчынын киргизилбеши Си Цзинпин бийликте 2022-жылдан кийин да кала бериши мүмкүн дегенди туюндурат.
Кечээ беш жылда бир жолу өтүүчү партиянын курултайы аяктады.
Анын жыйынтыктары боюнча Си Цзинпиндин ысымын жана Кытайды өнүктүрүү боюнча идеялары партиянын жаңыланган уставына киргизилген.
Компартияны 2012-жылдан бери жетектеп келаткан Си Цзинпин бийликти өз колуна кыйла топтоп алды.
