Кыргызстандагы “Жол коопсуздугу” коомдук бирикмесинин демилгеси менен өтө турган иш-чара кайгылуу көрүнүштөрдүн алдын алууга багытталган.
Аны уюштурууга ЕККУ, Бишкек шаардык милициясы, Саламаттык сактоо, Билим берүү жана илим министрлиги көмөктөшкөн. Эскерүүдө жол кырсыктарынан каза тапкан 938 кишинин сөлөкөтү менен арт-инсталляция көрсөтүлөт. Муну менен жолдордогу кырсыктардын масштабын элге жеткирүү аракети көрүлмөкчү.
Жол кырсыктарынын курмандыктарын эскерүү күнү дүйнөдө 2005-жылдан бери, Кыргызстанда 2012-жылдан тартып 19-ноябрда белгиленип келет. Расмий эсеп боюнча, быйыл Кыргызстанда катталган жол кырсыктарынын саны 5 миңден ашып, 600дөн ашуун киши набыт болду. Жаракат алгандардын саны 7800дөн көп.
