Жети-Өгүз районундагы Көк-Жайык жайлоосунун Телти участогунда кар көчкүнүн алдында калган 38 жаштагы Р. Ашымбаевди издөө иштери уланууда. Өзгөчө кырдаалдар министрлигинин маалыматы боюнча, 23-январь күнү саат 23:30да министрликтин куткаруучулары менен жергиликтүү отуздай тургун аны издегени Телтиге жөнөп кетишкен. Алынган маалыматтарга караганда көчкүнүн көлөмү болжол менен 154 800 куб метр. 23-январда түштөн кийин куткаруучуларга дагы 20 кишиден турган көмөкчү топ кошумча күч катары жиберилди.
21-январда саат 17:00 чамасында Жети-Өгүз районунун үч тургуну Көк-Жайык жайлоосунун Телти участогунда аң уулап жүргөн учурда кар көчкү түшкөн. Аңчылардын бири, 38 жаштагы Р. Ашымбаевди көчкү басып калган. (ZKo)
