Москванын билим берүү департаменти мектеп программасындагы чет өлкөлөр тууралуу сабактарды кыскартып, ордуна Орусиянын маданиятын жана тарыхын таанытууну көбөйтүүнү сунуш кылып жатат. Бул тууралуу "Эхо Москвы" радиосу департаменттин башчысы Исаак Калинге таянып билдирди. Ага ылайык, аткаминер англис тили тууралуу китептен Лондон жөнүндөгү маалыматты алып, ордуна Москва тууралуу баян коюлганын билдирген.
Мамлекеттик Думанын эксперттик кеңешинин отурумунда сүйлөгөн сөзүндө Калин бул тажрыйбаны жалпы өлкөгө жайылтууну, Орусиянын дүйнөлүк мурастарга кошкон салымы боюнча суроолорду жылдык аттестацияга жана мамлекеттик экзамендерге киргизүүнү сунуш кылды.
