Бишкектин "Берекет" базарындагы өрттө күркөлөрү күйгөн соодагерлер Өкмөт үйүнүн алдына акцияга чыгышты. Акцияга чыккан 100гө жакын адам өкмөттөн жардам көрсөтүүнү жана премьер-министр Сапар Исаков менен жолугушууну талап кылышууда. Алардын айтымында, өрттөн бардык товарлары күйүп кеткендиктен тезинен жардамга муктаж.
Ош базары тараптагы "Берекет" базарында 13-апрелде таңга жуук чыккан өрттөн болжол менен 2000 чарчы метр соода аянты күйгөн. Учурда өрттүн себептери такталууда. Укук коргоо органдары "өрт атайын коюлушу мүмкүн" деген версияны да карап жатат.
Буга чейин өкмөт өрттөн жабыркаган соодагерлерге жардам көрсөтүүгө убада берген. (BkA)
