Линктер

шейшемби, 23-октябрь, 2018 Бишкек убактысы 15:47

Жээнбеков: Улуттук стратегия адамдын дараметин өнүктүрүүгө багытталган


Сооронбай Жээнбеков.

Президент Сооронбай Жээнбеков Кыргызстанды туруктуу өнүктүрүү боюнча улуттук кеңештин жыйынында "өлкөнү 2040-жылга чейин өнүктүрүү боюнча жаңы документтин мурдагы стратегиялардан айырмасы - адам дараметин өнүктүрүүгө багытталат жана бул максат мамлекеттик саясаттын борборунда болот" деп айтты.

- Бул максат үчүн социалдык-экономикалык өнүгүүдөн башка стратегияда соттук, демократиялык жана укуктук багыттарга өзгөчө көңүл бурулду. Эң жакынкы мезгилде аткарууга кирише турган негизги милдетибиз - сот реформасын ишке ашыруу. Соттук иштердин ачык-айкындыгын камсыз кылыш үчүн сот процесстерин заманбап технология менен жабдыйбыз, - деди Жээнбеков.

Президент башкаруу системасынын иш форматын өзгөртүш үчүн “Түндүк” электрондук системасын, жалпы эле “Таза коом” долбоорун ишке ашыруу бардык бийлик бутактарынын милдети экенин кошумчалады.

Сооронбай Жээнбеков стратегиянын алкагында тышкы саясатта Орусия жана коңшу өлкөлөр менен достук мамилеге өзгөчө маани берилгенин белгиледи.

Президенттин айтымында, стратегияны ишке ашыруунун биринчи этабы катары 2023-жылга чейинки мөөнөт каралып, анда беш жылдагы максаттар камтылмакчы.

“Ала-Арча” мамлекеттик резиденциясында Кыргызстанды Туруктуу өнүктүрүү боюнча улуттук кеңештин жыйыны өтүүдө. Анда эки маселе: 2040-жылга чейинки өнүктүрүү стратегиясы жага 2020-жылга чейин шайлоо мыйзамдарын жакшыртуу стратегиясы талкууланууда.

Сиздин пикир

пикирлерди көрсөт

XS
SM
MD
LG