Пакистандын түштүк-батышындагы көмүр шахтасындагы жарылуудан ооганстандык үч кенчи мерт болду. Жергиликтүү бийлик өкүлдөрү 27-декабрда Белужистан провинциясындагы Чамалаң көмүр кенинде газ жарылганын билдиришти.
Каза тапкан кенчилердин сөөгү бир нече саатка созулган издөө иштеринин натыйжасында табылган.
Пакистандын шахталарында адам өмүрүн алган кырсыктар көп болот. Сентябрь айында өлкөнүн түндүк-батышындагы дагы бир шахта урап, андан тогуз кишинин өмүрү кыйылган.
Пакистандын кенчилер федерациясынын маалыматы боюнча, бул өлкөнүн шахталарында бир жылда 200дөй жумушчу каза табат.
