Саясатчылар Ахматбек Келдибековдун, Азимбек Бекназаровдун жана Кеңешбек Дүйшөбаевдин экс-президент Алмазбек Атамбаев менен “Апрель” телеканалынын редактору Дмитрий Ложниковго койгон доосу толуктоо үчүн артка кайтарылды. Бул тууралуу “Азаттыкка” Жогорку соттун басма сөз катчысы Сюита Соурбаева билдирди:
- Доо арыз 26-декабрда берилген. Бирок айрым документтердин жоктугунан 28-декабрда доо арыз 9-январга чейин калтырылган. Бүгүн доогерлердин өкүлү келип арыз менен тиркелген документтин баарын алып кетти.
Үч саясатчынын өкүлү Динара Ашимова документтерди алып кеткенин жана ал толукталып, кайра 10-январда сотко тапшырыларын айтты.
- Сотко сөздөрдү даана көрсөтүш керек экен. Алар жалпы пикирди эмес, так сөздү талап кылышууда. Ошондуктан Алмазбек Атамбаев айткан сөздөрдүн ичинен кайсынысын жазыш керек экенин такташ үчүн документтерди алдык, - деди Ашимова.
Жогорку Кеңештин экс-спикери Ахматбек Келдибеков, Убактылуу өкмөттүн мүчөлөрү Азимбек Бекназаров менен Кеңешбек Дүйшөбаев экс-президент Алмазбек Атамбаевдин “Апрель” телеканалында 10-декабрда чыккан маегине байланыштуу 26-декабрда Атамбаев менен аталган каналдын редактору Дмитрий Ложниковго каршы Октябрь райондук сотуна кайрылган.
Алар “телеканалдагы маегинде экс-президент ар-намысыбызга шек келтирди” деп, соттон жалпысынан 18 млн. сом өндүрүп берүүнү өтүнүп жатышат. (BTo)
