Линктер

жекшемби, 20-октябрь, 2019 Бишкек убактысы 17:34

АФК кубогу: «Дордой» «Истиклолду» жеңди


Дөлөн Өмүрзаков атындагы борбордук стадионундагы футбол күйөрмандары. 3-апрель, 2019-жыл.

Бишкектин «Дордой» клубу Азия футбол конфедерациясынын (АФК) кубогунун 4-турунда Тажикстандын чемпиону «Истиклолду» жеңди.

Беттеш 15-майда Бишкектеги Дөлөн Өмүрзаков атындагы стадиондо өтүп, 2:1 эсеби менен талаа ээлеринин пайдасына аяктады. 1-таймдын 28-мүнөтүндө «Истиклолдун» оюнчусу Алишер Жалилов «Дордойдун» дарбазасына гол киргизип, эсеп ачты. 2-таймдын башында «Дордой» оюнчулары топко көбүрөөк ээлик кылып, 56-мүнөттө Вахыт Оразсахмедов бурчтан көтөрүлгөн топту башы менен атаандаштарынын дарбазасына таамай багыттап, эсепти теңеди. 77-мүнөттө «Дордой» клубунун чабуулчусу Мирлан Мурзаев 2-голду киргизди.

Бул «Дордой» клубунун АФК кубогунун тайпалык оюндарындагы алгачкы жеңиши. Буга чейин «Дордой» Түркмөнстандын чемпиону «Алтын-Асыр» менен Бишкекте 1:1 эсебинде тең чыкса, 2-турда тажикстандык «Хужанд» командасына 3:1 эсебинде жеңилген. 1-майда Дүйшөмбү шаарында «Истиклолго» 4:1 эсебинде утулган эле.

«D» тайпасында 4-турда болгон 2-беттеште «Алтын Асыр» командасы тажикстандык «Хужандды» 1:0 эсеби менен жеңди.

Төрт оюндун жыйынтыгы менен «Дордойдо» төрт упай чогулду.

«D» тайпасында сап башына төрт оюнда жети упай топтогон «Истиклол» келе жатат. 2-тепкичте төрт оюнда 6 упай топтогон «Алтын Асыр» жайгашкан. Акыркы эки орунду төрттөн упай топтогон «Дордой» менен «Хужанд» ээлеп турат.

АФК кубогунун «D» тайпасындагы оюндары 26-июнда жыйынтыкталат.

«Дордой» алдыда 19-июнда Түркмөнстанда «Алтын Асыр», 26-июнда Бишкекте «Хужанд» клубу менен беттешет. (GT)

Пикирлерди көрүңүз (3)

Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.
XS
SM
MD
LG