8-августта Кой-Таштагы окуялардан кийин медициналык жардам сурап 52 адам кайрылды, алардын ону ооруканага жаткырылды. Бул тууралуу Саламаттык сактоо министрлигинин басма сөз кызматы билдирди.
Ага чейин 8-августта кайрылгандар 20 адам экени, жалпысынан эки күндө жабыркагандардын саны 98 адам болгону, алардын бири, УКМКнын «Альфа» тобунун кызматкери Үсөнбек Ниязбеков оор жарааттан өзүнө келе албай каза тапканы айтылган.
Учурда ооруканада жаткандардын саны 20 адам, алардын 13ү Травматология жана ортопедия борборунда, үчөө Чүй облустук ооруканасында, төртөө Улуттук госпиталда. (RK)
