Коомчулукту өнүктүрүү жана инвестициялоо агенттиги (АРИС) учурда жалпы суммасы 205 млн. доллар болгон 12 долбоорду ишке ашырууда. Бул тууралуу өкмөттүн басма сөз кызматы кабарлады.
Премьер-министр Мухаммедкалый Абылгазиев АРИСтин калкты ичүүчү таза суу жана сугат суу менен камсыз кылуу маселеси айрыкча аймактарда курч болуп турганын айтып, сууну үнөмдүү колдонуш керек экенин кошумчалады:
- Президент Сооронбай Жээнбеков жарандарды ичүүчү таза суу жана сугат суу менен камсыз кылуу маселесине өзгөчө маани берет. Бул маселени комплекстүү чечүү менен жөнөкөй жарандардын жашоо-шартын жакшыртууга шарт түзүлөт, ошондой эле айыл чарбасын өнүктүрүүнү шарттайт.
Премьер-министр ошондой эле суу объектилерин оңдоп-түздөөгө жана инфратүзүмдү өнүктүрүүгө тартылган каражатты натыйжалуу колдонуу керек экениин белгиледи. (BTo)
