2-июлда өлкө аймагында дагы 526 адамга коронавирус жукканы аныкталды.
Алардын эң көбү Чүй облусунда - 231 адам. Бишкек шаарында 211, Жалал-Абад облусунда 27, Ош шаарында 19, Баткен облусунда 18, Ысык-Көл облусунда 10, Ош облусунда алты, Нарын облусунда үч жана Талас облусунда бир адам.
Илдеттен дарыланып жаткан 87 бейтап айыгып, акыркы сутка ичинде үйүнө чыкты.
Ушуну менен СOVID-19га чалдыккандар 6261 адамга жетти.
- Бишкек шаарында – 2603
- Чүй облусунда – 1278
- Ош облусунда – 495
- Ош шаарында - 675
- Жалал-Абад облусунда – 387
- Нарын облусунда – 497
- Баткен облусунда – 108
- Ысык-Көл облусунда – 139
- Талас облусунда - 79 киши.
Алардын 921и медкызматкерлер, 464ү айыкты.
Акыркы бир сутка ичинде коронавирус жугузуп алган төрт бейтап каза болду: Бишкектеги Кыргыз-түрк ооруканасында 71 жаштагы бир эркек, Ноокат аймактык ооруканасында 70 жаштагы бир эркек, Кочкор аймактык ооруканасында 69 жаштагы аял жана 56 жаштагы эркек бейтап.
2-июлга карата каза болгондордун жалпы саны 66 кишиге жетти.
2 530 адам айыкты.
Коронавирус күчөп кеткенине байланыштуу баш калаада коомдук транспорттун, коомдук тамактануучу жайлардын жана базарлардын иштөө убактысы чектелди. Коронавируска каршы ыкчам штабдын маалыматына ылайык, Бишкекте коомдук транспорт - автобус, троллейбус, кичи автобустар - иш күндөрү эртең менен саат 07.00дөн 10.00гө чейин жана кечки 17.00 дөн 21.00гө чейин гана иштейт. Ишемби жана жекшемби күндөрү толук токтотулат.
Кафе, ресторан, коомдук тамактануу жайларына саат 08.00дөн кечки 20.00гө чейин гана иштөөгө уруксат берилди. Супермаркеттер, соода борборлору саат 07.00дөн кечки 19.00 ге чейин иштейт. Базарлар күн сайын саат 06.00дөн баштап кечки 17:00 чейин иштешет.
Мындан тышкары велосипедди ижарага берүү пункттарынын, балдардын оюн аянтчалары менен батуттардын ишине толук тыюу салынды. Балдардын оюн-зоок мекемелери, футбол аянтчалары жана оюн аянтчалары да таптакыр иштебейт.
Ошондой эле көчөдө уруксатсыз соода кылууга жана адамдарды тейлөөгө да уруксат жок.
Тойканалар, түнкү клубдар, барлар, караоке-клубдар жана башка оюн-зоок мекемелери кардарлардын санына карабастан иштетилбейт. «Түндүкэлектр» жана «Бишкексууканал» ишканаларына кабыл алынган нормаларга ылайык карантин режимин бузгандыгы үчүн бул мекемелерге берилген суу жана электр жарыгын токтотуу сунушталат.
Мэрия элге парк, сквер, бульвар, борбордук аянт жана башка коомдук жайларга барууга чектөө коюлганын эскертүүдө.
Чоң-Алайдын акими Жумадилла Жапаровдон коронавирус табылды. Бул тууралуу өкмөттүн Ош облусундагы өкүлү Узарбек Жылкыбаев «Ынтымак» телеканалында түз эфирде маек куруп жатып билдирди. Анын айтымында, мамлекеттик органдардын кызматкерлеринен да коронавируска чалдыккандар көп болуп жатат.
«Карантин убагында көп кызматкерлерибизди аралыктан иштөөгө жибергенбиз. Чоң-Алай районунда оору көп катталган эмес, вирус такталган он адамдын сегизи Тажикстандан кайткан кыргыздар болчу, алар Чүйгө кетишкен. Ал Ошко деле көп келчү эмес экен. Аким кайдан, кимден жугузуп алганы белгисиз. Андан вирус аныкталганы менен, белгилери жок болуп жатат», - деди ал.
Ош облусунун Араван районунун акими Курбанбай Айтибаевден да коронавирус илдети 18-июнда аныкталган. Өкмөттүн өкүлү Узарбек Жылкыбаевдин маалыматына караганда, аким дарыланууда, абалы жакшы.
Өлкөдөгү ири шаарлардын бири Алматыда COVID-19дан жан берген тууган-уругунун сөөгүн моргдон алып кеткени келгендердин узун кезеги пайда болду.
Ушул тушта социалдык тармактарда Алматыдагы өлүкканадан коронавирустан кайтыш болгондордун сөөгүн алып кетүү үчүн бир канча саат саргарып кезек күткөн, жоон топ адамдар тартылган видеолор тарап жатат. Бул жайдын күзөтчүсүнүн айтымында, моргго түшкөндөрдүн саны бир канча жума мурдагыга караганда азыр эки эсе көбөйдү.
Алматыдагы дээрлик бардык дарыканалардын алдынан узун кезекти көрүүгө болот. Ооруканалар абалы өтө оор бейтаптарды гана кабыл алып жаткандыктан илдет жугузуп алгандардын көбү үйдөн дарыланып, дары-дармектерди өздөрү сатып алып жатышат:
«Биз жашпыз да. Ошондуктан оорунун жеңил формасы менен ооруп жатабыз го. Мен азыр антибиотик алайын деп турам. Мына, тизмени карасаңыз, бул жерде көп дарылар бар. Жумушта баары ооруп жатат», деди дарыкананын алдында кезек күткөндөрдүн бири.
Шаарда коронавируска тест алчу жайларга кезек күткөндөр да көп. Топтолгондордун айрымдарын жумуш берүүчүсү жөнөткөн, кээ бирлери өздөрү келген. Ошондой эле операция жасатуу үчүн тестке муктаж болгондор да бар. Эгер буга чейин анализдер бир күндөн кийин эле берилсе, азыр болсо кеминде эки күн күтүшөт.
Соңку он күндүн аралыгында Казакстанда коронавирус жугузуп алган, өпкөсү кагынып ооруган адамдар кескин көбөйдү. Саламаттык сактоо министрлигинин маалыматына караганда, күн сайын пневмония болгон 2,5 миңге чейин учур катталып жатат. Мындай бейтаптардын көбүнөн коронавирус аныкталган эмес. Толук маалымат бул жерде.
Мындай көйгөй Бишкекте да жок эмес. Учурда ооруканада көз жумгандарды кабыл алуучу өлүкканага түшкөн сөөктөр көбөйдү. Бул тууралуу 1-июлда «Азаттыкка» Республикалык патологоанатомиялык бюронун жетекчиси Валентина Пахман билдирди.
30-июнда бир суткада коронавирустан жети бейтап каза болгону расмий айтылды. Бул эпидемия башталгандан берки бир суткадагы эң көп сан болуп калды. Бирок илдетти аныктоо ыкмасы суроо жаратып жаткандыктан, өлгөндөр мындан көп болушу ыктымал деген божомол бар.
Муну «Азаттыкка» кайрылган угармандар жана окурмандар айтып, радионун социалдык түйүндөрдөгү расмий баракчаларына жазып жатышат.
1-июлда «Бишкектеги өлүкканада орун калбай калыптыр» деген маалымат тарады.
Пахман ал жетектеген жайда мындай маселе жок экенин айтты. Ал ошондой эле соңку күндөрү каза болгондор көп түшө баштаганын ырастады.
Бишкекте эки өлүккана бар. Экөө тең Кыргыз мамлекеттик медицина академиясынын аймагында жайгашкан. Бирине ооруканада көз жумгандарды алып барышат. Экинчиси Соттук-медициналык экспертиза боюнча республикалык бюрого карайт.
Facebook шеринеси