Акыркы суткада коронавирус илдетинен Кызыл-Кыя шаарынын 34 жаштагы тургуну каза болду. Бул илдетке байланыштуу Баткен облусунда катталган алгачкы жоготуу болду. Акыркы суткада аймактын 19 тургунунан илдет жаңы аныкталды.
Кыргыз өкмөтүнүн Баткен облусундагы өкүлчүлүгү коронавирус эпидемиясына байланышкан акыркы жагдайды эске алып, айрым чектөөлөрдү киргизгендигин өкүлчүлүктүн маалымат кызматы 3-июлда "Азаттыкка" билдирди.
Ага ылайык жума намаздарды мечиттерде жамаат менен окууга, маараке, нике жана башка тойлорду өткөрүүгө, куран окутууга убактылуу тыюу салынды. Санитардык эрежелерди сактабаган жалпы тамактануучу жайлар, ашканалар, ресторандар, дүкөндөр жабыла турган болду.
Чечимде айдоочулар санитардык эрежелерге баш ийбеген шартта жүргүнчүлөрдү ташуучу коомдук транспорт бир тараптуу токтотулары, коомдук жайлардын жана транспорттордун белгиленген иштөө мөөнөтүнөн ашык иштешине тыюу салынары белгиленди.
Акыркы суткада облуста жаңы аныкталган 19 бейтаптын алтоо Лейлек районунан, бешөө Баткен шаарынан, үчөө Кызыл-Кыя шаарынан, үчөө Кадамжай районунан, экөө Сүлүктү шаарынан. Март айынан бери бул илдетке облуста 127 киши чалдыкты.
Өпкөсүнөн кагынып, ооруканада дарыланып жаткандардын 23ү соңку бир сутка ичинде көз жумду. Бул тууралуу 3-июлда Коронавируска каршы республикалык ыкчам штаб кабарлады.
Штабдын маалыматына караганда, азыркы учурда стационарларда өпкөсүнөн кагынып ооруган (пневмония) 1724 бейтап жатат, 337синин абалы оор. Оор абалдагылардын 112си реанимацияда.
Жалпысынан март айынан бери бул илдетке чалдыккандардын саны 2508 болду, алардын 664ү айыгып кетти, 120сы кайтыш болду.
Кыргызстандын башкы өпкө дарыгери Талантбек Сооронбаев азыр өлкөдө сасык тумоо эмес, COVID-19 пандемиясы гана өкүм сүрүп жатканын айткан.
Кыргызстанда коронавирус жуккандардын арасынан бир сутка ичинде каза болгондордун саны боюнча эң жогорку көрсөткүч катталды. 3-июлда Коронавируска каршы республикалык ыкчам штаб кабарлагандай, кечээтен бери ооруканаларда 10 бейтап кайтыш болду:
Бишкектеги Кыргыз-түрк ооруканасында 58 жаштагы бир аял, Республикалык инфекциялык ооруканада 54 жаштагы бир эркек, Ноокат аймактык ооруканасында 59 жаштагы бир медициналык аял кызматкер, Ош шаардык клиникалык ооруканасында 33 жаштагы бир келин, Кызыл-Кыя аймактык ооруканасында 33 жаштагы бир эркек, Ысык-Ата аймактык ооруканасында 64, 66, 80 жаштагы үч эркек жана 62, 63 жаштагы эки аял.
Ал эми бир сутка ичинде кайыгып, ооруканадан чыгарылгандардын жалпы саны 125 кишини түздү. Алар:
Бишкек шаарында – 44,
Ош шаарында – 42,
Ош облусунда – 15,
Чүй облусунда – 7,
Жалал-Абад облусунда – 7,
Нарын облусунда – 6,
Баткен облусунда – 3,
Талас облусунда – 1.
COVID-19 илдетине каршы республикалык штабдын 3-июлдагы маалыматына караганда, өлкө боюнча жалпысынан 2655 бейтап айыкты.
Орусияда коронавируска чалдыккандардын саны кайрадан көбөйгөнүн Илдеттин жайылышына каршы күрөшүү боюнча федералдык ыкчам штабдын маалыматы көрсөттү.
Маалыматка караганда, 2-июлга карата бир сутка ичинде вирус 6760 кишиден аныкталды. Илдет жугузуп алган 147 киши каза болду. 6 047 бейтап айыгып чыкты.
Муну менен Орусияда коронавирус жугузуп алгандардын жалпы саны 661 165 кишини түздү. Эки күн мурда ооругандардын көрсөткүчү азайганы маалымдалган.
Эпидемия башталгандан бери Орусияда жалпы 9 683 адам вирустун курмандыгы болду. Эксперттер расмий статистикада өлүмдүн саны азайтылып көрсөтүлүп жатканын айтып келишет.
Facebook шеринеси