Түркмөнстанда коронавирустун жайылышынан улам абал оорлошуп баратканы кабарланууда. 1-ноябрдан тарта өлкөдө карантиндик чектөөлөр күчөшү мүмкүн деген кабарлардан кийин кырдаал ого бетер чыңалды.
Көз карандысыз маалымат каражаттарынын COVID-19 менен байланышкан оорулардын жана өлүмдөрдүн көбөйүшү жөнүндө көптөгөн маалыматтарына карабастан, түркмөн бийлиги "өлкөдө коронавирус таптакыр жок" деп расмий маалымат таратууну улантып жатат.
Маалыматтарга караганда, түркмөн өкмөтү коронавирустун жайылышына жол бербөө үчун чараны олуттуу түрдө күчөтүүнү карап жатат. Дашогуз облусундагы аялдар колониясында өпкөсү кагындар көбөйдү. Маалымат каражаттары колониядагы 500 аялга коронавирус диагнозу коюлганын кабарлашкан.
"Азаттык" радиосунун түркмөн кызматынын кабарчылары 27-октябрда Ашхабаддын кээ бир аймактарында коронавирусту жугузуп алгандардын саны көбөйгөнүн жазышты. Алар кырдаал өзгөчө акыркы эки жумада күчөгөнүн маалымдашууда.
"Азаттык" радиосунун түркмөн кызматы өзүнүн ишенимдүү булактарына таянып, өткөн жекшембиде түркмөн өкмөтү коронавирустун жайылышын чектөө чараларын олуттуу түрдө күчөтүп жатканын жарыялаган. Ошондой эле өкмөт өзгөчө ички аба каттамдарын токтотуу, аймактар арасында жол кыймылын чектөөнү, айрыкча Ашхабадга башка аймактардан кирүүгө тыюу салууну карап жатканы айтылат.
Той-топур, жаназа жана эскерүү сыяктуу иш-чараларга толук тыюу салына турган болууда.
Ошону менен бирге Түркмөнстанда беткап режими, темир жол кыймылын толугу менен токтотуу жана өлкөнүн аймактар аралык транспорт байланышын кескин чектөө сыяктуу карантиндик иш-чаралар дагы деле күчүндө.
Расмий Ашхабад мурдараак 15-октябрга чейин каралган бул чектөөлөр 15-ноябрга чейин узартылганын жарыялаган.
Коронавирустун жайылып кетпеши үчүн Германия бир айлык мөөнөткө айрым аймактарына карантин киргизди. Франция жаңы чектөөлөргө даярдык көрүүдө.
30-октябрдан тартып Францияда массалык иш-чараларга тыюу салынат. Бассейн, ресторан, барлар жабылат. Үйдүн айланасынан алыс чыгууга тыюу салынат.
Дүкөнгө, жумушка, дарыгерге жана кыска убакытка сейилдөөгө чыгууга гана уруксат. Бул тууралуу Франция президенти Эммануэл Макрон 28-октябрда элге жасаган кайрылуусунда айтты.
Анын айтуусунда, сырттан келгендердин баары коронавируска карата тесттен өтүшөт. Чектөөлөр кеминде 2-декабрга чейин созулат. Француз өкмөтү эки жумада бир чектөөнү жумшартуу же катаалдантуу маселесин карап чыгары айтылды.
Германияда 2-30-ноябрга чейин бар, ресторандар, оюн-зоок борборлору, концерттик залдар, театрлар жана фитнес-борборлор жабылат. Дүкөндөр санитардык талаптарды сактоо менен иштөөгө милдеттендирилди. Көпчүлүк аймактарда мектептер иштей берет.
«Биз азыр чара көрүүгө тийишпиз», - деди кырдаалды “өтө олуттуу” деп мүнөздөгөн немис канцлери Ангела Меркель.
Европа өлкөлөрүндө 28-октябрга карата бир суткада дээрлик 15 миң адам вируска чалдыкканы аныкталган. Бул өткөн аптадагы көрсөткүчтөн эки эсе көп.
«Биз бейтапканалардын толушуна жол берсек, анда өтө кеч болуп калат», - деди Германиянын саламаттык сактоо министри Йенс Спан.
Болгария, Бельгия, Португалия, Польшанын өкмөттөрү карантиндик чектөөлөрдү күчөттү.
Дүйнөлүк саламаттыкты сактоо уюму (ДССУ) Европада акыркы бир жумада 1,3 млн. адам коронавирус жугузуп алганын маалымдады. Бул жалпы дүйнө жүзүндөгү вируска чалдыккан 2,9 млн. адамдын дээрлик тең жарымын түзөт.
Илдеттен көз жумгандардын саны да мурунку жумага караганда 37% өстү.
Коронавируска байланыштуу Чехияда түнкү коменданттык саат киргизилди. Европа Биримдигинин саламаттык сактоо органы бул өлкө аймакта оору жуккан учурлар боюнча эң алдыга чыкканын маалымдады. Чех саламаттык сактоо министри Роман Примула азыркы карантин чаралары да аздык кыларын, коронавируска кабылгандар 268 миңден ашып, 2300дөн көп бейтап көз жумганын билдирди.
Чехияда коменданттык саат 28-октябрдан тартып башталат жана өтө олуттуу себеби жок, бейчеки көчөгө чыгууга тыюу салынат. Өкмөт 5-октябрда өзгөчө абал жарыялаган жана мектептер, тамактануучу жайлар жабылган, көпчүлүк жерлерде милдеттүү түрдө беткап кийүү тууралуу эреже кирген. Тамак-аш, турмуш-тиричиликке керектүү буюм-тайымдар сатылган дүкөндөр менен дарыканалардан башкасынын баары жабылган.
Пандемиянын айынан Рождество алдындагы салтка айланган майрамдык жармаңкелер да болбойт. Мунун алдында Германияда да ушундай чечим кабыл алынган.
Италия менен Испания да кайрадан карантин эрежелерин киргизди. Франция ушул тапта чектөө эрежелерин дагы катаалдатуунун жолдорун караштырып жатат. Париж өндүү ири шаарларда буга чейин коменданттык саат киргизилген. Испанияда 25-октябрда түнкү коменданттык саат киргизилип, өзгөчө абал жарыялаган.
Францияда коронавируска кабылгандар 1,1 миллион адамга жетти. Мындай көрсөткүч менен дүйнөдөгү бешинчи өлкө болуп калды.
АКШдагы Жон Хопкинс университетинин эсебинде, дүйнө жүзүндө коронавирус 43 миллиондон ашык адамга жукту. Дүйнөлүк саламаттык сактоо уюму быйыл март айында COVID-19ду пандемия деп жарыялагандан бери 1,1 миллион бейтап жан берди.
Коронавируска каршы күрөш боюнча республикалык штабдын 26-октябрдагы маалыматына караганда, соңку бир сутка ичинде коронавирус дагы 420 кишиден жаңы аныкталды.
Марттан бери вирус жугузуп алгандардын расмий эсеби 56 170 адамды түздү. Анын 47 843ү сакайганы айтылды. Бир күндө 227 адам ооруканалардан айыгып чыкты.
Кыргызстанда пневмонияны козгой турган коронавирус аныкталган март айынан бери илдеттен кайтыш болгондордун саны Саламаттык сактоо министрлигинин жаңы эсеби боюнча 1134 кишиге жетти.
18-августка чейин вирустан жалпысынан 1 498 кишинин өмүрү кыйылганы расмий айтылган. Бийлик каза болгондордун статистикасы кайра каралып чыкканын, 437 кишинин өлүмүнө башка оорулар себеп болгонун, сегиз учур эки жолу катталып калганын жарыялаган.
Статистика боюнча учурда вируска чалдыккан 3 399 бейтап стационарда, 3 274ү үй шартында дарыланууда.
Кыргызстанда коронавирустун жайылышы күчөп жатканына байланыштуу август айында жабылган убактылуу стационарлар кайра ачылып жатат.
Facebook шеринеси