Сузактагы үй-бүлөлүк зомбулук окуясы боюнча өкмөткө караштуу аялдар иши жана гендерлик өнүктүрүү боюнча улуттук кеңеш онлайн жыйын өткөрдү.
Ага өкмөт мүчөлөрү, депутаттар, жергиликтүү бийлик өкүлдөрү катышты. Бул маалыматты вице-премьер-министр Аида Исмаилова бүгүн КСДП фракциясынын өкүлү, Жогорку Кеңештин депутаты Айнура Осмонованын суроосуна жооп берип жатып билдирди.
“Бул окуяга байланыштуу жыйында түрдүү сунуштар айтылды. Анын ичинде аялдарга психологиялык колдоону күчөтүү, Сузак районунун жетекчилеринин жоопкерчилигин кароо, губернатордун соцтармакты көзөмөлдөгөн орун басарынын жоопкерчилигин кароо сунуш кылынды”.
Аида Исмаилова айылдарда кыз-келиндерди жумуш орду менен камсыз кылуу маселеси да көтөрүлгөнүн кошумчалады.
КСДП фракциясынын мүчөсү, депутат Айнура Осмонова парламенттин көпчүлүк коалициясынын жыйынында Сузактагыдай зомбулук окуялар дайыма эле болуп келе жаткан көрүнүш экенин белгиледи. Депутат аялдардын укугун, сабатын көтөрүү, жумуш орундары менен камсыз кылып, гендерлик өнүктүрүү боюнча иш алып барууну өкмөткө сунуш кылды.
12-июнда социалдык тармактарда тараган видеодо эркек киши моюнуна эки дөңгөлөк байланган, колу таңылган аялга башынан ылдый чакалап суу куюп, жаакка чаап жатканы көрсөтүлгөн.
Окуя Сузакта болгону аныкталган. Кийинчерээк 47 жаштагы аял милицияга арыз менен кайрылган. Жалал-Абад облустук ички иштер башкармалыгы бул факт боюнча Жазык кодексинин «Уруп-согуп кыйноо» беренеси менен иликтөө иштерин жүргүзүп жатат. Күйөөсү сот чечими менен 15 суткага камалган.(ZKo)
