Ош облустук ички иштер башкармалыгы 81 жаштагы карыяны тепкилеп, сабаган деп шек саналган жаран кармалганын билдирди. Маалыматка караганда, 25-августта үйүнөн кармоо учурунда шектүү качып кетүүгө аракет кылган. Милиция кызматкери денесинен жараат алган.
Окуя боюнча Жазык кодексинин 355-беренесинин («Бийлик өкүлүн коркутуу же ага карата зомбулук») негизинде сотко чейинки териштирүү башталды. Шектүү Кара-Суу райондук ички иштер бөлүмүнүн убактылуу кармоочу жайына камакка алынганы кабарланды. Ал сүйлөй албагандыктан жаңсоо тилин билген адис тергөөгө көмөктөшүп жатат.
18-августта Кара-Суу районунун Савай айылынын 81 жаштагы тургуну денесинен жаракат алып жергиликтүү ооруканага кайрылган. Ошол эле күнү анын сабалганы белгилүү болгон. Фактыны райондук милиция Жазык кодексинин 266-беренеси («Ээнбаштык, зомбулук») менен бирдиктүү реестрге каттап, сотко чейинки териштирүү ишин баштаган.
Кылмышка шектүү буга чейин Жазык кодексинин 164-165-беренелери менен («Жашы жете элек адам менен жыныстык мүнөздөгү аракеттер, ыплас аракеттер») үч жолу соттолгону айтылды. (DU)
