Линктер

ЧУКУЛ КАБАР!
4-Август, 2021 шаршемби, Бишкек убактысы 22:30

Президент Сооронбай Жээнбеков Бишкек шаарына кайра өзгөчө абал киргизгени кабарланды


Бишкек. Президент жана парламент отурган имарат. 10-октябрь, 2020-жыл.

Президент Сооронбай Жээнбеков Бишкек шаарынын аймагына кайрадан өзгөчө абал режимин киргизүү тууралуу жарлыкка кол койду. Бул тууралуу президенттин сайты 12-октябрда жарыялады.

Маалыматка караганда, бул чечим Жогорку Кеңеш үч күндүн ичинде буга чейин өзгөчө абал режимин киргизүү жөнүндө маселени карабаганы менен байланыштуу.

Маалыматта массалык башаламандыктын натыйжасында күч колдонуу менен адам өмүрүнө жана ден соолугуна коркунуч жараткан кырдаал сакталып тургандыгына байланыштуу, Конституциянын 15-беренесине, 64-беренесинин 9-бөлүгүнүн 2-пунктуна жана «Өзгөчө абал жөнүндө» конституциялык мыйзамдын 3, 4, 7, 8-беренелерине ылайык, жарандардын өмүрүн жана саламаттыгын, алардын коопсуздугун сактоо, коомдук-саясий кырдаалды тез арада турукташтыруу, баш калаада коомдук тартипти камсыз кылуу максатында президенттин жарлыгы чыкканы айтылат.

Ага ылайык, Бишкекте өзгөчө абал 12-октябрдан тартып 19-октябрга чейин кечки саат 20.00дөн баштап таңкы саат 07.00гө чейин болот. Бул аралыкта автоунаалардын, коомдук транспорттун, жөө адамдардын көчөдө жүрүшүнө тыюу салынат. Баш калаанын аймагында күндүз да митинг, жүрүш, пикет жана башка спорттук, маданий массалык иш-чараларды өткөрүүгө тыюу салынат.

Өзгөчө абал киргизилген мезгилде ички иштер министринин орун басары Алмазбек Орозалиев Бишкек шаарынын коменданты болуп дайындалды.

Жарлык Жогорку Кеңешке жиберилген жана кол коюлган учурдан баштап күчүнө кирүүгө тийиш.

Буга чейин президент Сооронбай Жээнбеков акыркы кырдаалга байланыштуу 10-октябрдан 21-октябрга чейин өзгөчө абал киргизүү боюнча жарлыкка кол койгон. Анын негизинде комендатура түзүлгөн. Аны ички иштер министринин орун басары Алмазбек Орозалиев жетектей баштаган. Коменданттык саат 21:00дөн 05:00гө чейин болоору айтылып, Бишкектин ичинде жана четинде 15 блокпост орнотулган.

4-октябрдагы парламенттик шайлоодон кийин өлкөдө саясий кризис өкүм сүрүүдө. 5-октябрда шайлоонун баштапкы жыйынтыгына нааразы болгон партиялардын тарапкерлеринин акциясы массалык тополоң менен коштолгон.

6-октябрга караган түнү президенттик аппарат жана парламент жайгашкан имаратты митингчилер ээлеп алышкан. 10-октябрда парламент кезексиз жыйынга чогулуп, 6-октябрга караган түнү массалык башаламандык учурунда абактан бошотулган мурдагы депутат Садыр Жапаровду премьер-министр кылып тандаганы айтылган. Бирок парламенттеги айрым депутаттар, коомдук ишмерлер, юристтер жана укук коргоочулар ал жыйынды мыйзамсыз деп эсептеп жатышат.

Президент Жээнбеков ишин «Ала-Арча» резиденциясында улантып жатканы кабарланды. (NT)

Пикирлерди көрүңүз (6)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG