Линктер

ЧУКУЛ КАБАР!
27-Сентябрь, 2021 дүйшөмбү, Бишкек убактысы 12:21

Башкы прокуратура: «Сандалаш» коругунда мамлекетке бир миллиард сом зыян келтирилген факт аныкталды


Иллюстрациялык сүрөт.

Жалал-Абад облусундагы «Сандалаш» коругуна тийиштүү жер тилкесин тоо-кен компаниясына убактылуу пайдаланууга мыйзамсыз берүүнүн натыйжасында мамлекет бир миллиард сомдон ашык зыян тартканы аныкталды. Бул тууралуу 5-ноябрда Башкы прокуратуранын өкүлү Эрмек Асанов кабарлады.

Мекеменин маалыматына караганда, мамлекеттик кызматкерлер коруктун бир бөлүгүн мыйзамда белгиленген тартипти бузуп, өзгөчө корголуучу жаратылыш аймагынын жерин башка категорияга которбостон, токой жана айыл чарба өндүрүшүндөгү жоготуулардын ордун толтурбастан пайдаланууга беришкен.

«Башкы прокуратура аталган фактыны 3-ноябрда Жазык кодексинин 319-беренесинин 1-бөлүгү (коррупция) менен Кылмыштардын жана жоруктардын бирдиктүү реестрине каттоого алып, сотко чейинки териштирүү башталды», деп айтылат мекеменин маалыматында.

Өкмөттүн 2006-жылдын 24-апрелиндеги токтому менен Жалал-Абад облусуна караштуу Чаткал районунун аймагында жалпы аянты 25 270 гектарды түзгөн «Сандалаш» коругу уюштурулган.

2012-жылдын август айында өкмөттүн токтому менен алтын кенин иштетиш үчүн компаниялардын бирине ижарага берилген 3 661 гектар жер тилкесинин бир бөлүгү (1124,7 гектар) жогорудагы коруктун аймагында жайгашкандыгы жана өзгөчө корголуучу жаратылыш жерлеринин категориясына кирери аныкталган. (RK)

Пикирлерди көрүңүз (8)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG