Карзай Америкага шарт койду
Ооганстандын президенти Хамид Карзай эл аралык коопсуздук күчтөрү ооган үйлөрүнө рейд өткөрүп, элдин тынчтыгын алганын токтотсо гана АКШ менен аскердик кызматташуу келишимине кол койоорун эскертти: “Тынчтык -- биздин Америкага койгон бирден-бир шартыбыз. Америка бизге тынчтык бериши керек. Ошондо гана биз келишимди кабыл алып, ага кол койобуз. Эгерде Америка кайрадан аскердик операция баштап, биздин үйлөргө кирсе, эч кандай келишимге кол койулбайт”. Карзай Кабулда ишембиде Жалпы улуттук жыйын -- Лойя Жирганын -- курултайы аяктаар алдында чыгып сүйлөдү. Лойя Жирга 2014-жылы НАТОнун күчтөрү өлкөдөн чыгарылгандан кийин коопсуздукту көзөмөлдөй турган АКШ аскерлерин калтыруу маселесин негизинен колдоп берди.