Кыргыз армиясы: талкаланган тагдыр, кыйраган кыял...

"Азаттыкка" Кой-Таш аскер бөлүгүнүн "Ала-Тоо" полигонунда кызмат өтөп жаткан айрым жоокерлердин ата-энелери арыз менен кайрылды. Анда аскер жетекчилери быйыл жазында чакырылган балдарды башка бирөөлөргө жалдап бергени, кара жумушка салганы, ур-токмокко алганы, мыйзамсыз, уставга жат иштерге барганы айтылат. Учурда жоокерлердин бирөө Бишкектеги республикалык психикалык саламаттык борборунда дарыланып жатат. Жабырлануучулар тиешелүү органдарга мындан туура эки ай мурун эле кайрылганы менен майнап чыкпай жатат дешет. Башкы штаб тергөө жүрүп жатат деген жүйө менен комментарий берүүдөн баш тартты. Ошондой эле жоокерлер арызданган аскер жетекчилеринин пикир алууга уруксат берген жок. Башкы прокуратура дагы түшүндүрмө бере элек.