Бишкек Москва менен Анкаранын ортосунда

24-ноябрда атып түшүрүлгөн учактын айынан чыккан Анкара менен Москванын ортосундагы чатакка байланыштуу расмий Бишкек өзүнүн так позициясын билдире элек. Эл аралык мамилелер боюнча жергиликтүү адистер арасында эки өлкө менен тең достук жана бир туугандык байланыштагы Кыргызстандын абалы эгерде тараптардын ортосундагы мамиле кескин курчуп кетсе кандай болот деген тынчсыздануулар бар. Ошол эле кезде Кыргызстан мүчө болгон Жамааттык коопсуздук келишими уюму Түркиянын аракетин айыптап чыкты. Орусиянын орбитасында калган Кыргызстан үчүн бул жагдай анын тышкы саясатында ыңгайсыздык жаратпайбы деген түкшүмөлдөр күчөдү.