Борбор Азия

Буга байланыштуу өзбек президенти Мирзиёев саламаттык сактоо министрине сөгүш берди.

"Азаттыктын" өзбек кызматынын кабарчысы коронавирус менен ооругандарга керек дарыларды сурап, Ташкенттеги ондон ашык дарыканага барган. Бирок биринен да сураганын тапкан эмес.

Кабарчылардын ырасташынча, мындай көрүнүш бир эле Ташкентте эмес, бүт Өзбекстанда байкалууда.

Өзбекстандык интернет колдонуучулардын бири арбидол аттуу дарыны февраль айында 35 миң сум же 3 долларга алганын, азыр анын баасы 50 долларга чыкканын жазды.

Өлкөдөгү дары таңкыстыгын өзбек президенти Шавкат Мирзиёев да моюнуна алып, өкмөткө дарынын запасын үч айга жеткидей кылып камдап коюуну буюрду.

"Канча каражат керек болсо беребиз. Бирок дарылар кымбаттап кетсе, элде нааразылык жаралат. Дагы бир жолу кайталайм, жогун алып келебиз. Ар кайсы райондо баа ар түрдүү экен. Ошондуктан дарылардын баасы бардык райондо бирдей болушуна көңүл бурушубуз керек".

Дагы караңыз

Коронавирустан үйдө дарылануунун ыкмалары

Өзбекстандын фармацевтика тармагын өнүктүрүү агенттигинин маалымат катчысы Кыздаркан Кожоева жакын арада дары маселеси боюнча кеңири маалымат берилерин, бардык маселелер ошондо чечилерин билдирди.

Ал арада өзбек президенти Шавкат Мирзиёев бир нече жооптуу кызматкерди кенебестиги үчүн тилдеди.

"Бул биринчи кезекте Ташкент шаарына жана Ташкент облусуна тиешелүү. Бул аймактардын жетекчилери абалга сүңгүп кирген эмес. Медициналык мекемелердеги реалдуу абал кандай экенинен кабарсыз. Элди өз убагында маалымат менен камсыздоого, өз убагында дарылоого, илдетти токтотуп калууга жооптуу экенин сезбей жатышат. Саламаттык сактоо министрлиги акыркы айда коронавирусту токтотуу стратегиясын одоно бузган. Дарылоо ыкмаларын абалга жараша өзгөрткөн эмес".

Мирзиёев ушинтип, борбор калаадагы жана Ташкент облусундагы бейтапканалардын алдындагы мобилдик топторду үч эсе көбөйтүүнү буйруду.

17-июнда Өзбекстандын өкмөт башчысы Абдулла Ариповдун катышуусу менен Коронавируска каршы күрөшүү боюнча атайын комиссиянын жыйыны өттү. Анда коронавирус жугузуп, үйүндө дарыланып жаткандарга дары-дармекти акысыз берүү чечими кабыл алынды.

Дагы караңыз

Тумоо маалында дары көздөн учту

Акысыз бериле турган дары-дармектердин тизмесинде гидроксихлороксин, азитромицин, парацетамол, С витамини жана бир жолу колдонулуучу медициналык беткаптар бар.

Өзбекстанда коронавирус илдетине кабылып, бирок оорусу жеңил өтүп жаткан адамдар дарыгердин сунушу менен үйүндө дарыланат.

Азырынча COVID-19 инфекциясын жуктуруп, бирок үйүндө дарыланып жаткан адамдардын саны тууралуу маалымат бериле элек.

Дүйнөлүк саламаттык сактоо уюмунун маалыматы боюнча Өзбекстанда 18-июлда 289 адам коронавируска чалдыкканы аныкталды. Бир киши оорудан көз жумду.

Өлкөдө вирус жуктургандардын жалпы саны 15 896 адамга жетти. Илдет жуктурган 80 адам көз жумду. 9003 адам оорудан сакайды.

Ал арада Өзбекстандын башкы прокуратурасы биринчи жарым жылдык ичинде 453 жооптуу кызматкерге карата кылмыш иши козголгонун жарыялады.

Маалыматка караганда алардын төртөө республикалык, 13ү облустук, калган 442си райондук жана шаардык деңгээлдеги кызматкерлер. Алар паракорлук, кызмат абалынан аша чапкандык жана шалаакылык беренелери боюнча айыпталууда. Маалыматта алар алты ай ичинде мамлекетке 17 миллион доллар зыян келтиргени, 11 миллион доллар кайра калыбына келтирилгени айтылган.

Тажикстандагы май куюучу жайларда мындан эки апта мурда эле бир литр газдын баасы 2.5 сомониден сатылып жаткан болсо, азыр 4 сомониге чыкты. Бул 19 сом турган газ азыр 30 сомго көтөрүлдү дегенди билдирет. Өлкөдөгү машиналардын көбү газ менен жүргөндүктөн газдын баасынын өсүшү тажикстандыктар үчүн абдан маанилүү.

13-июлда энергетика министринин орунбасары Шоди Шоимзода биринчи жарым жылдыкта Тажикстанга 227 миң тонна жаратылыш газы ташылып келгенин, бул мурдагы жылдагы көлөм менен барабар экенин айткан.

"Газдын баасынын кескин кымбаттап кеткени боюнча атайын комиссиянын отурумунда чечим кабыл алынган. Ал чечим тууралуу жакынкы күндөрү маалымат берилет. Азырынча газдын баасы эмне себептен көтөрүлүп кетти деген суроого так жооп берүү кыйын. Муну өлкөгө газ ташып кирген компаниялардан сураш керек. Ошондон кийин гана баанын кымбаттаганынын себебин так айта алабыз".

Бирок министрликтин мындай жообу тажикстандыктарды канааттандырган жок. Тескерисинче, суроо андан бетер көбөйгөн. Жарандар «эмне үчүн дүйнө жүзүндө арзандап аткан мунай Тажикстанда кымбаттап кетти?», - деген суроону кабыргасынан коюшууда. Анткени бир эле Дүйшөмбү шаарында эмгектенген 20 миңге жакын таксинин кирешеси бул кымбатчылыктын айынан жок эле дегенде 30% азайган.

Дүйшөмбү – Гисар багытында жүргүнчү ташыган Талабшо Шаманов мамлекет көзөмөлдөгөндүктөн жол акы мурдагыдай эле калып, бирок күйүүчү майдын баасы кымбаттап кеткенине капа.

"Газдын баасы акыркы 10-15 күндө көтөрүлдү. Биз эми эмне кылышыбыз керек? Буга чейин эки ай иштебей карантинде отурдук. Үйдөгү малды сатып, жан сактадык".

Коронавирус пандемиясынын башында башка өлкөлөр сыяктуу эле Тажикстанда да күйүүчү майдын баасы арзандаганы байкалган. Ошол эле учурда көчөгө чыккан элдин катары суюлган. Бирок карантиндик чектөөлөр аланары менен эл көчөгө чыгып, жолдо транспорт каттамы жанданган. Аны менен кошо күйүүчү майдын баасы да көтөрүлүп кетти.

Баанын эмне үчүн көтөрүлгөнү тууралуу Тажикстанга күйүүчү май ташыган фирмалардын эч бири жооп берүүнү каалаган жок. Май куюучу жайлардын айрымдарынын жумушчулары кампада жаратылыш газынын көлөмү азайганын, мындан улам аны сатууга чектөө киргизилгенин гана айтышты.

Расмий статистика боюча Тажикстандагы автоунаалардын 90% ашыгы газ менен жүрөт. Тажиктер күйүүчү майды негизинен Казакстандын «Актөбөмунайгаз» фирмасынан сатып алышат.

Апрель айынын соңунда бул компания суюлтулган газды Өзбекстандагы Бекабад станциясына 105-125 долларга ташып келип турган. Бирок июль айынын биринчи чейрегинде бааны 350-380 долларга чейин көтөрүп жиберген.