Борбор Азия

Дарыгерлер бийликтин адилетсиз мамилесинен улам өлкөдө коронавируска чалдыккандар көбөйүп жатат деп эсептешет.

Ташкент шаардык "Тез жардам" кызматы акыркы төрт айдан бери кошумча айлык албаганын ачык айтып чыгышты. Алар күнү-түнү иштеп, коронавирус жугузуп алган медиктерге да кенемте төлөнбөгөнүн жашырышкан жок. Алардын социалдык тармактарга жарыялаган ачык катында минтип жазылган.

"Биз төрт айдан бери пандемия шартында иштеп жатабыз. Төрт айдан бери бир да кошумча акы албадык. Тескерисинче, айлыгыбызды кечиктирип берип атышат. Ар бир 14 күн сайын баарыбыз коронавируска тест тапшырып турушубуз керек эле. Бирок төрт ай ичинде бизден бир гана жолу тест алышты. Балким арабызда вирусту жуктуруп алып, бирок жыгылбай иштеп жаткандар бардыр. Биз да адамбыз, иштен кийин үйүбүзгө, үй-бүлөбүзгө барабыз. Качанга чейин элеңдеп, коркуп жашайбыз?", -деп жазылган медиктердин катында.

Дагы караңыз

Өзбекстанда дары издегендер көбөйдү

28 жаштагы Бахтияр төрт айдан бери Ташкенттеги №10 "Тез жардам" кызматынын атайын бригадасында иштеп келет. Вирус жуктуруп алып, акыркы беш күндөн бери ооруканада жатат. Ал президентке ачык кат жазган кесиптештерине кошуларын билдирди.

"Төрт айдан бери бардык суткалык нөөмөтүбүз саналганда президент убада кылган кошумча айлыкты төрт жолу алмакпыз. Андан сырткары президенттин атайын буйругу менен дарыгерлердин ар бир күндүк айлыгына 6% кошумча төлөнүшү керек эле. Бирок ал кошумча акы бизге эки жолу гана төлөндү. Андан сырткары иш учурунда вирус жуктурган дарыгерлерге 100 миллион сумдан, тагыраагы 9800 доллардан кенемте төлөнүп берилмек. Мен ушу күнгө чейин бир тыйын да ала элекмин".

Өкмөттүн убадасына таянган жаш дарыгердин эсеби боюнча ага төрт ай ичинде жалпысынан 177 миллион сум же 17.5 миң доллар төлөнүш керек экен. Мунун - 100 миллион суму кенемте, 75 миллион суму төрт айдан берки карантин шартындагы эмгеги үчүн төлөнө турган кошумча айлык жана ар бир иштеген күнү үчүн төлөнө турган 6% кошумча акы.

"8-июлда тест тапшырдым. "Вирус жуккан" деген жыйынтыгын 14-июлда алдым. 15-июлда мени ооруканага жаткырышты. Үй-бүлөмдү тесттен өткөрүү үчүн ортого салбаган таанышым калбады. Андан бери алты күн өтсө да жыйынтыгы чыга элек. Эки айлык кызым менен аялым ооруп, үйдө дарыланып жатышат".

Ташкенттеги "Тез жардам" кызматынын дарыгерлери кошумча айлыктардын төлөнүшүн, дарыгерлерден бат-бат тест алып турууну жана аларды коргоочу кийимдер менен камсыздоону талап кылып, прокуратурага, омбудсменге жана президенттин сайтына кат жазышкан.

Ташкенттин "Тез жардам" кызматында иштеген дарыгерлердин талабы боюнча саламаттык сактоо министри жооп бере элек. Буга чейин президент Шавкат Мирзиёев медицинадагы кемчиликтерди мойнуна алып, саламаттык сактоо министрине жана Ташкент шаарынын мэрине сөгүш берген эле.

19-июлдагы теле жыйында Мирзиёев ар бир медициналык мекемелердин короосуна касса орнотуларын, айлыктары өз убагында берилип турарын убада кылган. 20-июлда өзбек өкмөтү "Тез жардам" кызматында иштеген ар бир кызматкерге 100 доллардан 250 долларга чейин кошумча акы төлөө тууралуу токтом чыгарды.

Буга байланыштуу өзбек президенти Мирзиёев саламаттык сактоо министрине сөгүш берди.

"Азаттыктын" өзбек кызматынын кабарчысы коронавирус менен ооругандарга керек дарыларды сурап, Ташкенттеги ондон ашык дарыканага барган. Бирок биринен да сураганын тапкан эмес.

Кабарчылардын ырасташынча, мындай көрүнүш бир эле Ташкентте эмес, бүт Өзбекстанда байкалууда.

Өзбекстандык интернет колдонуучулардын бири арбидол аттуу дарыны февраль айында 35 миң сум же 3 долларга алганын, азыр анын баасы 50 долларга чыкканын жазды.

Өлкөдөгү дары таңкыстыгын өзбек президенти Шавкат Мирзиёев да моюнуна алып, өкмөткө дарынын запасын үч айга жеткидей кылып камдап коюуну буюрду.

"Канча каражат керек болсо беребиз. Бирок дарылар кымбаттап кетсе, элде нааразылык жаралат. Дагы бир жолу кайталайм, жогун алып келебиз. Ар кайсы райондо баа ар түрдүү экен. Ошондуктан дарылардын баасы бардык райондо бирдей болушуна көңүл бурушубуз керек".

Дагы караңыз

Коронавирустан үйдө дарылануунун ыкмалары

Өзбекстандын фармацевтика тармагын өнүктүрүү агенттигинин маалымат катчысы Кыздаркан Кожоева жакын арада дары маселеси боюнча кеңири маалымат берилерин, бардык маселелер ошондо чечилерин билдирди.

Ал арада өзбек президенти Шавкат Мирзиёев бир нече жооптуу кызматкерди кенебестиги үчүн тилдеди.

"Бул биринчи кезекте Ташкент шаарына жана Ташкент облусуна тиешелүү. Бул аймактардын жетекчилери абалга сүңгүп кирген эмес. Медициналык мекемелердеги реалдуу абал кандай экенинен кабарсыз. Элди өз убагында маалымат менен камсыздоого, өз убагында дарылоого, илдетти токтотуп калууга жооптуу экенин сезбей жатышат. Саламаттык сактоо министрлиги акыркы айда коронавирусту токтотуу стратегиясын одоно бузган. Дарылоо ыкмаларын абалга жараша өзгөрткөн эмес".

Мирзиёев ушинтип, борбор калаадагы жана Ташкент облусундагы бейтапканалардын алдындагы мобилдик топторду үч эсе көбөйтүүнү буйруду.

17-июнда Өзбекстандын өкмөт башчысы Абдулла Ариповдун катышуусу менен Коронавируска каршы күрөшүү боюнча атайын комиссиянын жыйыны өттү. Анда коронавирус жугузуп, үйүндө дарыланып жаткандарга дары-дармекти акысыз берүү чечими кабыл алынды.

Дагы караңыз

Тумоо маалында дары көздөн учту

Акысыз бериле турган дары-дармектердин тизмесинде гидроксихлороксин, азитромицин, парацетамол, С витамини жана бир жолу колдонулуучу медициналык беткаптар бар.

Өзбекстанда коронавирус илдетине кабылып, бирок оорусу жеңил өтүп жаткан адамдар дарыгердин сунушу менен үйүндө дарыланат.

Азырынча COVID-19 инфекциясын жуктуруп, бирок үйүндө дарыланып жаткан адамдардын саны тууралуу маалымат бериле элек.

Дүйнөлүк саламаттык сактоо уюмунун маалыматы боюнча Өзбекстанда 18-июлда 289 адам коронавируска чалдыкканы аныкталды. Бир киши оорудан көз жумду.

Өлкөдө вирус жуктургандардын жалпы саны 15 896 адамга жетти. Илдет жуктурган 80 адам көз жумду. 9003 адам оорудан сакайды.

Ал арада Өзбекстандын башкы прокуратурасы биринчи жарым жылдык ичинде 453 жооптуу кызматкерге карата кылмыш иши козголгонун жарыялады.

Маалыматка караганда алардын төртөө республикалык, 13ү облустук, калган 442си райондук жана шаардык деңгээлдеги кызматкерлер. Алар паракорлук, кызмат абалынан аша чапкандык жана шалаакылык беренелери боюнча айыпталууда. Маалыматта алар алты ай ичинде мамлекетке 17 миллион доллар зыян келтиргени, 11 миллион доллар кайра калыбына келтирилгени айтылган.