Экономика

Орусиядагы эң маанилүү экономикалык форумду ачуу менен президент Д.Медведев өлкөдө мамлекет тарабынан көзөмөлгө алынчу ишканалардын санын беш эсеге кыскартканын айтты. Ал бул боюнча жардыкка кол койгонун, эми 208 стратегиялык компаниядан 41 калаарын, бул атаандаштыкка жол ачаарын белгиледи.

Мунун баары өлкөнүн экономикасын мунайдан түшкөн кирешеге гана байлабай, ииновациялык ишканаларды өнүктүрүү максатында жасалып жатканын айтты.

“Инвесторлорго ыңгайлуу шарттарды түзүп берүү – биздин башкы милдетибиз, - деп айтты орус президенти. - Биз буга чейин деле ушундай аракеттерди көргөнбүз. Балким, дайыма эле ийгиликтүү болбосо керек. Бирок бүгүн аны негизги ишибиз кылып жатабыз”.

Модернизацияны өзүнүн президенттигиндеги башкы миссия катары атап жүргөн Медведев: “Биз Орусияны жаңылайбыз”, - деди.

Президент инвестиция фондун түзүү боюнча буйрук бергенин, ал жакка чет элдик инвестиция менен кошо мамлекеттик каражат да түшөөрүн, алар маанилүү долбоорлорду каржылоого колдонулаарын айтты.

Медведев инновациялык, жогорку технологияларга негизделген орус экономикасын курууда маалымат технологияларынын мааниси зор экенин, мамлекетте интернет колдонуучуларынын санын дээрлик 90% жеткирүү боюнча өтө “дымактуу пландары” бар экенин кыйытты.

“Маалымат технологиялары - демократиянын өнүгүшүнүн эң башкы багыттарынын бири”, - деди Медведев.

Ушул өңдүү өтө көптөн үмүт кылган пландарга кеңири токтолсо да, орус президенти өлкөдө бизнестин өнүгүшүнө башкы кедерги болуп жаткан коррупция, сот системасындагы проблемалар, ашыкча текшерүүлөр жөнүндө бир азга эле токтолгонсуду.

“Азаттыктын” орус редакциясынын кабарчыбыз Данила Гальперович үч күндүк форумдун ишин чагылдырууда. Ал Санкт-Петербургдагы экономикалык форумдун ишин эки дүлөйдүн маегине окшоштурат. “Чет-өлкөлүктөр орус өкмөтү менен бизнес өкүлдөрүнөн: “Силер качан өзүңөрдө мыйзамдарды аткарып, коррупцияны жоесуңар?”, - деп сурашат. Ага жооп иретинде орус аткаминерлери менен олигархтары, кудум, суроону укпагандай таризде баш ийкеп: “Ооба, бизге инвестиция алып келгиле. Биз даярбыз!”, - дешет”, - дейт кабарчы.

Форум жөнүндө сүйлөп жатып, орус экономикасынын 1990-жылдардагы реформасынын куруучуларынын бири Анатолий Чубайс: “Батыш эми Орусияны окута бергенин токтотушу керек”, - деди.

Анткен менен Кремлдин жактоочулары бул форумдан жакшы натыйжаны күтүшөт.

Облус аймагында турмуш мурдагы нугуна түшүүдө дегенге негиз бар. Өз ара сүйлөшүүлөрдөн кийин буга дейре жабык турган Жалал-Абад – Сузак жолу ачылды. Сузакта жергиликтүү тургундар өкмөттүк күчтөргө кошулуп коомдук тартипти сакташууда. Райондун Таш- Булак айылында элдешүү түлөөсү өттү. Жалал-Абадда кыймыл көбөйүп көчөлөр жандуу. Ар түрдүү улуттун өкүлдөрү базар – көчөлөрдө өз турмушу менен алек. Ош-Бишкек унаа жолу да ачык, ал комендантка баш ийген өкмөттүк аскерлердин көзөмөлүндө.

Ал арада Жалал-Абад шаар башчысы менен шаар прокурору маалымат жыйынын уюштурду. Анда калаанын азыркы абалы, кайрымдуулук жардамын бөлүштүрүү, качкындар маселеси жана апрель, май, июнь окуяларына тиешелүү кылмыш иштери тууралу сөз жүрдү. Шаар башчы Максат Жээнбеков бүгүн кооптонууга негиз жок экендигин ырастады. Анын билдиришинче, коопсуздукту тартип сакчылары, элдик кошуундан сырткары 1200 аскер камсыз кылууда.

Калабалуу окуялардан кийин Жалал-Абадга келген 36 тонна ун, 4 тоннадан ашык макарон, май-чай азыктары биринчи иретте үйү өрттөнгөндөр менен кароосуз адамдарга, согуш жана эмгек ардагерлерине, ооруканаларга таркатылууда. Чек арага жакын Сузак районунун Бек-Абад, Эркин жана Балта-Казы айылдарына болжолдуу түрдө 13300дөй топтолду деген качкын шаардыктар үйлөрүнө кайтууда.

Ушу тапта өткөн аптадагы баш аламандыкта өрттөлгөн турак-жай, мекеме-ишканалардын саны такталууда:

- 117 үй күйгөн. Тилекке каршы көп өзбек туугандар сыртка чыгып кеткенине байланыштуу Кыргызстан менен Өзбекстандын чек арасынын алдында отурушат, так аныктай албай атабыз үй кимге тиешелүү экенин. Ошондуктан мен суранат эле, ошол адамдар кайра келсе бизге, прокуратурага, өрт өчүрүүчүлөргө кайрылса болот. Кимдин үйү экенин аныктоо боюнча атайын комиссия түзүлгөн, комиссиянын негизинде материалдык, финансалык жардамдар болот эле.

Суроо-жооптордун басымдуу бөлүгү облустагы өзбек улуттук маданий борборунун президенти жана Жогорку Кеңештин мурдагы депутаты К. Батыровдун айланасында жүрдү. Кадыржан Батыровдун каякта экендиги тууралуу суроолорго анын үстүнөн кылмыш иши козголуп, өзү кармалбагандыгына байланыштуу айыбы сырттан угузулганы, сот тарабынан камакка алуу жөнүндө санкция берилгени, бирок азырынча кармала электиги, изделип жаткандыгы боюнча жооптор болду.