Линктер

ЧУКУЛ КАБАР!
29-Ноябрь, 2021 дүйшөмбү, Бишкек убактысы 23:34

Экономика

Алматыда тогуз кабаттуу имараттын жанынан аялдын жана анын эки баласынын сөөгү табылган.

23-ноябрда Алматыда 28 жаштагы келин үч баласы менен көп кабаттуу үйдөн боюн таштап көз жумду. Полиция балдардын улуусу алтыда, ортончусу беште, кичүүсү экиде экенин кабарлады.

Алматы полициясынын маалыматына караганда, үрөй учурган окуя шаардын Жетисуу кичи районунда болгон. Келин алгач балдарын тогузунчу кабаттагы балкондон түртүп ийип, кийин өзү да секирип каза болгон.

“Келин эки баласы менен окуя болгон жерден, дагы бирөө "Тез жардам" унаасында көз жумду ",- деп кабарлады Алматы полициясы.

Ушул эле көп кабаттуу үйдө жашаган Кулимхан Кронова кызы жерде кыймылсыз жаткан наристелерди, аялды көрүп, нес болуп калганын айтып берди.

"Кызым аялдын жерде жатканын, полиция жана башка адамдар басып жүргөнүн көрүптүр. Мен ал учурда ооруканада элем. Азыр эми наристелер көз жумганын угуп өзүмө келе албай турам. Өзүмдүн жети неберем бар, азыр нес болуп турам",- деди ал.

Коңшуларынын айтымында, балдарынын жана өзүнүн жанын кыйган келиндин күйөөсү бар. Бирок каргаша болгондо ал үйүндө болгон эмес. Алар 9-кабаттагы батирди ижарага алып турган. Каза болгон келиндин эки кызы жана эки жашар уулу бар эле.

"Ошол маалда бул үйдү жууп тазалаган аял ал келинге "эмне кылып жатасың, азыр полиция чакырам" деп кыйкырыптыр. Тазалыкчы 9-кабаттан таштанды ыргытып жатат деп ойлосо керек. Көрсө, келин балдарын балкондон ыргытып жаткан экен. Анан өзү секириптир. Үйдө отурган иним катуу бир нерсе жерге кулап түшкөнүн угуптур. Азыр элде жан бакканга каражат жок. Мындай окуялар көп катталат деп корком", - деди окуянын күбөсү Алексей "Азаттыктын" казак кызматынын кабарчысына.

Жергиликтүү бийлик окуя үй-бүлөлүк чырдан улам келип чыккан болушу мүмкүн деп билдирди. Үч баласынын өмүрүн кошо кыйып, жашоодон кечкен келин "чарчаганын, сыноого туруштук бере албагандыгын" жазып калтырган.

Милиция "өз жанын кыюу" беренеси менен кылмыш ишин козгоп, төрт кишинин өмүрү кыйылган каргашага эмне түрткү болгонун аныктоо үчүн тергөө тобу түзүлгөнүн билдирди.

Дүйнөлүк саламаттыкты сактоо уюмунун маалыматы боюнча Казакстан суицид эң көп катталган беш өлкөнүн катарына кирет.

Түркиянын президенти Режеп Тайып Эрдоган.

Өткөн аптада Түркиянын президенти Режеп Тайып Эрдоганга белекке берилген "Түрк дүйнөсүнүн" картасы боюнча Орусия жана Грекия реакция жасады.

17-октябрда Түркиянын "Улуттук кыймыл" партиясынын лидери Девлет Бахчели түрк президенти Режеп Тайып Эрдоганга Орусиянын 20га жакын аймагы жана Кытайдын бир бөлүгү кошо түшүрүлгөн "Түрк дүйнөсүнүн" картасын белек кылган.

Ал картага Түндүк Кавказ республикалары (Чеченстан, Ингушетия, Дагестан, Түндүк Осетия, Алания, Кабардин-Балкар, Карачай-Черкес жана Адыгей аймактары), Краснодар крайы, Ростов облусунун бир бөлүгү, Поволжье, Чыгыш Сибир жана Якутия кошулган.

Борбор Азиядан Тажикстандан башка мамлекеттер менен Кытайдын түндүк-батышындагы Шинжаң-Уйгур автоном округунун аймактары да түрк дүйнөсүнүн бир бөлүгү катары көрсөтүлгөн.

Ал эми дүйшөмбүдө орус президентинин басма сөз катчысы Дмитрий Песков бул белек боюнча комментарий берди. Кремлдин өкүлү түрк дүйнөсүнүн борбору Орусиянын аймагындагы Алтай экенин баса белгиледи.

Дмитрий Песков.
Дмитрий Песков.

"Түркиянын түрк биримдиги идеясын өнүктүрүп жатканы нормалдуу көрүнүш. Болгону түрк дүйнөсүнүн картасынын борборунда чоң кызыл жылдыз турбаганы өкүндүрөт. Ал борбор Түркияда эмес, Орусиянын аймагында Алтайда жайгашуусу керек. Бул ар бир түрк үчүн ыйык деп эсептелген жер, алар ушул жерде жаралган. Мен муну түрколог катары айтып жатам",-деди Песков.

Ал эми түркиялык серепчи, профессор Тугрул Исмаил РБК телеканалы менен болгон маегинде, бул эки саясий партиянын лидерлеринин кадимкидей эле жолугушуусу болгонун, карта болсо Түркиядагы мектептердин тарых сабагындагы сүрөт экенин эскертти.

"Бул карта Түркиядагы мектеп программасына кирген материал. Бул түрк тилдүү улуттардын жашаган аймагы экенин ар бир түрколог билсе керек. Мунун эч кандай саясий өңүтү жок. Тарыхый жана маданий тамырыбыз бир экенин баса белгилеген жөн гана карта деп ойлойм",-деген ал.

Ал арада Түркияга коңшу Грекиянын айрым басылмалары Эрдоганга берилген белектин башка өңүтүн жазып чыгышты.

"Эрдоган менен Бахчели Борбордук Азиядагы түрк тилдүү мамлекеттерди жана Түркия "сүргүндө" деп эсептеген мусулмандар жашаган айрым аймактарды камтыган "түрк дүйнөсүнүн" картасын тайсалдабай кармап, сүрөткө түшүштү",- деп сүрөттөйт грекиялык Greek Ci̇ty Ti̇mes басылмасы.

Ал эми президент Эрдоган чуулгандуу белек тууралуу азырынча комментарий бере элек.

Айрым эксперттер болсо Түркиянын Кавказ аймагындагы олуттуу ролу Азербайжан былтыр Тоолуу Карабакта жеңишке жеткенден кийин өскөнүн белгилешет.

Ошондой эле быйыл жазда өткөн Түрк тилдүү мамлекеттердин кызматташтык кеңешинин бейформал саммити Түркия Борбор Азиядагы мурдагы советтик жумурияттарга өзүнүн маданий жана экономикалык таасирин күчөтө баштады деген жоромолдорго жем таштаган.

Муну менен катар 12-ноябрда Стамбул шаарында Түрк кеңешине мүчө өлкө лидерлеринин сегизинчи саммитинде Түрк кеңешин мындан ары "Түрк мамлекеттер уюму" деп атоо чечими кабыл алынган.

Уюмга мүчө өлкөлөрдүн лидерлери "Түрк дүйнөсүнүн көз карашы – 2040" деп аталган стратегиялык документке да кол коюшкан. Бул документ түрк тилдүү мамлекеттер үчүн жакынкы 20 жылда "жол картасы" болору айтылды.

Дагы жүктөңүз

XS
SM
MD
LG