Линктер

жекшемби, 18-ноябрь, 2018 Бишкек убактысы 10:07

Күлкү кербени

Кагылышуудан кийин. Учакка тартылган азил сүрөт.

“Күлкү кербендин” кезектеги чыгарылышы Жаңы жыл майрамына байланыштуу азилдерден турат.

* * * * * * *

– Ит жылы иттей сонун болот экен, достор!

– Андай болсо бул жаңы жылды Кумайык жылы, Тайган жылы же Бөрүбасар жылы деп көтөрө чалып атабайлыбы?

* * * * * * *

–Урматтуу мекендештер! Ошентип жылды да жакшы аяктап жатабыз. Кана, журналисттерде суроолор барбы?

– Алдыдагы 2018-жыл – Ит жылы оор болот деп айтып жаткандар чынбы?

– Мунун бардыгы Батыштын жалаасы жана ушагы. Быйылкыдан оор жыл эми эч качан келбейт!

* * * * * * *

– Саламатсызбы! Дүкөнүңөр ачылаар замат бул керексиз товарды кайра алып келдим, өткөрүп алып, акчамды кайтаргыла!

– Опе-ей, бул балатыны сиз 31-декабрда эртең менен сүйүнүп алып кетпедиңиз беле? Бүгүн 5-январдын жүзү да!

– Кардар кызыкчылыктарын коргоочу мыйзамга ылайык, эгерде товар бүлүнбөгөн болсо, аны 10 күндө кайтарууга укугум бар!

* * * * * * *

– Ардактуу Аяз ата! Мен эми сиздин жок экендигиңизге акыркы он жылда дээрлик ишенип калдым. Ошондой болсо да ушул катты жазып коюуну чечтим. Атым - Шоңур. 1958-жылы туулганмын.

* * * * * * *

– Аяз Ата болуп иштеп калсам арманда болбос элем! 365 күндө бир жолу нөөмөткө туруп, анан жылы бою эс алат экен го!

* * * * * * *

Жаңы жылдык кечеде (корпоративде) чоңдорубуз “2018-жылга чөнтөгүңөр толо оптимизм менен кирип барасыңар!” деп жарыялашты эле, ишенчээк жаным “чын эле бүгүнкү кече үчүн чөнтөктөгү капчыгымдан эч нерсе кошпойт экенмин” деп сүйүнүп кетиптирмин.

* * * * * * *

– Аяз Ата! Мага конструктор оюнчугун алып бериңизчи-и!!!

– Эмнеге антип кыйкырып атасың? Шыбырасаң деле Аяз Ата угат да!..

– Ооба, ал угат ко, бирок ага суранычымды жеткирчү атакем кабинетин бекем жаап алган турбайбы, мени укпай калышы деле мүмкүн.

* * * * * * *

– Аяз Ата – өзүмдүн эле чоң атам экенин шектенип жүрөм. Атүгүл ал кебез сакал жабыштырганда деле көзү чоң атамдыкы бойдон калып атпайбы. Бир гана айран таң калганым – эмнеге ал чоочун балдарга жакшынакай оюнчуктарды, ал түгүл “Лего” оюнчугун же велосипед тартуулайт да, мага келгенде эң арзан момпосуй менен кутулат?

* * * * * * *

Баары-жоктун баарын билген караколдук балакай атасынан сурайт дейт:

– Атаке, дүйнөдөгү кайсы чана эң кеч келет, билесизби?

– Билбейм, айтсаң, уулум?

– Ал чана – сиз мага эки жыл мурда Аяз Ата аркылуу алдырам деген чана да.

* * * * * * *

– Кыздар, Аяз Ата кээде сараңдык кылып коёт экен!

– Кантип билдиң?

– Жакшы эле оюнчук сурасам, апам эки жыл мурда кампадагы эски сандыкка салып койгон куурчакты балатынын астына таштап кетиптир!

* * * * * * *

– Эмне үчүн Жаңы Жылды саат 24:00кө чейин уктабай отуруп тостуңар?

– Чын эле Жаңы Жылдын жаңы көз ирмемин шаттана тоскум келди, - деди оптимист.

– Ушул эски жыл кайра калып калбаса экен деп текшерүү үчүн күтүп отурдум, - деп пессимист жооп кайырды.

* * * * * * *

TT.

"Күлкү кербени" совет доорундагы орус азилдеринен дагы бирди сунуштайт.

Сөз алды. Советтик генерал Василий Чуйков (1900-1982) Сталинградды коргогон айтылуу 62-армиянын (кийин 8-гвардиялык армиянын) колбашчысы болгон. Анын армиясы маршал Георгий Жуковдун (1896-1974) жетекчилигиндеги Биринчи Белорус фронтунун курамында Берлинди алууга катышкан. Экинчи дүйнөлүк согуш аяктаган соң, Чуйков ташы өйдө карай өрдөгөн аскер башчы болгон.

Ал эми маршал Жуковдун беделинин өскөнүнө кызганыч кылган Иосиф Сталин 1946-жылдын жай мезгилинен тартып аны кысымга алган. Ал түгүл Жуков “талап-тоногуч” (мародёр) катары сынга алынып, акыры 1946-жылы июнда Одесса аскер аймагынын башчылыгына төмөндөтүлүп, 1948-жылдан тартып Урал аскер аймагынын башчысы болуп калган. Сталин 1953-жылы кайтыш болгон соң, маршал Жуков 1955-57-жылдары СССРдин Коргоо министри болгон, кийин кайра кызматтан алынып, ардагер болуп калган.

1955-жылы “маршал” даражасын алган Василий Чуйков болсо 1960-64-жылдары СССРдин Коргоо министринин орун басары болгон.

Ал эми анекдотко айланган окуянын жөнү мындай.

Генерал Чуйковдун эрке кызы Нелли 1928-жылы туулган. Ал Москва мамлекеттик университетинин (ММУ) тарых факультетинде окууну самап, документтерин тапшырат. Эрке кыздын кылганы ушул да, албетте, кирүү сынагынан “2” деген баага татыйт.

Анан эртеси күнү ММУнун алдында офицерлер жайнап туруп калышат. Баягы сынак алган окутуучуларды деканга чакырышат. Алар келсе, декандын кабинетинде андан тышкары Василий Чуйков жана башка генералдар да күтүп турушкан экен.

Сынак алган профессордон эмне үчүн Советтер Союзунун Баатырынын кызы сынактан кулап калганын кадырлуу коноктордун көзүнчө сурашат.

‑ А сиздер кандай суроо берилгенин билесиздерби?

‑ Жок. Кандай суроо болчу? – деп генерал Чуйков кайра сурайт.

‑ “Сталинградды коргоону кайсы аскер башчы жетектеген?” деп сурадык.

‑ Кызыктуу суроо экен. Анан ал эмне деп жооп берди? – деп Чуйков кызыгат.

‑ Анын жообун өзүңүз эле андан сурап көрүңүзчү.

Чуйков кызына бурулуп, “жообуң кандай болду эле?” дегендей сураса, тигил кыз кыска гана үн катат:

‑ Жуков...

Ошондо ачуусу мурдунун учуна келе түшкөн генерал кызына кыйкырган экен:

‑ Дачага жөнө! Барып пол жуугун! Экинчи ушул жакка кайра басып келгениңди көрбөйүн!

(Бул – советтик доордон калган анекдот. Анын чын-төгүнү белгисиз).

Кошумча маалымат. Жуков 1943-жылдын башында Ленинград багытындагы согуштук аракеттерди жалпы жетектеген.

Ал эми Сталинград фронтун өтө маанилүү мезгилде – 1942-жылдын августунан 1943-жылдын февралына чейин - генерал Андрей Иванович Ерёменко (украинче: Андрій Іванович Єрьоменко; 1892—1970) жетектеген болчу. Бул фронттогу 62-армияны жетектеген генерал Чуйков – Сталинградды түздөн-түз коргогон колбашчы болгон. Чуйков ошондо эле Советтер Союзунун Баатыры наамына көрсөтүлүп, орто жолдон бул сыйлык Биринчи даражадагы Суворов орденине өзгөртүлгөн. Чуйков эки жолу (1944, 1945) Советтер Союзунун Баатыры наамын алган.

Анын кызы Нелли (мурдагы ысымы Нинель) Чуйкова кийинчерээк мурдагы СССРдин Коргоо эл комиссары, маршал Семён Тимошенконун уулу Константинге (1930—2004) турмушка чыккан.

(TT)

Дагы жүктөңүз

XS
SM
MD
LG