Эксперт-талдоочулардын айтымында, Борбор Азиянын авторитардык режими үчүн кыйын кезең башталууда. Оболу Грузиядагы, андан соң Украинадагы бийликти алмаштырган элдик кыймылдар Борбор Азияга да жетти. Мунун өзү “тукаба ынкылабы” жакынкы мезгилде Борбор Азияда кайталанышы мүмкүнбү деген суроо жаратат.
Кубат Оторбаев, Прага 24-январда Алматыда оппозициядагы “Ак жол” демократиялык партиясынын теңтөрагасы Алихан Байменов пресс-конференция өткөрдү. Ал Мажилис депутаттыгынан баш тарткан мурдагы чечиминен кайтпай тургандыгын, бирок анын парламентке мүчө болбойм дегенине карабай Казакстандын Борбордук шайлоо комиссиясы аны депутат кылып каттап койгондугун айтып, Жогорку сотко кайрылаарын билдирди. Оппозиция өкүлү эмне үчүн депутаттык мандаттан баш тартып жатат?
Айнура Жекше кызы, Прага. Батыш постсоветтик Борбор Азияда Казакстан менен Кыргызстан демократиялык нукта өнүгөт деп үмүттөнгөн эле. Эки жумуриятта тең оппозициядагы саясий партиялар, эркин гезиттер пайда болгон. Эл нааразылык билдирип, көчөлөргө чыга алчу. Өткөн аптадагы окуялар бул кошуна өлкөлөрдөгү азыркы абал бири биринен канчалык айырмаланып тургандыгын даана көргөздү. Анын себептери жөнүндө Азаттыктын кабарчысы Брюс Панье Лондондук аналитик Бхавна Давэ айым менен маектешкен.
Замира Кожобаева, Бишкек. Кыргызстанда парламенттик шайлоо өтөөрү күтүлүп жаткан 27-февраль күнү коңшу Тажикстанда да парламенттик шайлоо болот. Тажикстандагы бейөкмөт уюмдардын өкүлдөрү, оппозициячыл саясатчылар жана байкоочулар шайлоо адилет өтөөрүнө ишенбегендиктерин билдирип жатат. «Тажикстандагы юридикалык консорциум» коомдук уюмунун жетекчиси Фаррухшо Жунайдов да ушундай пикирлерди колдоорун билдирип, «Азаттыкка» маек куруп берген. Анда кабарчыбыз Замира Кожобаеванын Фаррухшо мырза менен болгон маеги.
Айнура Жекше кызы, Прага. Казакстандын Алматы облусундагы Алмалы району, аты айтып тургандай даамдуу, мыкты алмасы менен бегилүү. Бирок соңку кездери жергиликтүү рынокту кошуна Кытайда өстүрүлгөн жер жемиш каптап, конкуренция өсүүдө. Эларалык Эмгек уюму казакстандык дыйкандарга жардам иретинде бир нече проектин ишке ашыра баштады.
Кубат Оторбаев, Прага Жаңы жыл алдында элге кайрылуусунда Түркмөнстандын президенти Сапармурат Ниязов 2004-жылы өлкөнүн ички дүң продуктысы 21 процентке өскөндүгүн сыймык менен айтты. Ал эми Эларалык валюта фонду декабрда жарыялаган документинде өткөн жылы Өзбекстандын экономикасы 7 процентке жакшырганын маалымдады. Бул көрсөткүчтөр өтө чоң өсүштү айтып турат. Бирок чындыгында эле кызыл камчы режимдер өкүм сүргөн бул мамлекеттерде ушундай майкөл-сүткөл болуп жатабы? Анда эмнеге карапайым калк катуу каржалууда?
Шайырбек Эркин уулу, Прага Келээрки айдын 27-февралында Кыргызстанда эле эмес, кошунаТажикстанда да парламенттик шайлоо өтөт. Бул Тажикстандагы атуулдук согуштан кийинки экинчи парламенттик шайлоо. Анда президент Имомали Рахмонов башында турган Тажикстандын Элдик-демократиялык партиясы жеңишке жетээри болжонууда. Өлкөдөгү оппозициялык саясатчылар менен байкоочулар азыркы шайлоо мурдагы шайлоолорго салыштырмалуу адилет жана калыс өтпөйт деп боолгошууда.
Кубат Оторбаев, Прага Орусиянын окумуштуулары Казакстандан ракеталардын учурулушу Байкоңур космодромуна жакын жашаган тургундардын саламаттыгына терс таасирин тийгизип жатат дешет. Азыр калың элдин катмарына жетпей, жашыруун сакталып аткан айрым маалыматтарга караганда Казакстандын Алтай облусунун аймагына – эл жашаган айылдардын тушунан асмандан адам өмүрүнө коркунучтуу күйүүчү майдын ашып калганын төгүп жиберишет. “Эркин Европа/Азаттык” радиосунун кабарчысы Дон Хиллдин маалыматы боюнча анын каскагынан аталган облуста айыккыс дартка чалдыккан адамдар жана көз жумган балдар көбөйүп баратат.
Баян Жумакадыр кызы, Прага. "Хьюман Райтс Уотч" уюмунун жылдык баяндамасында постсоветтик жумурияттардагы жагдайга кеңири орун берилген.
Төрөкул Дооров, Москва. Орусиянын президенти Владимир Путин шаршемби күнү Казакстанда бир күндүк иш-сапары менен болуп кайтты. Путин өзүнүн казакстандык кесиптеши Нурсултан Назарбаев менен эки өлкө ортосундагы кызматташтык, эл-аралык проблемалар тууралуу сүйлөшөөрүн билдирген.
Тажикстандын жараны, улуту боюнча өзбек Абдурахмон Ражабов өткөн жазда Американын Гуантанамо базасындагы аскердик абактан бошонуп чыккан. Жакында ал журналисттерге аскерий түрмөдө отурганда психологиялык кысымга кабылып, саламаттыгы бир топ начарлаганын айтып берди.
Кубат Оторбаев, Прага 1-январдан тартып Евразия экономикалык шериктештигине кирген мамлекеттер – Белорус, Казакстан, Кыргызстан, Тажикстан жана Орусиянын жарандары бир өлкөдөн экинчисине барыш үчүн чегарада эларалык паспорт көргөзүүгө тийиш. Мындай жаңы эреже азыр күнүмдүк көр оокаттын айынан Орусияда иштеп жүргөн Тажикстандык жүз миңдеген эмгек мигранттарынын жашоосун татаалдатат. Анткени алардын дээрлик 90 процентинин андай эларалык паспорттору жок.
Дагы жүктөңүз
