Кубанычбек Жолдошов, Ош Фергана өрөөнүндөгү ири соода бирикмелеринин бири Карасуу базарында жергиликтүү ишкерлер чет элдик соодагерлердин чыгып кетүүсүн талап кылган митинг өткөрүштү. Анда алар бул жерде иштеп жатышкан чет элдиктер ата мекендик ишкердиктин өнүгүшүнүн жолун бууп жатышат деп айыпташты. Мындан сырткары митингдин жүрүшүндө анын катышуучулары Кытайлык демографиялык экспансия коркунучунун алдын алуу жагдайларын да айтышып, бийликке кайрылуу кабыл алышты.
Биринчи вице-премьер-министрдин милдетин аткаруучу Данияр Үсөнов, Жогорку Кеңештин депутаты Болот Шерниязов Талас районундагы Көпүрөбазар айылына барып, “Андаш” алтын кен казуучу компаниясынын чатактары боюнча эл менен жолугушту. Болот Шерниязов аталган компаниянын иштешине каршы экенин билдирди. Канчалык талаш-тартыш болгону менен “Андаш” алтын кенин иштетүү тууралуу маселе ачык бойдон жыйынтыксыз калды.
Жогорку Кеңеш 30-январда алкоголдук ичимдиктер жана спиртти өндүрүү, сатуу боюнча мамлекеттик агенттиктин ишине байланыштуу мыйзамды кароодон баш тартты. Айрым депутаттар аталган агенттикте коррупциялык көрүнүштөр орун алгандыгын белгилешип, мыйзамды кароону өкмөттүн жаңы структурасы бекитилгенден кийинкиге калтырууну сунушташты. Депутаттардын айтуусу боюнча учурда Кыргызстанда алкоголдук ичимдиктердин 80% көмүскөдө өндүрүлөт.
27-январда Бишкекте кыргыз ишкерлеринин үчүнчү курултайы болду. Ага президент баш болгон бийлик өкүлдөрү, ишкерлер катышып, ишкерлерге колдоо көрсөтүү, өндүрүштү көтөрүү маселелери талкууланды. Жыйында президент жаңы өкмөттүн курамы, структурасы боюнча айрым ойлорду ачыктады.
Швецариянын Алпы тоосунун койдундагы бул курорттун калкынын саны жылыга ушул маалда төрттөн бирине көбөйөт. Бирок коноктор – лыжа тепкени келген туристтер эмес. Алар Давос курортундагы дүйнөдөгү эң бир таасирлүү адамдардын, анын ичинде бизнес лидерлери менен мамлекет башчыларынын Дүйнөлүк Экономикалык форумуна келгендер. Быйыл Давостун күн тартибинде бизнес жана саясат дүйнөсүндөгү өзгөрүүлөр менен катар, климаттын өзгөрүшү үстөмдүк кылууда.
Карабалта тоокен комбинатынын директорунун кеңешчиси Жалгап Казакбаев, тоокен комбинатынын тегерегиндеги маселелер боюнча “Азаттык” менен ой-пикир бөлүшөт.
Жаңы жыл алдында президент кол койгон жарлыкка ылайык, 2007-жылы дарыгерлердин, мугалимдердин, маданият жана илимий кызматкерлердин айлык акылары 30 пайызга, ал эми Ички иштер министрлиги менен жаза аткаруучу тармакта иштеген кызматкерлердин айлык акылары 50% көбөйтүлдү. Каржы жана экономика министрлигинин маалыматы боюнча быйылкы орточо айлык 2005-жылкы орточо айлык акыдан 2,5 эсеге өстү. Ал эми айрым адистер 2005-жылдан бери инфляция дагы эки эседен ашуун өскөндүгүн айтышууда.
Кыргызстан жылына 14 миллиард киловат сааттын тегерегинде электр энергиясын өндүрөт. Анткен менен тармактын квазифискал таңкыстыгы 8 миллиард сомдон түшпөй келатат. Кыргызстанда кышкысын электр энергиясын өчүрүп коюу, уурдоо-тоноолор токтоло элек.
Бүгүн HIPC программасына каршы кыймылдардын өкүлдөрү өкмөт аталган программага кирүүдөн баш тартпаса, өлкө аймагында ар кандай нааразылык иш чаралар өткөрүлөрүн билдиришти. Ошондой эле кыргыз бийлиги HIPC программасы боюнча коомчулукка бир жактуу маалымат берип, анын терс жактарын жашырып-жаап жатышканы баса белгиленди. Экономика жана каржы министринин милдетин аткаруучу Акылбек Жапаров болсо Кыргызстандын HIPC программасына кирээр-кирбеси март айында чечилерин ушул эле күнү маалымат жыйынында билдирди.
Парламент өкмөттүн 2005-жылкы бюджетинин аткарылышы тууралуу мыйзам долбоорун өткөргөн жок. Айрым депутаттар өлкөнүн негизги экономикалык документинде белгиленген тапшырмалар так аткарылбай, бюджеттик акчалардын биртобу мыйзамсыз пайдаланылган дешет. Эки жылдан бери Кыргызстан экономикалык кескин өнүгө албай, өкмөт парламенттин катаал сынына туш келүүдө.
АКШдагы аналитикалык Мурас фондусу (The Heritage Foundation) менен “Уолл Стрит Жорнэл” (‘The Wall Street Journal”) гезити былтыркы жылдын жыйынтыктарына таянып, дүйнөлүк экономикалык эркиндиктин жадыбалын жарыялады. Документте 157 өлкөдөгү экономикалык эркиндиктин абалы он көрсөткүчтүн, анын ичинде менчик укугу жана салык өлчөмдөрүнүн негизинде бааланат. Изилдөөгө ылайык, Гонконг, Сингапур жана Австралия дүйнөдөгү эң эркин экономикалык система деп аталган. Дүйнөдөгү 20дай эркин экономикалык системада Европага 12-орун тийген. “Азаттыктын” кабарчысы Никола Крастев Мурас фондусунун эксперти Даниэлла Маркхеймге кайрылып, индекстерди аныктоонун айрым усулдарына кызыкты.
Дагы жүктөңүз
