Линктер

шаршемби, 17-июль, 2019 Бишкек убактысы 04:58

Жаңылыктар

Декабрда энергетикалык ишканалар сатыкка коюлат

“Түндүк электр” акционердик коому, Жалал-Абад, Ош, "Чыгыш электр" акционердик коомдору 27-декабрда сатыкка коюлат. Бул туурасында “Азаттыкка” Коммунисттер фракциясынын депутаты Анаш Сейитказиев билдирди. Анын айтымында, бул акционердик коомдордун сатылышы тендер боюнча жүргүзүлүшү керек эле. “Тендерге чет элдик гана компаниялардын катышуусуна шарт түзүлүп, “Түндүк электр” акционердик коомунун баасы айтылбай жатат. Эл өзү акча чогултуп, компаниялардын акцияларын сатып алып, өзү ээлик кылганга Мүлк министрлиги шарт түзүп берген жок”,-деп айтты депутат.

Өлүм жазасын киргизүүгө каршы акциялар улантылат

Бул туурасында “Мен ишенбейм” жаштар кыймылынын мүчөсү Гүлшайыр Абдирасулова “Азаттыкка” билдирди. Анын айтымында Орусия өлүм жазасын кабыл албай койду. Ошондуктан жаштар Кыргызстандын депутаттары тарабынан да бул маселе кайра дыкаттык менен караларына жана өлүм жазасы кабыл алынбасына үмүт артаарын билдирүүдө. Кечээ Жаштар укук коргоо тармагы өкмөт үйүнүн алдына өлүм жазасынын киргизилишине каршы “Биз жашоо укугу үчүн ” аттуу акция уюштурушкан. Алар кыргызстандыктарды өлүм жазасын киргизүүгө каршы турууга чакырышкан. Акция учурунда милиция кызматкерлери келип, акция митингдерди өткөрүү жайы Темир жол сейил багына которулганын айтып, аларга “кетип калгыла” деп эскертүү беришкен.

Кыргызстанда чочко тумоосуна чалдыккандардын саны 61ге жетти

Эпидемиолог Зуридин Нурматовдун “Азаттыкка” билдиришинче, алардын басымдуу бөлүгү убагында көрүлгөн чаралардын натыйжасында айыгып кетти. Учурда 5 адам дарыланып, эки-үч күндө ооруканадан чыгарылат. Зуридин Нурматовдун билдиришинче, учурда Кыргызстанда Дүйнөлүк саламаттыкты сактоо уюмунан бөлүнчү чочко тумоосуна каршы вакцинаны күтүп жатат. Вакциналар декабрь айынын аягында келип калышы күтүлүүдө. Бул жаңы илдетке туруштук берүү үчүн адамдарда иммунитет жок болгондуктан, эмдөө иштери январь айынан апрель айына чейин жүргүзүлө бермекчи. Мындан тышкары жакынкы күндөрдө Кытайдан Кыргызстанга тумоодон сактануучу миллион даана бет кап келди. Адистин билдиришинче, бүгүнкү күндө чочко тумоосунун жеңил түрү менен ооругандар катталды. Илдеттин оор формасына кабылгандар болгон жок.

Кыргызстанда гендердик зомбулукка каршы акция болот

Кризистик борборлордун ассоциациясынын аткаруучу деректири Чынара Термечикованын билдиришинче, мындай акция бүткүл дүйнө жүзүндө 1991-жылдан бери, ал эми Кыргызстанда акыркы 15 жылдын ичинде өткөрүлүп келүүдө. Зомбулукка каршы 16 күндүк акция буга чейин өкмөттүк эмес уюмдар, кризистик борборлор тарабынан өткөрүлүп келсе, жакындан бери мамлекеттик уюмдар да тартылууда.
Бириккен улуттар уюмунун Башкы ассамблеясы тарабынан 25-ноябрь Аялдарга карата зомбулукту жоюу үчүн күрөштүн эл аралык күнү деп белгиленген. Ал эми 10-декабрь - Адам укуктарынын күнү. Дал ушул 25-ноябрдан 10-декабрга чейин 16 күн аралыгында гендердик зомбулукка каршы акция өтүп келет.

“Жоготуу" фильми Дубайдагы эл аралык кинофестивалга катышат

Нурлан Асанбековдун "Жоготуу" кыска метраждуу фильми 9-16-декабда Дубайда өтчү алтынчы эл аралык кинофестивалга катышат. Кыргызстандагы кызматташтык боюнча Швейцария бюросунунан билдиришкендей, "Жоготуу" фильми өткөн жылы Кызматташтык боюнча Швейцария бюросунун Искусство жана маданиятты колдоо программасынын "Кыргызстандагы кинону колдоо" долбоору тарабынан каржыланган. Ал фестивалдын кыска метраждуу фильмдердин сынактык программасына киргизилген.

Евробиримдиктеги жаңы дайындоолор ар кыл бааланууда

Европа Биримдигине кирген өлкөлөрдүн лидерлери Брюсселдеги кечээги жыйынында анча белгисиз саясатчыларды уюмдун жаңы түзүлгөн эки башкы кызматына шайлашкан эле. Атап айтканда Бельгиянын премьер министри Херман Ван Ромпөй Биримдиктин биринчи президенттигине, ал эми буга чейин Биримдикте соода коммиссары болгон, өзү британиялык Кэтрин Эштон тышкы иштер министрлигине дайындалды.

Бул дайындоолорду комментарийлеп, Еврокомиссиянын президенти Жозе Мануэл Баррозо Биримдиктин жетекчилиги үчүн “мындан жакшыраак тандоого токтолуу мүмкүн болбогонун” белгиледи. Немис канцлери Ангела Меркел жаңы дайындоолор мунаса чечим экендигине токтолду:

- Бул мунаса чечим жана ал Европада мен үчүн өтө маанилүү принципти орнотту. Түрлүү пикирлерди жана көз караштарды эске алганда, мунаса издөө акыр аягында илгери жылдыруучу күч болду.

Ал эми британ премьери Гордон Браун мекендеши Кэтрин Эштондун Евробиримдиктин тышкы иштер министрлигине дайындалуусун Британияга карата дурус мамиленин белгиси катары баалады. Француз президенти Николя Саркози президенттикке келген Херман Ван Ромпөйдү “чечкиндүү” инсан ирээтинде мүнөздөдү.

Иран өзөктүк отун боюнча сунушка соңку жообун бере элек.

Бул тууралу бүгүн МАГАТЭнин башчысы Мохамед эл-Барадейи билдирди. Ал бүгүн Берлинде жүргөн жеринен айтканына караганда, ал Иран менен өзөктүк отунду байытууну караган келишим жыл аягына чейин түзүлөрүнө үмүттөнөт. БУУнун ортомчулугу астында өткөн сүйлөшүүлөрдө Иранга өзөктүк отун катары пайдалануучу уранын өлкө аймагынан тышкары жакта байытууну караган келишим долбоору сунуш кылынган. Бирок Иран азырынча ал планга акыркы, жазуу жүзүндөгү жообун бере элек. МАГАТЭнин башчысы бүгүн Иранды сейрек кездешүүчү мүмкүнчүлүктү колдон чыгарбоого чакыруу менен мындай деди:

-Биз сунушубузга Орусия, АКШ, Франциядан оң жооп алдык. Алар жардам берүүгө даяр жана бул, менин көз карашымда, санкциялар менен каршылашуудан өз ара ишеним кырдаалын жаратуу жараянына өтүүнүн уникалдуу мүмкүнчүлүгү.

Ирандын уранын сыртта байытууну караган келишим Батыш өлкөлөрүнүн Тегеран өзөктүк программасына жамынып алып өзөктүк курал жасап жатат деген тынчыздануусун басаңдатууну көздөйт. Иран мындай айыптарды четке кагып келүүдө. Өлкөнүн тышкы иштер министри Манчекир Моттакинин ушул аптадагы билдирүүсүнө караганда, алар кошумча сүйлөшүүлөргө даяр жана уранды өзөктүк отунга алмаштыруу боюнча сунуштарды да карайт.

БУУнун Коопсуздук кеңешинин беш туруктуу мүчөсү менен Германиянын өкүлдөрү учурдагы кырдаалды талкуулоо үчүн бүгүн Брюсселде жолукту.

СДП фракциясы түшүндүрмө берди

Парламенттин 70 жылдык мааракесине эмнеге катышпагынын негиздеп Жогорку Кеңештеги социал-демократтар фракциясы бүгүн билдирүү таратты. Анда Социал-демократтар партиясы БЭКтин парламенттин 70 жылдык мааракесине байланыштуу кайрылуусун колдоого алаарын жарыялаган. Билдирүүдө СДП фракциясынын депутаттары өз электораттарынын кызыкчылыктарын коргойм деп саясий куугунтуктарга кабылып жатканын белгиленген. Анда эки жыл ичинде эле социал-демократтардан парламенттеги 11 депутат ичинен сегиз адам басым астында фракциядан сүрүлүп чыгарылганы, бир депутат киши колдуу болуп (Р. Шаботоев), экөө (К. Кадыров, Б. Бешимов) саясий качкынга айланып, четтен башпаанек издеп жүргөнү айтылат. Ошондой эле фракция бүгүнкү кайрылуусунда отун-сууга болгон баанын көтөрүлүшүнөн кийин эми турак жайга болгон салык ишке кирээрин, күнүмдүк жашоодо керектелүүчү товарлардын кымбатташы күтүлөөрүн белгилейт. СДП Жогорку Кеңеште бийликтин партиясы эсеби жок кожоюнчулук кылууда, мына ушундай шартта фракция парламенттин 70 жылдык мааракесине катышуудан баш тартты деп түшүндүрөт. (EK)

К.Мамбеталиеванын элесине арналган иш чара

Бүгүн (20-ноябрда) Жусуп Баласагын атындагы Улуттук университетте антропологиялык изилдөө борбору менен К.Мамбеталиева атындагы кор уюштурган “Борбор Азиядагы этносоциалдык жана этномаданий жараяндар: Тарых жана азыркы замана” деген аталыштагы илимий жыйын өз ишин баштады. Маркум окумуштуу-этнолог, педагог Какен Мамбеталиеванын жаркын элесине арналган бул иш чарага Казакстан, Орусия мамлекеттеринен жана Кыргызстандын айрым аймактарынан белгилүү этнографтар, тарыхчылар жана башка илимпоздор чакырылган. (AJ)

Орус өкмөт башчысы Европа газсыз калбасына ишендирүүдө

Владимир Путиндин соңку билдирүүсүнө караганда, учурда Украина менен түзүлгөн келишимдер Европа көгүлтүр от менен үзгүлтүксүз камсыздалышын кепилдейт жана ал Жаңы жыл газ көйгөйүсүз тосуларына үмүттөнөт. Орус өкмөт башчысы бул тууралуу кечээ Ялтада украин кесиптеши Юлия Тимошенко менен кездешкен соң айтты. Путиндин сөздөрүнө караганда, газ келишимдери келерки жыл үчүн Украинадагы экономикалык кризисти эске алуу менен кайра каралат. Ошондой эле Украина учурдагы келишимдерде көргөзүлгөн көлөмдөн аз газ алса, ага каршы айып салынбайт.

Украина менен Орусиянын газ баасына байланышкан чатагынан улам быйыл кышта Европага келген газ басымы кыйлага азайып, айрым өлкөлөргө атүгүл көгүлтүр от жетпей да калган. Ушул айдын башында Путин эгер Украина акчаны өз учурунда төлөбөсө, берилген газдын өлчөмү кыскартыларын кайрадан эскерткен эле. Кечээги сүйлөшүүлөрдө Тимошенко экономикалык кризис кыйынчылыктарды жаратканын моюнга алганы менен Украина газ үчүн өз учурунда жана толугу менен төлөөрүн убада кылды.

Б.Бешимов: АКШ Борбор Азияга ынтаасын бурат

Бул тууралуу Америка кошмо штаттарында жүргөн белгилүү саясатчы Бакыт Бешимов “Азаттыкка” электрондук почтасы аркылуу жолдогон катта билдирди. Анын айтымында, 18-ноябрда АКШнын конгрессинде Борбор Азия боюнча кеңешме болуп, анда Борбор Азиядагы энергетикалык ресурстар, саясий абал, Ооганстандагы кырдаал кызуу талкууланган. Адисттер Борбор Азияда авторитардык режимдин сакталышы элдин өнүгүүсүнө тоскоолдук кылып, террорчулук менен диний экстремизмге түрткү болуп жатканын белгилешкен. АКШнын мамлекеттик департаменти Борбор Азиядагы ар бир мамлекетте саясат, коопсуздук, маң заттарына жана террорчулукка каршы күрөшүү, мыйзамдын үстөмдүк кылуусу, адам укуктары, жарандык уюмдарга мамиле, экономикалык өнүгүүлөр жөнүндө жылыга эки тараптуу консультацияларды күчөтүүнү ниеттенүүдө, деп жазылган катта. (AJ)

КМШнын өкмөт башчылары Ялтада жыйын курууда

Украинанын Кара деңиз жээгиндеги Ялта курортунда өтүүчү бүгүнкү жыйынында КМШнын өкмөт башчылары соода маселелерин, экономикалык кризиске каршы күрөшүү боюнча биргелшкен чараларды талкуулары күтүлүүдө. КМШга азыр 11 өлкө мүчө. Грузия былтыр августа Орусия менен болгон согуштан кийин уюмдан чыкты.

Ооганстанда жанкечтинин бүгүнкү чабуулунан 12 адам каза тапты

Полициянын маалыматына караганда, өлкөнүн түштүк батышындагы Фарах деген шаарда мотоцикл айдаган жанкечти өзүн эл котологон жерде жардырганда, кеминде 12 киши каза тапкандан тышкары 35 адам жаракат алды. Фарах - Ооганстандын Иран менен чектешкен провинциясы. Бул аралыкта Ооганстанга коңшу Пакистандын Пешевар шаарында бүгүн жол боюнда көмүлгөн бомба жарылуусунан 3 адам каза таап, 6 киши жаракат алды. Кечээ эле бул жерден жанкечтинин жардыруусунан 18 киши мерт болгон. Ушул айдын ичинде эле Пакистанда жанкечтилер жасаган сегиз жардыруунун алтоосу Пешеварда орун алды. Алардан 110 кишинин өмүрү кыйылды.

Нурада кайрадан жер силкинди

Алай районундагы Нура айылында бүгүн жер титиреди. Бул тууралуу Өзгөчө Кырдаалдар министрлиниен билдиришти. 20-ноябрда, саат 12.00дөр чамасында 4 баллдык күч менен болгон жер титирөөдөн курман болгондор жок экени кабарланып жатат. Зилзаланын очогу Нура айылынан түштүк –чыгышты карай 55 км. алыстыктагы Суфи-Курган деген жерге туура келген. (EK)

ЮНИСЕФтин «Дүйнөдөгү балдар абалы» баяндамасы жарык көрдү

Балдар укуктары тууралуу Конвенциясынын кабыл алынышынын 20-жылдыгына карата ЮНИСЕФтин «Дүйнөдөгү балдар абалы» баяндамасы жарык көрдү. Баяндамада дүйнөдөгү балдар укуктарынын абалы тууралуу өкмөттүк жана көз карандысыз адистердин макалалары камтылган. Мындан тышкары анда 20 жылдан кийинки абалга да божомол берилип, балдар укуктарын коргоо жаатында сунуштар камтылат. Баяндамага ылайык дүйнөдө барган сайын балдардын билимге болгон укуктары жөнгө салынып, мектеп жашындагы балдардын 84 пайызы орто билим алган жетишти. Беш жашка чейинки балдар арасында өлүм 12, 5 млн-го кыскарды. Кыздарды эртелеп күйөөгө берүү дүйнөдө жалпысынан кыскаруу нугуна баратат. Ушу күндөрү Балдар укуктары тууралуу Конвенциясынын кабыл алынышынын 20-жылдыгына карата дүйнөнүн ар кыл өлкөлөрүндө 160дан ашык иш-чаралар өтүп жатат. ЮНИСЕФтин Кыргызстандагы өкулчүлүгүнүн калк менен байланышуу координатору Ольга Гребенникованын айтымында баяндамада Кыргызстандагы балдар тууралуу эчтеке айтылган эмес. (EK)

БУУнун балдар укугу боюнча конвенциясы кабыл алынганына 20 жыл толду

Бул маанилүү документтин кабыл алынганынын жыйырма жылдыгын утурлай жасаган билдирүүсүндө Улуттар уюму дүйнө өлкөлөрүн азыр да тамак-аштын тартыштыгынан, турак –жай менен таза суунун жоктугунан жапа чегип келе жаткан бир миллиарддай жаш балага жардам көргөзүүгө чакырды. БУУнун Балдар укуктары боюнча 1989-жылы кабыл алынган конвенциясы адам укуктары боюнча келишимдер арасынан эң көп колдоо тапкан документ. Азыркыга чейин 193 мамлекет тарабынан ратификацияланган. Колдоосун АКШ менен Сомали гана көргөзө элек. БУУнун балдар уюму – ЮНИСЕФтин эсебинде, конвенция балдар өлүмүн кыйлага кыскартты, мектепке келген балдардын санын бир топко көбөйттү.

Жаш укук коргоочулар өкмөт үйүнүн алдында акция уюуштурушту

Жаштардын укук коргоо желеси өлүм жазасын кайра киргизүү маселесине каршылык билдирип өкмөт үйүнүн алдында бүгүн акция уюштурду. Бул тууралуу жаш укук коргоочу Гүлшайыр Абдирасулова "Азаттыкка" билдирди. Анын айтымында акция катышуучулары «Биз жашоо укугу үчүн » жазуусу бар баракчалары менен Ак үйдүн алдына чыгып, өлүм жазасын кайра киргизүү демилгесине каршы маанайын билдиришти. Болгону он мүнөткө созулган акция учурунда милиция кызматкерлери келип укук коргоочуларга эскертүү берүүгө жетишишкен. Иш-чарага «Мен ишенбейм» жаштар кыймылынын өкүлдөрү жана Акыйкатчы алдындагы укук коргоочулар кеңешинен өкүлдөрү катышкан. (EK)

Жогорку Кеңештин 70 жылдыгы белгиленди

Улуттук филармонияда өткөн кыргыз парламентинин 70 жылдык мааракесине арналган салтанатта төрага Айтибай Тагаев сөз сүйлөп, анда парламенттин соңку 70 жыл ичиндеги иштерине токтолуп, эгемендүү мамлекетти куруудагы албан ийгиликтерине токтолуп, парламент толук кандуу мыйзам чыгарууга жетишкен бийликтин бир бутагын түзгөнүн белгиледи.

Президент Курманбек Бакиев маараке менен парламентарийлерди куттуктап, жарлыгы менен биркатар аргандай чакырылыштагы депутаттарга мамлекеттик жогорку сыйлыктарды тапшырды.

Өлкө башчысынын жарлыгына ылайык Жогорку Кеңеш депутаты, белгилүү дарыгер Эрнаст Акрамов «Кыргыз Республикасынын Эл Баатыры» деген ардактуу наам жана «Ак Шумкар» өзгөчө белгиси менен сыйланды. Ошондой эле, Медеткан Шеримкулов, Мар Байджиев, Чолпон Баекова II даражадагы «Манас» ордени, Женишбек Бекболотов, Жусуп Иманалиев, Лейла Сыдыкова, Азизбек Турсунбаев «Даңк» медалы, депутат Гулнара Дербишева «Эне Даңк» медалы менен сыйланды.

Депутат Рашид Тагаев «Кыргыз Республикасынын эмгек сиңирген юристи», Искандербек Гаипкулов, Кубанычбек Исабеков, Аскарбек Шадиев «Кыргыз Республикасынын эмгек сиңирген экономисти» наамын алышты. Ошондой эле, депутаттар Бүмайрам Мамасейитова менен Аскар Салымбеков «Кыргыз Республикасынын эмгек сиңирген жергиликтүү өз алдынча башкаруу кызматкери», Раиса Сидоренко «Кыргыз Республикасынын эмгек сиңирген айыл чарба кызматкери», Осмонбек Артыкбаев менен Нарынбек Молдобаев «Кыргыз Республикасынын эмгек сиңирген куруучусу», Улугбек Ормонов «Кыргыз Республикасынын эмгек сиңирген өнөр жай кызматкери» ардактуу наамдарына ээ болушту.

Андан сырткары, Кыргыз Республикасынын Адак грамоталары депутаттар Арзыбек Буркановго, Зиядин Жамалдиновго, Алтынбек Сулаймановго берилди. Ошондой эле, депутат Хаджимурат Коркмазовго милициянын генерал-майору атайын наамына арзыды. Ал эми Кыргыз ССРинин бирнече чакырылыштарына депутат болгон Керимкул Карабаевге ВАЗ-22-74 автомашинасы тапшырылып, ошону менен бирге ал Кыргыз Республикасынын Адак грамотасы менен да сыйланды. Бул тууралуу Жогорку Кеңештин басма сөз кызматынан билдиришти. (AJ)

Аба ырайы

Гидрометеролгия борборунун маалымдаганына караганда, эртең 21-ноябрда Кыргызстанда жаан-чачын болбойт. Ош, Жалал-Абад облустарынын айрым жерлеринде жаан жаашы ыктымал. Чыгыштан соккон желдин ылдамдыгы секундасына 5-10 метрге жетет.

Абанын температурасы:

Ош, Жалал-Абад дубандарында түнкүсүн -1....+4; күндүзү +11....+16 даража.
Баткен чөлкөмүндө түнкүсүн 0...+5; күндүзү +10....+15 даража.
Ысык-Көл облусунда түнкүсүн 0....-5; кундүзү +5....+10 даража.
Нарын жергесинде түнкүсүн -6....-11; күндүзү +3....+8 даража.
Чүй облусунда түнкүсүн +3…+8; күндүзү +10....+15 даража.
Талас өрөөнүндө түнкүсүн -2....-7; күндүзү +9....+14 даража.

Борбор калаабыз Бишкекте жаан жаабайт. Чыгыштан ылдамдыгы секундасына 5-10 метрге жеткен жел согот. Абанын температурасы: түнкүсүн +3...+5; күндүз +13...+15 даража жылуу болот.

Малайзияда билим алуунун жолдору тууралуу көргөзмө өтүүдө

Бишкекте Малайзияда билим алуу программалары тууралуу маалымат берген атайын көрөзмө өтүп жатат. «Хайятт» мейманканасында өтүп жаткан бул иш-чарага Технологиялар жана инновациялар боюнча Азия-Тынч океан университети демилгечилик кылууда. 20-21-ноябрь күндөрү өтүп жаткан көргөзмө маалында дүйнөдөгү ири компанияларга кантип ишке орношуу керектиги тууралуу да маалыматтар берилмекчи. Технологиялар жана инновациялар боюнча Азия-Тынч океан университети Түштүк-Чыгыш Азиядагы алгылыктуу жогорку окуу жайларынын бири катары таанымал. (EK)

Н.Түлеев: Ататүрктө курулган үй ээлери сотто утушту

Бишкек шаарынын башчысы Нариман Түлеев Ататүрк сейил багында курулган турак жайлардын ээлери соттон шаар башчылыгы кабыл албаган 412-делген токтомго негизденип утуп алышканын белгиледи. Жаңы ачылган жагдайларга деп ачылган соттук териштирүүдө сейил бактын ичине үй салгандарга уруксат берген токтомду шаар башчылыгы кабыл алган эмес. Шаардагы жок токтомго таянып эки жүзгө жакын адам жер ээлигинин кызыл китебин алышка үлгүргөн. Нариман Түлеев жер маселеси боюнча кызыл кулактык кылгандарга каршы кылмыш иши козголгонун маалымдады. (AJ)

Мэр “Баш калааны жаңылоо” программасын жарыялады

Бишкек шаар башчысы Нариман Түлеев үч жарым жылга эсептелген “Баш калааны жаңылоо” программасы 7 кадамдан турарын билдирди. Анда шаардагы ар бир көчө, үйлөргө чейин эсепке алынып, оңдо-түзөөлөр, жаңыртуулар болоорун айтты. Шаар башчысынын ырасташынча 57 чакырым жаңы жол салынат. Калаанын түштүк тарабынан өтүүчү авто жол чыгышынан Алма-Ата көчөсүнө, батышынан Бах көчөсүнөн өтүп узартылат. Ошондой эле турак үйлөрдүн жана мекемелердин алды жаңыртылып, мектептер, бала-бакчалар курулат. (AJ)

Н.Түлеев:Бишкекте 18 миң адамга субсидия берилет

2010-жылы электрге жана жылуулукка тарифтердин көтөрүлүшүнө байланыштуу бишкектиктерге мамлекет тарабынан жардамга 500 млн. сом бөлүнөт. Бул тууралуу мэр Нариман Түлеев бүгүн маалымат жыйынында билдирди. Анын айтымында, жалпы жонунан 11 категориядагы жеңилдиктер берилүүчү жана жардамга муктаж адамдардын саны 18 миңге чукул. Учурда Бишкек мэриясы 12 миллион сом өлчөмүндө 3 миң 200 үй-бүлөгө таш көмүр алып берип, 221 үй-бүлөгө газ төлөмдөрү менен камсыз кылган. Шаар башчы 12-ноябрда Өкмөттүн кеңейтилген кеңешмесинде электр кубатына жана жылуулукка бааны кымбаттатуу тууралу чечим кабыл алууда каршы чыгып, баалардын кымбатташынын тийгизүүчү терс жактарын айтып, жүйөөлүү себептерди мисал келтирген. “Акыркы жумада өкмөт менен биргеликте эсеп-кысаптарды тактап чоң иш бүткөрүлдү. Тарифтердин кымбатташына карата биз сунуштаган эсепти президент менен өкмөт колдоп 500 миллион сом жардам бере турган болду”,-деди Түлеев. (AJ)

К.Бакиев: "Мыйзам ар бир жаранга түшүнүктүү болууга тийиш"

“Азыр биздин алдыбызда кризистин кесепеттерин биротоло жоюп жана андан ары экономикалык өсүшкө кадам таштоо максаты турат. Бул үчүн аткаруу жана мыйзам чыгаруу бийлигинин, жергиликтүү башкаруунун, жеке сектордун, жарандык коомдун институттарынын кудурет-күчүн бириктирүү зарыл”,-деди президент Курманбек Бакиев парламенттин мааракесинде сүйлөгөн сөзүндө Ал ошондой эле Жогорку Кеңеш менен Өкмөттүн мыйзам чыгаруу ишине бирдиктүү концепциялык мамиле жасоо өтө маанилүү экендигин белгилеп, өз сунушун айтты.

Алар: Биринчи. Мыйзам чыгаруу иши системалуу болсун үчүн ар бир тармакта эң маанилүү, биринчи кезектеги мыйзам долбоорлорунун тизмеси аныкталууга тийиш. Аларды кабыл алуунун ырааты бул тармактарды жаңылоо этаптарына жараша аныкталып жана жарыша жасалганы абзел.

Экинчи. Иштелип жана кабыл алынып жаткан мыйзамдар турмушка жакын келип, мамлекеттин финансылык, материалдык-техникалык мүмкүнчүлүктөрү, ошондой эле алар кабыл алынгандан кийинки кесепеттери эске алынууга тийиш.

Үчүнчү. Ар бир мыйзам анын аткарылышын кепилдеген тийиштүү ченемдик укуктук актылар менен бекемделүүгө тийиш. Мыйзамдын аткарылышы катаал көзөмөлгө алынуусу зарыл. Ошондо гана ал «иштейт». А чынында бул мыйзам чыгаруучу жана аткаруучу бийликтин негизги милдети болуп саналат.

Төртүнчү. Мыйзамдар чиновниктер же эл аралык уюмдар үчүн эмес, карапайым адамдар үчүн жазылып жана ар бир жаранга түшүнүктүү болууга тийиш.

Башкысы - мыйзамдар конституциялык түзүлүштү сактоого, жарандардын укуктары менен эркиндиктерин коргоого, ошондой эле мамлекет менен бизнестин шериктештигин камсыз кылуу, инвестициялык климатты жакшыртуу, кылмыштуулук жана коррупция менен күрөшүү үчүн укуктук өбөлгөлөрдү түзүүгө багытталышы керек. (AJ)

Кыргызстанда A/H1N1 менен ооругандар 61 болду

Бул тууралуу Саламаттык сактоо министрлигинин алдындагы санитардык эпидемиологиялык көзөмөлдөө департаментинин жетекчиси Зуридин Нурматов “Азаттыкка” билдирди. Анын айтымында, A/H1N1 тумоосуна чалдыккан 25 адам сырттан келишсе, жергиликтүү тургундардан 35 адам катталган. “Бишкекте чочко тумоосунун вирустарын аныктоочу жаңы үлгүдөгү лаборатория бар. Учурда 950 миң медициналык маска алынып келинди”,-дейт Нурматов. (AJ)

Дагы жүктөңүз

XS
SM
MD
LG