Линктер

шаршемби, 17-июль, 2019 Бишкек убактысы 04:40

Жаңылыктар

Иран: кыйраган учактан жети киши көз жумду

Ирандын түштүк-чыгышында кырсыкка учураган учактан жогорку даражадагы жети полиция кызматкери набыт кеткени айтылууда.

Алар Тегерандан Систан-Белужистан аймагынын борбору Захеданга иликтөө ишин жүргүзүү үчүн сапар алышкан. Бул аймакта 8-октябрда радикал согушкерлер Ирандын коопсуздук күчтөрүнө кол салышып, анда беш адам көз жумган.

Учактын калдыктары жекшембинин таңында тоолуу райондордун биринде табылды.

Чек ара полициясынын командиринин айтымында, учак ракета же башка бир курал менен атып түшүрүлгөн эмес.

Суннилер басымдуулук кылган Систан-Белужистан провинциясы Пакистан менен Ооганстанга чек аралаш болгондуктан бул жерде маң заттары менен аткезчилик кылган кылмыштуу топтор жана сунни экстремисттери менен полиция көп кагылышып турат.

Путин Австралияда өтө турган «чоң жыйырманын” саммитине катышат

Бул тууралуу Австралиянын каржы министри Джо Хоккей өлкөнүн АВС телеканалына берген маегинди билдирди. Анын айтымында, орус өкмөтү Путин ноябрда Брисбенде өтө турган “чоң жыйырманын” саммитине катышаарын тастыктады.

Украинанын чыгышындагы жаңжалга байланыштуу Путиндин бул саммитке катышуусу саммит мүчөлөрүнүн арасында талаш- тартыш жараткан.

Австралиялыктар 17-июлда Украинанын аймагында кырсыкка учураган учак үчүн Орусияны сынга алышууда. Эл аралык коомчулук аны аймакка көзөмөлдүк кылган орусиячыл жикчилер атып түшүрдү деп шектенип келет.

Кырсыкта курман болгон 298 адамдын жыйырма сегизи австралиялыктар эле.

Ал арада Украин президенти Петр Порошенко да Путин менен кийинки жумада жолугаарын билдирди. Анын айтымында бул жолугушуу 16-17-октябрда Миланда өтө турган “Европа–Азия” саммиттинин алкагында, Германиянын канцлери Ангела Меркель жана Британиянын премьер-министри Дэвид Кэмерондун катышуусунда жүрөт.

Сузактык койчулар ашууда 80 кой, 2 жылкыдан айрылды

Нарындын Көк-Суу жайлоосунда ашууда камалган малчылар кыштоого келгиче 80 баш коюнан айрылды. Чабандар айрым койлор суукка кайыгып өлсө, айрымдары ашуудагы туманда адашып кеткенин айтышкан. Бул тууралуу район акими Нурболот Мирзахмедов “Азатыкка” билдирди.

“Азыр Сузактын Беш-Мойнок айылынын төрт жараны 1,5 миң кой менен Тогуз-Торо тараптан Сузакка жолдо келе жатышат. Аларды тосуп алууга тийиштүү топ барышып, малчылар бүгүн же, эртен келип калышат”, - дейт Мирзахмедов.

Ошондой эле ашууда 2 жылкы аскадан учуп кеткендиги кабарланууда. Акыркы тактоолор койчулар келген соң анык болот.

Эске салсак, Сузактын Беш-Мойнок жана Түрк-Абад айылдарынын тогуз малчысы 2 миң баш кою менен Нарындын Ак-Талаа районунун Көк-Суу жайлоосунда 7-октябрда калың жааган карга камалып, ашууда калышкан. Чабандардын бири, 52 жаштагы Толкунбай Абдыров суукка тоңуп өлгөн. Анын сөөгү ӨКМдин вертолету менен алынып келинип, туугандарына берилген. (RsK)

Германия: күрттөр “Ислам мамлекетине” каршы аракеттерди талап кылууда

Ишембиде Германиянын Дюссельдорф шаарында күрт улутундагы жыйырма миңдей адам нааразылык акциясына чыкты. Алар Сириядагы Кобани шаарында жашаган күрттөрдү «Ислам мамлекети» радикал тобунун басып алуу коркунучунан коргоону эл аралык коомчулуктан талап кылышты. Түндүк Рейн- Вестивалия аймагынын парламентинин алдындагы массалык демонстрацияга чыккандар “Радикал жихадчылар Кобани шаарына кирсе күрттөр кырылат» деген жазуулары бар ураандарды көтөрүп турушту.

Акциянын катышуучулары Германия бийлигин сириялык куралсыз, жайкын күрттөргө Түркия чек арасынан жол ачып бериши үчүн Анкарага басым жасоого чакырышты.

Дюссельдорф полициясы нааразылык акциясы тынч өткөнүн билдирди.

Акыркы маалыматтарга ылайык, Сириядагы активисттер «Ислам мамлекети» радикал тобу Түркия менен чектеш Кобани шаарынын ичине тереңдеп киргенин белгилешүүдө. Сириядагы адам укуктарына байкоо салган мониторинг тобунун белгилешинче, согушкерлер Кобани шаарынын кеминде 40 пайызын ээлешти жана жергиликтүү күрт администрациясын өз көзөмөлүнө алышты.

Аба ырайы: шашылыш билдирүү

13-октябрда түнкүсүн Талас, Кемин өрөөндөрүндө, Ысык-Көл ойдуңунун чыгыш тарабында 0…-2° үшүк сакталып турат. Мындай үшүктүн жүрүшү жыйналбаган жашылчалар жана жемиштерге, казылып алынган жана жабылбаган картошка, кант кызылчасы үчүн коркунучтуу. Бул тууралуу Өзгөчө кырдаалдар министрлиги эскертет.

Эртең, 13-октябрда Кыргызстанда жаан-чачын күтүлбөйт. Шамалдын багыты өзгөрүлүп турат, ылдамдыгы 1-6 м/с.

Абанын температурасы:

Чүй өрөөнүндө түнкүсүн 0...5 ; күндүзү 14...19

Талас өрөөнүндө түнкүсүн 0...5; күндүзү 14...19

Баткен облусунда түнкүсүн 1...6; күндүзү 16...21

Ош облусунда түнкүсүн 3...8; күндүзү 17…22

Жалал-Абад облусунда түнкүсүн 3...8; күндүзү 17…22

Ысык-Көл облусунда түнкүсүн 0...5; күндүзү 10...15

Нарын облусунда түнкүсүн 0...5; күндүзү 12...17

Бийик тоолуу аймактарда түнкүсүн -11...- 16; күндүзү -2...+3

Бишкекте жаан-чачын күтүлбөйт. Шамалдын багыты өзгөрүлүп турат, ылдамдыгы 1-6 м/с. Абанын түнкү төмөнкү температурасы 3…5°, күндүзгү жогорку температурасы 17…19° жылуу болот.

ЖККУ террористтик уюмдардын тизмесин толуктайт

Жамааттык коопсуздук келишими уюму ага мүчө өлкөлөрдүн аймагында террористтик жана экстремисттик деп табылган уюмдардын катарын арттырат. Бул тууралуу 8-октябрдагы ЖККУнун тиешелүү комитетинин жыйынында белгилүү болду. Бул тууралуу уюмдун расмий сайтында маалымдалат.

Жыйынга Армения, Белорус, Казакстан, Кыргызстан, Орусия жана Тажикстандын тиешелүү министрлери, коопсуздук боюнча өкүлдөрү жана уюмдун секретариатынын кызматкерлери катышты.

Жумушчу топ эл аралык террористтик жана экстремисттик иш-аракеттерге каршы аракеттенүү маселелерин карап, Ирак менен Сирия өлкөлөрүндө “Ирак-Левант ислам мамлекети” жана “Ан-Нусра” террористтик уюмдарынын жигери артып баратканына көңүл бурду. Ооганстандагы абалдын чыңалып турушуна тынчсыздануулар болду.

Талкуу жүрүшүндө терроризм жана экстремизмге каршы күрөшүү жаатындагы жамааттык иш чараларды күчөтүү тууралуу сунуштар иштелип чыкты.

Анын алкагында, террористтик жана экстремисттик уюмдардын тизмесине өзгөртүү киргизүү талапка ылайык деп табылды жана аны уюмдун кезектеги жыйынында бекитүү каралды. Ошондой эле 2015- жана андан кийинки жылдары атайын багыттагы күчтөрдүн аскердик даярдыктарын жакшыртуу макулдашылды.

Максүтов: ишти 1,5 ай ичинде бир багытка салабыз

Бул тууралуу “Азаттыкка” жаңы дайындалган маданият, маалымат жана туризм министри Алтынбек Максүтов билдирди.

“2020-жылга чейин президенттин программасы бар. Буга чейин маданият министрлигинде кабыл алынган көптөгөн программалар бар. Ошолорду кагазда калтырбай, Кыргызстандын чыгаан ишмерлерин чакырып, бир жарым ай ичинде иреттеп, министрликтин сайтына илип, ишти бир багытка салабыз. Ар бир министр келип эле менин жаңы программам дей берсе багытыбызды өзгөртүп жиберебиз”, - деди Максүтов.

Ал ошондой эле, маданиятка салым кошчу ички инвесторлорго көңүл бурарын, каражатты көбүрөөк өнүгүүгө жумшарын жана бөлүнгөн акчанын кайда коротулуп жатканы тууралуу маалымат ачык болуп, министрликтин сайтына жайгаштырылып турарын кошумчалады.

8-октябрда Жогорку Кеңеш 84 добуш менен Алтынбек Максүтовдун талапкерлигин колдогон. (МТо)

Бишкекте картинг сезону ачылат

«Кыргызстандын алдыңкы 100 пилоту» деп аталган ышкыбоздор арасындагы картинг сезону бүгүн башталат.

Бул тууралуу мелдештин расмий сайтында кабарланган. Маалыматка караганда, жарыш Горький-Алма-Ата көчөлөрүнүн кесилишиндеги картодромдо саат 17:00дө башталат.

Таймашка 18 жаштан жогорку бардык каалоочулар катыша алышат. Уюштуруучулар акыркы убактарда автоспортко кызыккандардын катары көбөйүп бараткандыгын, мындан улам Кыргызстанда автожарыштын башка да түрлөрү байма-бай өткөрүлүп жатканын белгилешет. (МТо)

Сузактык эки малчы дале дайынсыз

Жалал-Абаддын Сузак районунун Түрк-Абад айылынын тургундары Мурзали Сариев жана Орипжан Маматалиев мындан 12 күн мурда кыштоого мал айдап кеткен боюнча дале дайынсыз. Бул тууралуу “Азаттыкка” Өзгөчө кырдаалдар министрлигинин басма сөз катчысы Абдышарип Бекилов билдирди.

Анын айтымында, малчылар он чакты кочкорду унаага салып кыштоого жөнөшкөн жана жайлоодон көчүп келаткандарды тосуп алышмак. Машине жүрбөй калган жерден ары карай жөө кетишкен. Ошондон бери алардан кабар жок.

Эске салсак, Сузактын Беш-Мойнок жана Түрк-Абад айылдарынын тогуз малчысы 2 миң баш кою менен Нарындын Ак-Талаа районунун Көк-Суу жайлоосунда 7-октябрда калың жааган карга камалып, ашууда калышкан. Чабандардын бири, 52 жаштагы Толкунбай Абдыров суукка тоңуп өлгөн.

Учурда 1500 баш кой айдаган малчылардын бир тобу Тогуз-Торонун Чет-Булак айылына жетип калышты. Ал эми 500 баш кой айдаган эки чабан кечээ кечинде Сузактын Кум-Бел айылына келишти. Өзгөчө кырдаалдар министрлигинин куткаруучулары жоголгон эки малчыны издөөнү улантууда.(МТо)

Тувада жоголгон вертолетту издөө уланууда

“Тува авиакаттамдарына” таандык Ми-8 вертолету жума күнү Соруг кыштагынан Кызыл шаарына учуп чыккан. Анын бортунда 12 адам бар болчу.

Транспорттук прокуратуранын билдиргенине караганда, алар “Стройлайн” компаниясынын тапшырмасы менен аэрофото тартуу үчүн чыгышкан.

Жоголгон вертолетту издөө үчүн бир нече вертолет жана самолеттордун экипажы ишке тартылды. Жерден Туванын куткаруу отряды, Орусиянын Өзгөчө кырдаалдар министрлигинин жергиликтүү бөлүмү издөөнү улантууда.

Быйыл Орусияда бир нече вертолет кырсыкка учурады. 4-сентябрда Краснодар крайындагы Геленджик аэопортуна конуу учурунда Ми-8 вертолету кулап, эки киши өлүп, бирөө жаракат алган.

Май айынын аягында Мурманск облусунда дагы бир Ми-8 сууга кулап түшүп, 12 адам набыт болгон.

Ми-8 – дүйнөдө эң көп таралган кош кыймылдаткычтуу вертолет. 1965-жылдан бери түрдүү модификациядагы 12 миң даанасы чыгарылган. Жарандык жана аскердик авиацияда кеңири колдонулат.

Москвада эки тажикстандыктын кескиленип өлтүрүлгөн денеси табылды

Бүгүн, 12-октябрь таң эрте орус полициясы Москванын түштүк-батыш ыптасындагы Миклухо-Маклай көчөсүндөгү токойлуу тилкеден кескиленип өлтүрүлгөн адамдын сөөгүн тапты. Андан арыраак жерден моюнуна бычак жеп өлгөн дагы бир кишинин сөөгү табылган.

Бул тууралуу lifennews.ru маалымат сайты кабарлоодо. Маалыматка караганда, аларды белгисиз бир нече адамдан турган топ өлтүргөн болушу мүмкүн. Маалымат сайты өлтүрүлгөн экөө тең Тажикстандын жарандары деп бышыктоодо.

Учурда полиция бул оор кылмышка шектүү деп эки эркек жана бир кызга издөө салды.

Турдубаев энергетика министринин милдетин аткаруучу болуп дайындалды

Президент Алмазбек Атамбаевдин жарлыгына ылайык, энергетика жана өнөр жай министринин милдетин аткаруучу болуп Кубанычбек Турдубаев дайындалды. Бул тууралуу өлкө башчысынын расмий сайты маалымдайт.

Турдубаев буга чейин аталган министрликте министрдин орун басары болуп эмгектенген.

9-октябрда президент кышка карата даярдыкты, электр энергиясын үнөмдөө үчүн жарыкты өчүрүү тууралуу өкмөттүн кадамдарын сынга алып, энергетика тармагы кадрдык өзгөрүүлөргө муктаж экенин белгилеген. Ошол эле күнү энергетика жана өнөр жай министри Осмонбек Артыкбаев өз арызы менен кызматтан кеткен. (МТо)

Порошенко: Миланда Путин менен сүйлөшүү “оор” болот

Украин президенти Петро Порошенко келерки жумада Италиянын Милан шаарында орус президенти Владимир Путин менен сүйлөшүү оор болот деп эсептейт. Жолугушууга Германия канцлери, Италия менен Британиянын премьер-министрлери, Евробиримдиктин лидерлери катышат.

Порошенко Донбасстагы жагдайды жөнгө салуу боюнча тынчтык планынын аткарылышына ишенерин украин маалымат каражаттары маалымдашууда. Порошенконун айтымында, тынчтыкка келүү үчүн ириде ок атышууну токтотуу жана Орусия менен чек араны жабуу зарыл.

Порошенко энергетика тармагындагы эки өлкө ортосундагы карама-каршылыкка токтолуп, "Украина үчүн келе жаткан кышта газсыз калуу коркунучу жок экенине күмөн санабайм” деп билдирди.

Порошенко басып алынган аймактардагы газ жана электр менен камсыз кылуудагы көйгөйлөрдү да белгилеп өттү.

Украин жетекчилиги 16-17-октябрда Миланда өтө турган Евроазиялык саммитке чакыруу алган. Анын алкагында, саясатчылардын көп тараптуу, анын ичинде Украина, Орусия, Франция жана Германия мамлекеттеринин жетекчилеринин жолугушуусу күтүлүүдө.

“Бир дүйнө- Кыргызстан” кинофестивалы жыйынтыкталды

Адам укуктарына арналган “Бир дүйнө – Кыргызстан” даректүү тасмалардын сегизинчи фестивалы 11-сентябрда Бишкекте жыйынтыкталды. 7-октябрда башталган фестивалда жыйырмадан ашуун тасма көрсөтүлдү.

Фестивалдын уюштуруучуларынын билдиришинче, австриялык режиссерлор Аскан Бройер жана Виктор Жашкенин “Жакартадагы башаламандык” тасмасы эл аралык сыйлыкты жеңип алды. Улуттук сыйлыктын жеңүүчүсү болуп 705 чыгармачыл тобу тарткан “Тасма жөнүндө тасма” табылды.

Франциялык режиссер Энн Пуаренин “Appleдин ички түзүлүшү” тасмасы Жаштар сыйлыгынын ээси болду. Режиссер Абибакир уулу Бексултандын “Мугалим” тасмасы көрүүчүлөр тарабынан мыкты деп табылды. Жаш студент-режиссердун бул тасмасы “Азаттык” радиосунун атайын белегин жана акчалай сыйлыгын да утуп алды. Аны улуттук тасмалар боюнча калыстар тобун жетектеген “Азаттык” радиосунун жетекчиси Венера Жуматаева тапшырды.

Режиссер Элнура Осмоналиеванын “Биз жашаган өлкө” тасмасына фестивалдын атайын сыйлыгы жана ардак грамотасы ыйгарылды.

Быйыл 8-жолу өтүп жаткан даректүү тасмалардын эл аралык “Бир дүйнө - Кыргызстан” фестивалына катышкан тасмалар 5-сентябрдан баштап Кыргызстандын бардык аймагында көрсөтүлгөн. Фестивал БУУнун “Өнүгүүгө укук” калкасы алдында өтүп, мурдагылардан айырмаланып бул жылы сүрөттөр топтомдору да кабыл алынган. (ST)

“Дордой” “Кыргызстан кубогун” 7-ирет жеңди

Футбол боюнча “Кыргызстан кубогун” “Дордой” клубу жеңип алды. Финалдык беттеште "дордойчулар" Канттын “Абдыш-Ата” клубун 2:1 эсебинде утту.

“Дордой” кубоктогу жеңиштеринин санын жетиге жеткирип, СКА-ПВОнун рекордун кайталады.

“Кыргызстан кубогу” быйыл 23-жолу өттү. ”Абдыш-Ата” клубу буга чейин аталган кубокту үч жолу жеңген, бирок “Дордой” менен финалда алгач ирет беттешти. (ECh)

Кыргыздын улуттук бийи эртең тандалат

Кыргыз улуттук бий сынагынын жыйынтыгы эртең чыгарылат. Бул тууралуу бий сынагын уюштуруп жаткан “Улут жүзү” коомдук фондунан кабарлашты. Сынакка жалпысынан 70 чыгармачыл топтон жана жеке аткаруучулардан ар кандай бийлер келип түшкөн. Калыстар тобу тандап алган кырк эмгектин ичинен эң мыктыларын кийинки айлампага өткөргөн. Сынактын башкы максаты - кыргыздын улуттук бийин жандантып, элге жайылтуу болуп саналат.

12-октябрда Тарых музейинде өтчү гала-концертте жеңүүчүлөргө миллион сомдук байгелер тапшырылат. Сынактын жыйынтыгы СМС жана интернет аркылуу добуш берүү менен аныкталат.(UEz)

Кыргызстандык күрттөр дүйнө коомчулугуна жардам сурап кайрылды

Кыргызстанда жашаган күрттөр дүйнө коомчулугун Кобанидеги боордошторун “Ислам мамлекети” уюмунун террорунан коргоп калууга чакырды. Алар БУУнун Бишкектеги өкүлчүлүгүнө, Германия, Франция, Түркия, АКШ жана Орусия элчиликтерине кайрылуу жолдоп, “Ислам мамлекети” тобуна каршы жерден сокку урууну суранышты. Бул тууралуу күрттөрдүн “Мидия” коомдук бирикмесинин башчысы Рамазан Сеидов “Азаттыкка” билдирди:

- Азыр күрттөрдү аесуз өлтүрүп жатышат. Биз дүйнө элин күрттөрдү согушкерлерден сактап калуусун талап кылабыз. БУУнун жана АКШнын коалициялык күчтөрү аларга каршы жерден да соккуларды урушу керек. Анткени бул террор дүйнө эли үчүн коркунуч туудурат, - деди Кыргызстандагы күрт диаспорасынын башчысы.

Кечээ, элүүдөн ашык күрт улутундагы адамдар Горький сейил багында акция өткөрүп, дүйнө элинен жардам сурашкан.

Түркия өкмөтү жергиликтүү күрттөрдүн нааразылыгына карабай Сирия менен чектеш Кобани шаарын коргоо үчүн кандайдыр бир чара көрүүдөн карманып турат. Күрт азчылыгы төрт күндөн бери түрк өкмөтүн Кобани шаарын коргоп жаткандарга колдоо көрсөтүүсүн талап кылышууда. Аталган нааразылык акцияларда 31 жаран каза тапты.(UEz)

Донецкте үч жайкын адам окко учту

Украинанын чыгышындагы Дебальцево жана Счастье калктуу аймактарында бир сутка ичинде отуз чакты аткылоолор орун алды. Маалыматтарга ылайык, орусиячыл жикчилдер украин аскерлерин зениттик куралдар менен аткылашкан.

Жума күну Донецкте өткөн аскердик операциялардан үч жай тургун каза болуп, төртөө жараат алды. 5-сентябрда түзүлгөн ок атышпоо тууралуу макулдашууга карабастан бул аймактарда согуштук аракеттер токтобой келет.

Аба ырайы

Эртең түнкүсүн Талас, Кемин өрөөндөрүндө, Ысык-Көл ойдуңунун чыгыш тарабында -1…-3° үшүк сакталып турат. Мындай үшүктүн жүрүшү жыйналбаган жашылча-жемиштерге, казылып алынган жана жабылбаган картөшкө, кант кызылчасы үчүн коркунучтуу.

12-октябрда өлкө аймагында жаан-чачын күтүлбөйт. Шамалдын багыты өзгөрүлүп турат, ылдамдыгы 1-6 м/с.

Абанын температурасы:


Чүй өрөөнүндө түнкүсүн 0...5, күндүз 14...19,
Талас өрөөнүндө түнкүсүн -1...-3, күндүз 12...17,
Баткен облусунда түнкүсүн 1...6, күндүз 15...20,
Ош жана Жалал-Абад аймактарында түнкүсүн 2...7, күндүз 17...22,
Ысык-Көлдө түнкүсүн 0...5, күндүз 9...14,
Нарын облусунда түнкүсүн 0...-5, күндүз 11...16,

12-октябрда Бишкекте жаан-чачын күтүлбөйт. Шамалдын багыты өзгөрүлүп турат, ылдамдыгы 1-6 м/с. Абанын температурасы түнкүсүн 1...3 градус, күндүз 17...19 градус жылуу болот.

Алтынбек Максүтов маданият министри болуп дайындалды

Мындай жарлыкка президент Алмазбек Атамбаев кол койду. Алтынбек Максүтов бүгүнтөн тарта Маданият, маалымат жана туризм министри кызматына расмий киришет.

Режиссер Максүтовду аталган министрликке “Ар-намыс” фракциясы көрсөтүп, анын талапкерлигин парламент жана өкмөт башчысы жактырган.

42 жаштагы Максүтов буга чейин Токтогул Сатылганов атындагы улуттук филармонияда көркөм жетекчи болуп иштеп келген. Ал коомчулукка эл аралык “Кийиз дүйнө” фестивалынын, “Макал Арт” чыгармачыл тобунун уюштуруучусу жана жакында өткөн “Көчмөндөр оюнунун” башкы режиссеру катары белгилүү. Мурдагы министр Камила Талиева 16-сентябрда кызматтан алынган.(UEz)

Бишкек шаарынын 136 жылдыгы белгиленүүдө

Бүгүн, борбордук “Ала-Тоо” аянтында Бишкетин 136 жылдыгына арналган майрамдык иш-чаралар өтүүдө. Ага калаа башчысы Кубанычбек Кулматов да катышып, иш-чарага келгендерди шаар күнү менен куттуктады.

Түштөн кийин шаар тургундарынын катышуусунда веложарыш өтөт. Ага мэр Кулматов баштаган калаа жетекчилиги да катышат. Кечинде майрамдык концерт болуп, шаар күнү майрамдык фейерверк менен жыйынтыкталат.

Кыргызстандын баш калаасы 1878-жылдан 1926-жылга чейин Пишпек деп аталып келген. 1926-1991-жылдары Фрунзе деп өзгөргөн. Эгемендикти алгандан бери борбор калаа Бишкек баатырдын атын алып жүрөт. (UEz)

Эболадан өлгөндөрдүн саны 4033кө жетти

Бул тууралуу Бүткүл дүйнөлүк саламаттыкты сактоо уюму кабарлады. Маалыматка ылайык, эбола вирусу дүйнөнун жети өлкөсүндо тездик менен жайылууда. 8-октябрга карата илдет жуктуруп алгандардын саны 8400гө жетти.

Эболадан Либерияда 2316, Сьерра-Леондо 930, Гвинеяда 778, Нигерияда сегиз жана АКШда бир жаран көз жумду. Испания жана Сенегалда бирден учур катталды. Мындан сырткары Конго демократиялык республикасында 71 факт катталып, 43 бейтап ажал тапканын Reuters агенттиги жазып чыкты. Ал арада Македонияда эбола вирусун жуктуруп алган британ жараны өлдү. Кабарларга караганда, вирустун белгилери Британиянын дагы бир жаранында байкалган.

Эболага каршы Британия баштаган бир катар өлкөлөр коопсуздук чараларын күчөтүп, коомчулукту илдетке бирге каршы турууга үндөөдө.

“Ислам мамлекети” тобу күрттөрдүн штаб-квартирасын басып алды

Жума күнү “Ислам мамлекети” радикал уюмунун согушкерлери Кобанини коргоп жаткан күрт аскерлеринин штаб-квартирасын басып алышты. Бул тууралдуу Франс-Пресс агенттиги БУУнун өкүлдөрүнө шилтеме берип жазды. Маалыматка ылайык, миңдеген адамдар согушкерлердин курмандыгына айланышы мүмкүн.

АКШ тараптан урулган авиасоккулар Кобани шаарын согушкерлерден арылта албай келет. Расмий Пентагон “Ислам мамлекети” тобуна жерден да сокку урмайын алардын баскынчылыгына каршы туруу мүмкүн эместигин айтууда.

Түркия өкмөтү жергиликтүү күрттөрдүн нааразылыгына карабай Сирия менен чектеш Кобани шаарын коргоо үчүн кандайдыр бир чара көрүүдөн карманып турат. Күрт азчылыгы төрт күндөн бери түрк өкмөтүн Кобани шаарын коргоп жаткандарга колдоо көрсөтүүсүн талап кылып келишет. Аталган нааразылык акцияларда 31 жаран каза тапты.

Жалал-Абад: врачтар телефондун жарыгында жүрөккө операция жасашты

Жалал-Абаддык хирургдар телефондун жарыгы менен жүрөккө операция жасашты. Бул тууралуу Түштүк аймактык жүрөк-кан тамыр илим изилдөө борборунун директору Калдарбек Абдыраманов “Азаттыкка” билдирди.

Анын айтымында, 23 жаштагы кыздын жүрөгүнө операция жасап жаткан учурда жарык өчүп калган.

- Бул өтө оор операция болчу. Жүрөгүнүн 3 капкакчасын алмаштырып жатканбыз. Операцияны токтотсок, бейтаптын жүрөгү токтоп калмак. Айла жок чырак менен уланттык. Свет жарым сааттан кийин гана күйдү. Операция болгон кыз губернатордун тууганы экен, башка адам болсо свет күйбөй деле калмак, - деди Абдыраманов.

Аталган борбордо генератор же электр кубатын автономиялуу түрдө берчү эч кандай жабдык жок. Операция учурунда жарык өчүп калышы мурда да катталган. Электриктер болсо жарык авариядан улам өчкөнүн айтууда.(UEz)

Сузактык эки малчы он күндөн бери дайынсыз

Жалал-Абаддын Сузак районундагы Түрк-Абад айылынын тургундары 47 жаштагы Мурзали Сариев жана 46 жаштагы Орипжан Маматалиев кыштоого мал айдап кеткен боюнча дайынсыз. Бул тууралуу Өзгөчө кырдаалдар министрлигинин басма сөз катчысы Абдышарип Бекилов “Азаттыкка” билдирди. Анын айтымында, алар 1-октябрда он чакты кочкорду унаага салып кыштоого жөнөшкөн жана жайлоодон көчүп келаткандарды тосуп алышмак. Бирок унаасы жолдо калып өздөрү айдаган малы менен жок.

Эске салсак, Сузактын Беш-Мойнок жана Түрк-Абад айылдарынын тогуз малчысы 2 миң баш кою менен Нарындын Ак-Талаа районунун Көк-Суу жайлоосунда 7-октябрда калың жааган карга камалып, ашууда калышкан. Чабандардын бири, 52 жаштагы Толкунбай Абдыров суукка тоңуп өлгөн.

Ашууда калган Беш-Мойнок айылынын төрт жараны 9-октябрда 1,5 миң кой менен Тогуз-Торого, дагы эки жаран 500 кой менен Сузактагы кыштоого ашып өтүшкөн. Учурда Өзгөчө кырдаалдар министрлигинин жети куткаруучусу жоголгон малчыларды издөө иштерин улантууда.(UEz)

Дагы жүктөңүз

XS
SM
MD
LG