Линктер

шаршемби, 17-июль, 2019 Бишкек убактысы 07:15

Жаңылыктар

Анталияда кыргызстандык келин автокырсыкка кабылды

Анталия.

Бул тууралуу "Азаттыкка" Анталиядагы Кыргыз коомунун жетекчиси Талант Курманалиев билдирди:

- Кырсыкка мотоцикл менен кетип бара жатып кабылыптыр. Жанында 11 жаштагы кыз да бар экен. Экөөнүн тең буттары жанчылыптыр. Эртең дагы бир операция жасалат. Окуя болгон күнү эс алууга чыккан экен.

35 жаштагы кыргызстандык Динара Анталияда кары кишини карап эмгектенчү. Бейтап Анталиянын Акдениз университетинин ооруканасында жатат.

31-июлда болгон кырсыкты Анталиянын шаардык полициясы иликтөөдө. (ElB)

Саакашвили: АКШга таянбайм

Саакашвили видео конференция учурунда

Украинанын Одесса облусунун мурдагы губернатору жана Грузиянын мурдагы президенти Михаил Саакашвили баш паанек алып Кошмо Штаттарында калып калбасын билдирди.

"Мен АКШнын же башка кайсы бир өлкөнүн коргоосун колдонбойм. Украинага кайтып барып, биздин активисттерге таянам" деди Саакашвили 1-августтагы видео-конференцияда. Ал жашырынбай, ачык келерин да кошумчалады.

Украина президенти Саакашвили 2015-жылы жарандыкка арыз тапшырып жатканда жалган маалыматтарды көрсөткөн деп жакында жарандыктан ажыраткан. Президент Порошенко эки жыл мурда аны Одессага губернаторлукка дайындап, бир жылдан кийин ортолорунда пикир келишпестиктер чыккан. Саакашвили Порошенкону коррупцияга айыптап келет.

Михаил Саакашвили мурда Грузия жарандыгынан да чыгарылган.

Венесуэлада оппозиция лидерлери камакка алынды

Венесуэладагы кагылыш

Венесуэланын атайын кызматы 1-августта үй камагында жаткан оппозициядагы лидерлер Леопольдо Лопес менен Антонио Ледесманы кармап кетишкенин алардын туугандары билдиришти.

30-июлда каршылык акциялары жана эл аралык коомчулуктун басымына карабай өлкө бийлиги "Конституциялык ассамблея" деп аталган органга шайлоо өткөргөн. Шайлоо учурундагы кагылышууларда кеминде он киши өлгөн. Бийликчил адамдар шайланган ассамблея Конституцияны өзгөртүп, парламентти тарата алат.

Учурда парламентте көпчүлүктү түзгөн оппозиция бул шайлоону тааныган эмес. Алар президент муну менен парламентти кыйгап өтүп, бийлигин чыңдоону көздөйт дешет.

Каатчылыкка баткан Венесуэлада жүз миңдеген адамдардын каршылык акциялары айлап созулуп, жалпысынан 120 адамдын өмүрүн алды. Алар өлкө президенти Николас Мадуронун отставкасын талап кылып жатышат.

Мадурону "диктатор" атап, ага 31-июлда АКШ санкция салды. Венесуэладагы демократиянын келечегине Евробиримдик да тынчсыздануусун билдирип, оппозиция лидерлеринин камалышын туура эмес кадам деп баалады.

Пакистан парламенти жаңы премьер-министрди шайлады

Шахид Хакан Аббаси.

Пакистан Улуттук кеңеши 1-августта Шахид Хакан Аббасини премьер-министрликке шайлады. Ал 342 парламентарийдин 221инин добушун алды.

Аббасини кайра эле парламентте көпчүлүктү түзгөн, мурдагы премьер Наваз Шарифтин Пакистан мусулман лигасы - Наваз партиясы көрсөткөн.

Наваз Шарифти болсо өткөн жумада Жогорку Сот коррупцияга айыптап, премьерликтен четтеткен.

Аббаси буга чейин өлкөнүн мунай министрлигин жетектеп келген.

Москва облустук сотундагы атышуудан үч киши өлдү

Москва облустук сотундагы атышуу учурунда соттолуп жаткан тогуз кишинин үчөө жок кылынды. Дагы экөө жарадар. Андан тышкары сот аткаруучу жана күзөтчү жараланып, кеңседеги адамдар сыртка чыгарылган. Бул тууралуу Орусия ички иштер министрлиги билдирди.

Окуя, маалымат каражаттарында жазылганга караганда, "Банда ГТА" деп аталган топтун иши боюнча сот өтүп жатканда болгон. "Интерфакс" айыпталуучулар коштоп бараткан күзөтчүлөргө кол салган деп жазууда. Атышуу ушундан кийин болгон.

2012-2014-жылдары Орусиядагы Дон федералдык трассасында 17 адам өлтүрүлүп, экөө жарадар болушкан. Кылмыш ГТА аттуу компьютердик оюндун тапшырмасына окшош болгондуктан медиада "Банда ГТА" деп аталып кеткен.

Соттолуп жаткандар диний радикал топко тиешеси бар борборазиялыктар делет.

Максим Бакиевдин ишиндеги күбө сотко келбегени үчүн жазаланды

Максим Бакиев.

Мурдагы президенттин уулу Максим Бакиев менен британ бизнесмени Шон Дейлинин ортосунда былтыр Лондондо өткөн соттук ишке келбей койгон күбө - Израилдин жараны Берти Синбетиге сот өкүмү чыкты.

7-июлда Лондондун Жогорку Соту Синбетини сотко күбө катары келбегени үчүн күнөөлүү деп таап, ага алты ай абак жазасын берди. Бул маалыматты британ бизнесмени Шон Дейли “Азаттыкка” ырастап, Синбетинин өкүмү 18 айлык шарттуу жаза болуп өзгөргөнүн кошумчалады.

Синбети 9-июнда Англиянын Жогорку Сотунун өтүнүчү менен Британияда кармалып, ал эмне үчүн соттун чакыруусуна карабай көрсөтмө берүүгө келбегени боюнча териштирүү башталган. Синбети Максим Бакиев коркутканы үчүн сотко келбегенин айтканы кабарланган.

Таластагы Жерүй алтын кенин иштетүү үчүн Кыргызстанга келген британиялык "Оксус голд" тоо-кен компаниясынын өкүлү Шон Дейлиге 2006-жылдын 7-июлунда Бишкектин четинде кол салуу болуп, британ бизнесмени катуу жаракат алган.

Шон Дейли ошол учурдагы президент Курманбек Бакиевдин уулу аны өлтүрүүгө "буюртма берген жана кол салууну уюштурган" деп, Британиядан баш калка тапкан Максим Бакиевди сотко берген. Ошондой эле алган жарааты үчүн компенсация талап кылган.

Лондондун Жогорку Соту бул ишти былтыр июнь-июль айларында карап, жетиштүү далил жок деген жүйө менен Максим Бакиевди актаган чечим чыгарган. Баш-аягы 12 күбөнүн ичинде Максим Бакиевдин өз оозунан Шон Дейлини өлтүрүү жөнүндө укканын айткан израилдик ишкер Берти Синбети болгон. Бирок ал белгисиз себептер менен сотко келбей калган.

2014-жылы Бишкектин Биринчи май райондук соту британ бизнесменине кол салуу боюнча мурдагы президенттин иниси Жаныш жана кичүү уулу Максим Бакиевди өмүрүнүн аягына чейин сыртынан абакка кескен.

Лондондо өткөн соттук териштирүүдө Максим Бакиевдин жактоочулары бул иш боюнча коюлган айыптарды четке кагышкан. (KKs)

Текебаев менен Чотоновдун сотунда адвокаттардын өтүнүчү четке кагылды

Бүгүн 1-августта “Ата Мекен” партиясынын камактагы лидери, депутат Өмүрбек Текебаев жана аны менен кошо айыпталып жаткан мурдагы өзгөчө кырдаалдар министри Дүйшөнкул Чотоновдун соту уланды.

Акыркы төрт сот отурумунда орусиялык жарандар Алексей Модин жана Леонид Маевскийдин көрсөтмөлөрү окулуп жатат. Бүгүн соттолуучулардын адвокаттары күбөлөрдүн көрсөтмөсүндөгү талаш жараткан жагдайларга токтолууну өтүндү. Бирок судья Айбек Эрнис уулу өтүнүчтү канааттандырган жок. Сот материалдарды окуу дагы үч күнгө созулат деп, бул күндөрү өтүнүчтөр кабыл алынбай турганын белгиледи.

28-июлда ишти териштирүү жадыбалына өзгөртүү киргизилип, дүйшөмбүдөн тартып карала турган болду. Буга чейин жараян ар аптанын шейшемби, шаршемби жана бейшемби күндөрү өтүп келген.

Соттун мындай чечимине Текебаев менен Чотоновдун адвокаттары нааразылык билдирип, судья шашып жатканын айтышкан. Бирок сот мындай айыптоону четке кагып, адвокаттар ишти создуктуруу аракетин көрүп жатат деп белгилеген.

Өмүрбек Текебаев быйыл 26-февралда УКМКга камалган. Башкы прокуратура ага Алексей Модин аркылуу Леонид Маевскийден 2010-жылы бир миллион доллар алып, “Мегаком” сатылгандан кийин кошумчасы менен кайтарып берерин айтып убада кылган" деген доонун негизинде “коррупция” жана “алдамчылык” беренелери боюнча кылмыш иш козгоп, атайын кызматка өткөрүп берген. Текебаевге козголгон кылмыш иштин алкагында Дүйшөнкул Чотонов да кармалган. Соттолуучулар айыптоонун баарын четке кагууда. (TSh)

Кийинки жылдан тарта жаңы төрөлгөн бала үчүн сүйүнчү бериле баштайт

Президент Алмазбек Атамбаев мамлекеттик жөлөкпулдар жөнүндөгү мыйзамга кол койду.

Ага ылайык «балага сүйүнчү» бала төрөлгөндө бир жолу, «балага жөлөк» үч жашка чейинки баланы багууга ай сайын, «үй-бүлөгө көмөк» 3төн 16 жашка чейинки курактагы үч жана андан көп баласы бар жарандарга (үй-бүлөлөргө) ай сайын жана «социалдык жөлөкпул» пенсиялык камсыздоого укугу жок адамдарга ай сайын төлөнүп берилет.

Мамлекеттик жөлөкпулдардын өлчөмүн өкмөт бюджеттин мүмкүнчүлүгүнө жана экономиканын абалына жараша жашоо минимумун эске алуу менен жыл сайын белгилейт.

Мыйзам 2018-жылдын 1-январынан тартып күчүнө кирет.

Мыйзам долбоорунун демилгечилеринин бири, парламент депутаты Аида Касымалиева буга чейин "Азаттыкка" жаңы төрөлгөндө бардык балдарга 4 миң сом сүйүнчү, үч жашка чейин балдар ай сайын 700 сом, үчтөн көп баласы бар үй-бүлөдөгү балдарга 16 жашка чейин айына 500 сомдон жөлөк пул берилсин деп чегерилип жатканын, бул болжолдуу сан экенин айткан. (RK)

Бишкекте митинг-пикеттерге үч айлык чектөө киргизилди

Ала-Тоо аянтында өтүп жаткан майрамдык иш-чараны милиция кайтарууда

Бишкектин адатта түрдүү саясий акциялар өтүүчү жерлеринде митинг-пикеттерди уюштурууга убактылуу тыюу салынды. Бул тууралуу бүгүн "Азаттык" радиосуна Жогорку Соттун маалымат кызматынан кабарлашты.

Биринчи Май райондук сотунун чечими менен 27-июлдан 20-октябрга чейин Ала-Тоо аянтында, Ак үй, Өкмөт үйү жана Боршайкомдун алдында расмий маданий-массалык иш-чаралардан башка акцияларды, жыйындарды өткөрүүгө уруксат жок. Буга Биринчи Май райондук акимчилигинин сотко кайрылуусу негиз болгон. Анда "дүйнөдө диний-экстремисттик көрүнүштөр көбөйгөнү, көп адамдын үн катуулаткычтарды колдонуу менен чогулушу тургундардын, айрыкча улгайгандардын нааразылыгын жаратып, шаардын жашоосунун туруктуулугун бузуп жатканы" айтылат.

Буга чейин ушундай эле чектөө Биринчи Май райондук сотунун тегерегиндеги аянт боюнча киргизилгени кабарланган.

Бишкектин маалымат кызматынын өкүлү Калперизат Айдарбекова:

- Биринчи Май райондук сотунун имаратынын жанында жашаган тургундардан акимиатка көптөгөн арыздар келип түшкөн. Себеби ар кандай нааразылык акциялары өтүп, элге тынчтык берилбей, кээде тез жардам унаасы да өтө албай калган учурлар болгон, - деп "Азаттыкка" билдирген.

Бул күндөрү аталган сотто оппозициялык саясатчылар, "Ата Мекен" партиясынын лидери Өмүрбек Текебаев, экс-министр Дүйшөнкул Чотонов, экс-депутат Садыр Жапаровдун соттук жараяндары өтүп, көпчүлүгү алардын тарапкерлеринин нааразылык акциялары менен коштолууда.

15-октябрда Кыргызстанда президенттик шайлоо өтөт. Мамлекет башчынын кызматына ат салышуу ниетин 59 жаран билдирди. (RK)

"Ата Мекендин" мүчөсү Нургазы Бакаев дайынсыз болууда

Нургазы Бакаев

"Ата Мекен" партиясынын активдүү мүчөлөрүнүн бири Нургазы Бакаевдин дайыны кечээтен бери белгисиз болууда. Бул тууралуу бүгүн "Азаттык" радиосуна партия мүчөсү, Жогорку Кеңештин мурдагы вице-спикери Асия Сасыкбаева билдирди:

- Ал биздин жактоочубуз болчу. Мародерчулук боюнча Юсупов канчалык алдаганын айтып берген телевидениеге, Ютубда да бар. Аны аңдып жүрүп бир нече жолу коркутушкан. Кечээ саат жетиде штабда болчу. Саат тогуздарда "мени УКМКга алып кетип жатышат" деп кыска телефон чалуусу болгон. Ошондон бери жымжырт болуп калды.

"Ата Мекен" партиясынын өкүлдөрү бул факт боюнча күч органдарына кат жолдогону жатат.

Ички иштер министрлиги азырынча комментарий бере элек.

Ал эми Улуттук коопсуздук комитетинин маалымат катчысы Рахат Сулайманов "Азаттыкка":

- Эгер адам жок болсо анда ИИМге кайрылышсын. Адам жоголгон фактыга биздин кандай тиешебиз бар? - деп билдирди.

Апрель окуяларындагы талап-тоноочулук боюнча абакта отурган Абдулла Юсупов аттуу жаран "атамекенчи" төрт депутатты айыптап көрсөтмө берген.

Партиянын лидери Өмүрбек Текебаев беш айдан бери УКМКнын тергөө абагында кармалууда. Ал орус жаранынан ири суммада пара алган деп айыпталып жатат. Өзү муну оппозициялык ишмердүүлүгү үчүн саясий куугунтук десе, бийлик мындай сынды четке кагууда. (TSh/RK)

Казакстан Египетке нота жөнөттү

Ануар Жайнаков.

Казакстандын тышкы иштер министрлиги Каирде кармалган студенттер боюнча маалымат берүүнү талап кылып Египетке нота жөнөттү. Бул тууралуу министрликтин маалымат катчысы Ануар Жайнаков билдирди.

"Каирде Казакстандын алты жараны жоголгонуна он эки күн болду. Алар 20-июлга оогон түнү Египеттин атайын кызматы тарабынан кармалганы тууралуу ынанымдуу маалыматыбыз бар. Бирок биз алигиче египеттиктерден кармоонун чоо-жайы, себептери жана биздин жарандардын азыр каерде экени тууралуу расмий билдирүү ала элекпиз" деди Жайнаков.

Катчы эки тараптын тиешелүү жетекчилеринин сүйлөшүүлөрү натыйжа бербегенин кошумчалады.

Египетте алты казакстандык кармалганы 25-июлда белгилүү болгон. Алардын экөө 11-июлда тил курсуна барышканы, берки төртөө менен бир батирде жашай башташканы маалымдалат. Бул казак жарандары 20-июлдан тарта туугандары менен байланышпай калышкан.

Ирандын мурдагы президенти миллиарддаган доого жыгылды

Махмуд Ахмединежад

Президент кезинде миллиарддаган долларды туура эмес пайдаланган деп Иран соту Махмуд Ахмадинежадга жети айып такты. Бул тууралуу 30-июлда өлкөнүн аудит боюнча Жогорку Сотунун прокурору Файаз Шожай жергиликтүү гезиттердин бирине берген маегинде билдирди.

Жети иштин бешөө мунай, газ жана башка өндүрүмдөрдөн түшкөн кирешеге байланыштуу.

Бир эле иш боюнча казынага 2 млрд доллар түшпөй калганы, ал акча элге субсидия катары мыйзамсыз берилип кеткени белгиленет делет. Иран бийлиги 2010-жылы элге азык-түлүк жана күйүүчү май берүүнү акчалай жардамга алмаштырган.

Бул каражаттарды мурдагы президент өз жанынан кайтарышы керектиги белгиленет. "Биз анын бардык мүлкүн карап чыктык. Бирок ал жада калса 500 млн доллларга да жетпейт" дейт прокурор Шожай.

Ошол эле учурда Ахмадинежад ыксыз сарптады деген 7 млрд долларды өмүрүндө таба албасы, анын ордуна жаза катары мамлекеттик кызматта иштөөгө тыюу салынышы ыктымалдыгын да прокурор кошумчалайт.

Биринчи Май райондук сотунун жанында пикет өткөрүүгө убактылуу тыюу салынды

"Ата Мекен" партиясынын тарапкерлеринин нааразылык акциясы

Бишкектин Биринчи Май райондук сотунун айланасында нааразылык акцияларын өткөрүүгө убактылуу тыюу салынды. Райондук соттун бул тууралуу чечими 28-июлда кабыл алынганын бүгүн "Азаттык" радиосуна Бишкек мэриясынын маалымат кызматынын өкүлү Калперизат Айдарбекова билдирди.

Анын айтымында, тиешелүү арыз менен сотко райондун акимчилиги 27-июлда кайрылган:

- Биринчи Май райондук сотунун имаратынын жанында жашаган тургундардан акимиатка көптөгөн арыздар келип түшкөн. Себеби ар кандай нааразылык акциялары өтүп, элге тынчтык берилбей, кээде тез жардам унаасы да өтө албай калган учурлар болгон.

Бул күндөрү аталган сотто оппозициялык саясатчылар, "Ата Мекен" партиясынын лидери Өмүрбек Текебаев, экс-министр Дүйшөнкул Чотонов, экс-депутат Садыр Жапаровдун соттук жараяндары өтүп, көпчүлүгү алардын тарапкерлеринин нааразылык акциялары менен коштолууда. (RK)

Криштиану Роналду сотто көрсөтмө берүүдө

Криштиану Роналду

Португалия футбол курамасы менен мадриддик "Реалдын" чабуулчусу Криштиану Роналду дүйшөмбүдө Испаниядагы сотто көрсөтмө берди.

Роналду 2011-2014-жылдары өзүнүн сүрөттөрүн сатуудан түшкөн каражаттан салык төлөбөй койгон, муну менен ал 14,7 млн евро салыктан качкан деп айыпталууда. Футболчу аны четке кагып келет.

Эгер күнөөсү далилдене турган болсо 28 млн еврого чейин айыппулга жыгылышы же 3,5 жылга эркинен ажыратылышы ыктымал.

Дал ушундай эле айып менен мурда дагы бир атактуу футболчу Лионель Месси 21 айга шарттуу кесилген.

2-августтун аба ырайы

2-августта жаан-чачын болбойт. Шамалдын багыты өзгөрүлүп турат, ылдамдыгы секундасына 1-6 метр.

Абанын температурасы:

Чүйдө түнкүсүн 18...23, күндүз 32...37;

Таласта түнкүсүн 12...17, күндүз 30...35;

Баткен, Ош, Жалал-Абадда түнкүсүн 19...24, күндүз 33...38;

Ысык-Көлдө түнкүсүн 13...18, күндүз 27...32;

Нарында түнкүсүн 8...13, күндүз 28...33;

Бийик тоолуу райондордо түнкүсүн 0...+5, күндүз 13...18;

​Бишкекте жаан-чачын болбойт. Абанын түнкү төмөнкү температурасы 20…22°, күндүзгү жогорку температурасы 35…37°.

Германия АКШнын Орусияга карата санкцияларына кошулбоого чакырууда

Германиянын экономика министри Евробиримдикти АКШнын Орусияга карата санкцияларына каршы турууга чакырды.

"Албетте биз соода согушун каалабайбыз, бирок Еврокомиссия азыр контрчараларды караштырганы маанилүү", - деди министр Брижит Зиприс 31-июлда жергиликтүү гезитке берген маегинде.

27-июлда АКШ Конгресси санкция боюнча мыйзам долбоорун колдогон. Эми президент Дональд Трамп кол койсо, мыйзам күчүнө кирет.

Анда орусиялык компаниялар менен иштешкен батыштагы ишканаларга да санкция салуу каралган. Мунун кедергиси "Газпром" менен бирге орус газын Европага алып өтө турган "Түндүк агым - 2" долбоорун куруп жаткан европалык ишканаларга тийиши ыктымал. Немис министри мына ушул жобону алып салууну өтүнүп, расмий Вашингтонго бир нече ирет кайрылышканын белгиледи.

Өткөн жумада Еврокомиссиянын президенти Жан Клод Юнкер да Евробиримдиктин көйгөйлөрү көңүлгө алынбаса, бир нече күн ичинде тийиштүү аракеттерге барарын эскерткен.

Филиппин Азия Тынч океан чөлкөмүндө СПИД абдан тез таркаган өлкө аталды

Филиппин аралдары Азия Тынч океан чөлкөмүндө ВИЧ/СПИД абдан тез таркаган өлкө болуп таанылды.

2016-жылдын декабрында 10 500 филиппиндик бул жугуштуу ооруга чалдыккан.

2017-жылдын май айына чейин дагы 1 098 кишиге жаңы диагноз коюлду.

Өлкөдө алгачкы ВИЧ/СПИД оорулуусу 1984-жылы катталган.

Ооруга чалдыккандардын 83 пайызы эркектер болууда. Алардын көбү кумсалар жана баңгилер.

"ВИЧ-СПИД статусу 15 жаштан 24 жашка чейинки жаш жигиттерге берилүүдө" деп кабарлайт Рейтерс агенттиги. (BCh)

Ошто эки жылдан бери кулчулукта жүрөт деген үй-бүлөнүн окуясы териштирилүүдө

Ош шаарынын ички иштер башкармалыгы эки жылдан бери кулчулукта жүрөт деген үй-бүлөнүн окуясын териштире баштады.

Алай районунан келген үй-бүлө мүчөлөрү Ош шаарынын четиндеги Дача деген кыштакта паспортторун кожоюнуна алдырып коюп, эки жылдан бери кулчулукта жүргөнүн бүгүн "Азаттык" радиосуна өздөрү ырасташты. Кабарчыбыз аларга жолугуп, апасынан башка үч баласы мектепке барбай, тамга тааныбай калганын байкаган.

Учурда бул үй-бүлө менен акыйкатчынын Оштогу өкүлчүлүгү иштеп жатат.

Расмий маалымат боюнча өткөн жылы Кыргызстанда 175 адам кулчулуктан куткарылган. Алардын тең жарымы кыз-келиндер. Адам сатуунун курмандыгыболгон жаш балдар да жок эмес. Бирок куткарылган адамдардын ичинен он чактысы гана укук тартибин коргоо органдарына кайрылып, бул иштер боюнча он кылмыш иши козголгон. (YI)

Өзбекстанда Каримовдун саясаты сындала баштады

Ислам Каримов

Жаңы ачылган "Өзбекстан 24" каналында маркум өзбек президенти Ислам Каримовдун саясаты биринчи жолу кескин сындалды. 30-июлда "Таҳлилнома" берүүсүнүн биринчи көрсөтүүсүндө тунгуч президент "өзүнүн үстөмдүгүн далилдегиси келип, лидерлик үчүн дайыма коңшу өлкөлөр менен атаандашып келген" делет. Андан ары Каримовдун бул саясаты көйгөйлөрдү чиелештирип, аны азыркы президент Шавкат Мирзиёев чечип атат деп баяндалат.

"Чынын айтканда, жылдап чиеленишкен чек ара көйгөйү бири-бирине талап коюу же үстөмдүктү баса белгилөө менен эмес, жакшы сөз жана күнү-түнү жүргөн үзгүлтүксүз иш менен чечилди" деди алып баруучу.

Андан тышкары берүүнүн катышуучулары өлкөдөгү тышкы саясаттан тарта экономика, социалдык маселелер, диний жана айыл чарба тармагындагы абалды талдашып, Каримов башкарган учурдагы каталарды сындашат.

Берүүдө Ислам Каримовдун ысымы аталбаганы менен сөздөр анын дарегине айтылып жатканы айкын баамдалат. Каримов өлкөнү башкарып турганда да, өлгөндөн ушул убакка чейин да анын ишмердиги сынга алынган эмес.

"Өзбекстан 24" телеканалы быйыл 24-июлда Шавкат Мирзиёевдин туулган күнүндө ачылган.

Zanoza.kg порталы аталышын жана концепциясын өзгөрттү

Zanoza.kg порталынын жамааты

Кыргызстандагы Zanoza.kg маалыматтык мультимедиа порталы бүгүнтөн (1-августтан) тарта kaktus.media деген аталыштагы маалыматтык-маанайшат сайты болуп чыга баштады.

Негиздөөчүлөрүнүн айтымында, сайт өзүнүн аталышын окурмандарынын, жарнама берүүчүлөрүнүн жана өнөктөштөрүнүн кызыкчылыктарын коргоо себептеринен улам алмаштырды.

Мындан тышкары, Бишкектин Биринчи Май райондук сотунун 25-июлдагы чечими менен "ПроМедиа" коомдук фондуна ал негиздеген Zanoza товардык белгисин пайдаланууга салынган тыюу да себеп болгону айтылды.

Аталыш менен бирге бул көз карандысыз интернет сайттын концепциясы да өзгөрмөй болууда.

"Маанайшат, билим таратуу багытындагы материалдар көп болот, албетте, биз жаңылыктардын ыкчам булагы бойдон да кала беребиз. Саясатка кызыккандар Нарын Айыптын narynaiyp.com сайтын окуй алышат", - деп билдирди порталдын редакциясы.

Быйыл мартта Кыргызстандын Башкы прокурору Индира Жолдубаева Zanoza.kg сайтына чыккан "айрым материалдар президенттин ар-намысына шек келтирди" деп сотко жалпысынан 27 миллион сомдук доо арыз берген. Иштер Бишкектеги Октябрь райондук сотунда каралып, прокуратуранын 24 миллион сомдук доо арыздары толугу менен канааттандырылган. Дагы 3 млн сомдук арыз боюнча чечим чыга элек.

24-июлда Ысык-Көлдө өткөн маалымат жыйында өлкө президенти Алмазбек Атамбаев Zanoza.kg сайтына карата берилген арыздар кайра алынбай турганын, муну менен айрым бир тараптуу гана жазган журналисттерге сабак берүү жагы каралганын, маселе сүйлөшүү жолу менен чечилбестигин билдирген.

Ал эми сотко берилген макалалардын авторлору жана өлкөдөгү укук коргоочу бейөкмөт уюмдар жана айдыңдар Zanoza.kg сайтына жана өз оюн эркин билдирген калемгерлерге карата айыптоолордун баарын негизсиз деп четке кагып, бул доолор жана сот жүрүмдөрү - элдик кош ыңкылаптан кийинки Кыргызстандагы сөз эркиндигин чектөөнүн жаңы далаалаты болуп саналат деген пикирлерин билдиришүүдө. (RK)

Вашингтон: Скарамуччи 10 күндөн кийин кызматынан кетти

Энтони Скарамуччи. 21.7.2017.

АКШ президенти Дональд Трамп Ак үйдүн коомчулук менен байланыш бөлүмүнүн директору Энтони Скарамуччини кызматтан алганы расмий билдирилди.

«Ал жаңы аппарат башчысы Жон Келлиге бардыгын ак барактан баштап, жеке командасын түзүүсү үчүн мүмкүндүк берүүнү туура көрдү», - деп айтылат Ак үйдүн билдирүүсүндө.

Энтони Скарамуччи бул орунга 21-июлда дайындалган. Мындан аз өтпөй эле ал Ак үйдүн мурдагы аппарат башчысы Рейнс Прибус менен президенттин кеңешчиси Стив Беннонду кескин сынга алып, Ак үйдө пикир келишпестиктер келип чыккан.

АКШ президенти Дональд Трамптын мурдагы маалымат катчысы Шон Спайсер президент Трамп финансист Энтони Скарамуччини коомчулук менен байланыш бөлүмүнө башчы кылып дайындагандан соң, өз ыктыяры менен кызматтан кеткен. "Нью Йорк Таймс" басылмасынын айтымында, Скарамуччинин бул кызматка дайындалышын Спайсер мырза "жаңылыштык" катары кабыл алган.

Текебаевдин тарапкерлеринин ачкачылык акциясы уланууда

Өмүрбек Текебаевдин жана аны менен кошо камалып жаткан Дүйшөнкул Чотоновдун тарапкерлеринин ачкачылык акциясы уланууда. "Ата Мекен" партиясынын кеңсесинде өтүп жаткан акцияга бүгүн дагы бир адам кошулуп, жалпысынан бешке жетти.

Алар бийликтен лидерлерине карата "саясий куугунтукту токтотууну" талап кылып жатышканын айтууда.

Беш айдан бери УКМКнын тергөө абагында камалып жаткан "Ата Мекен" партиясынын лидери Өмүрбек Текебаев менен экс-министр Дүйшөнкул Чотонов "Мегаком" компаниясына байланыштуу орус жаранынан ири суммада пара алган деп айыпталууда.

Ишти козгогон Башкы прокуратура саясатка аралашпай турганын билдирип келет. 6-апрелде парламентте сүйлөп жатып Башкы прокурор Индира Жолдубаева прокуратура мыйзам чегинде иштээрин, кылмыш иш аныкталган маалыматтардын негизинде козголоорун айткан. (RK)

Дааратканадан табылган ымыркайдын абалы жакшыра баштады

Иллюстрация

Бишкекте энеси дааратканага таштап кеткен ымыркай кыздын абалы канааттандырарлык болуп калды. Бул тууралуу Саламаттыкты сактоо министрлигинен кабарлашты.

Бишкек милициясынын маалыматына караганда, окуя дүйшөмбү күнү Арча-Бешик жаңы конушунда болгон. Ымыркай кызды дааратканадан кошуналар алып чыгып, доктурларга оор абалда өткөрүп беришкен. Ал азыр №3 балдар ооруканасынын реанимациясында жатат. Салмагы 3,4 кг.

Кыздын энеси изделүүдө. (RK)

ЕАЭБ: Лаборатория ачууга бюджеттен 52 миллион сом бөлүндү

Евразия экономикалык биримдигинин техникалык регламенттерине туура келтирүү үчүн Кыргызстанда тиешелүү лабораторияларды ишке киргизүүгө мамлекеттик бюджеттен 52 миллион сом бөлүндү. Бул тууралуу бүгүн Бишкекте вице-премьер-министр Олег Панкратов жана тиешелүү мекемелердин жетекчилери өткөргөн маалымат жыйынында айтылды.

Ветеринардык лабораториялар үчүн 2 миллион сомдук жабдык сатылып алынды, 12 лаборатория август айынын аягына чейин ишке кирет.

Соңку жарым жылда ЕАЭБ базарына чыгуу укугун алган кыргызстандык экспортерлордун саны 19дан 28ге өстү. Учурда дагы 7-8 ишкананын арызы каралып жатат.

Жаңы техрегламенттер негизинен тамак-аш, оюнчук, таңгактоо, лифт, темир жол коопсуздугуна багытталган.

Пресс-конференцияда айтылгандай, бүгүнкү күнгө карата төрт миң ветеринар окутулду. Жаңы эрежелер байкалаарлык өзгөрүүлөргө алып келбейт, ишкерлер, фермерлер санитардык талаптарды аткаруусу гана зарыл. Ички рынокто ушундай эле эрежелер сакталат.

Орусия менен Беларус негиздеген Бажы биримдиги кийин кеңейип, ЕАЭБ болуп кайра түзүлгөн. Бүгүнкү күндө ага Армения, Казакстан, Кыргызстан да мүчө. Бул беш өлкөнүн ичинде бажы көзөмөлү жок.

Кыргызстан ЕАЭБге кошулганына быйыл эки жыл болду. 12-августтан тарта Кыргызстанда өндүрүлүп, уюмдун ичинде экспортко чыгуучу товарлар жаңы 18 техникалык талапка жооп бериши керектиги мурдатан бери айтылып, өкмөт ишкерлер, фермерлер арасында түшүндүрүү иштерин жүргүзүп келди.

Техникалык жактан Орусиядан жардам берилип жатат. (ZKo)

ЮНИСЕФ: Кыргызстанда ымыркайлардын 41% гана эне сүтү менен багылат

Эне сүтүнүн бала үчүн маанилүүлүгү тууралуу ЮНИСЕФ, Саламаттыкты сактоо министрлиги жана Дүйнөлүк саламаттык уюму пресс-конференция уюштурду

Кыргызстанда ымыркайлардын 41 пайызы гана эне сүтүн эмет. Муну Бириккен Улуттар Уюмунун Балдар фонду менен Дүйнөлүк саламаттык уюму жүргүзгөн изилдөө аныктады.

Дүйнөдөгү балдардын 60 пайызы 6 айга чейин энесинин сүтү менен гана азыктанса, Кыргызстан бул көрсөткүчтөн артта калууда.

ЮНИСЕФтин Саламаттык программасынын координатору Дамира Бакированын айтымында:

- 41% Борбор Азия өлкөлөрүнүн арасында жакшы көрсөткүч деп эсептелет, бирок жок дегенде 50% жетүү зарыл.

2008-жылы кабыл алынган эмчек эмизүүнү коргоо мыйзамы аткарылбай жатат дешет эл аралык уюмдун өкүлдөрү. (BCH)

Дагы жүктөңүз

XS
SM
MD
LG