Сауд Арабиясынын тышкы иштер министри, ханзада Сауд Ал-Файсал президент Саддам Хуссейнди согушту болтурбоонун айласын кылууга чакырды. Файсал кечээ кечинде жасаган билдирүүгө караганда, Иракка каршы ар кандай аскерий операция болсо, ага Сауд Арабиясы катышпайт. Анткени, согуш “бүтүндөй региондогу кырдаалды бейстабилдештирет”, - деди ал. Файсал апта башында “Иракка каршы аскерий операцияны Улуттар Уюму колдосо, АКШ учактарынын Сауд Арабиясынын аба мейкиндиги аркылуу учуусуна уруксат берилет” деп билдирген.
