БИШКЕК. Эртең улуттук валюта - сомдун киргизилгендигинин 10 жылдыгына байланыштуу Бишкекте эки күндүк эл аралык конференция өз ишин баштайт. Ал экономикалык реформа жүргүзүүдө тажрыйба алмашуу, регионалдык кызматташтыкты кеңейтүү максатын көздөйт. Жыйынга президент Аскар Акаев баштаган мамлекеттик жана коомдук ишмерлер, Эл аралык Валюта Фонду, Азия Өнүктүрүү Банкы баш болгон эл аралык финансы уюмдарынын, КМШ өлкөлөрүнүн улуттук банктарынын өкүлдөрү катышат. Бул тууралуу бүгүн Улуттук Банктын басма сөз кызматы кабарлады.
