Нью-Йорк шаарында жайгашкан "Хюман райтс вотч" деген уюм АКШ мамлекеттик катчысы Кондолиза Райска кечээ күнү кайрылып, Түркмөнстан менен тыкыз кызматташуудан АКШ карманып турууга тийиш деп билдирди. Уюмдун айтымында, Түркмөнстанда диний жана башка эркиндиктер сакталбайт, диний уюмдардын мүчөлөрү камакка алынат, өлкө жетекчилиги дүйнөдөгү эң катаал режимдердин бирине айланды жана Америка Кошмо Штаттары андай абалды расми түрдө таанууга тийиш.
