СДП фракциясынын депутаты Жусупжан Жээнбековдун “Азаттыкка” билдиргенине караганда, өз алдынча издөө иштери улантылып жатат. “Бирок андан азырынча эч майнап чыга элек”,- дейт депутат. СДП фракциясы дайынсыз жоголуп отурган депутат Руслан Шаботоев менен Бахтияр Амиражановдун табылбай жатышын милициянын кайдигер мамилесинен көрүп, кылмышка каршы күрөшө албаган ИИМдин жетекчилиги кызматынан кетиши керектигин 5-ноябрда маалымат жыйынында билдирген эле. Бахтияр Амиражановдун дайынсыз жоголгонуна бир жарым ай болду. Амиражановдун автоунаасы табылганын эске албаганда, бул иш боюнча ИИМ тарабынан жаңы жагдайлар аныктала элек. (MSu)