Ирактын шийи топтору өкмөт башчы ал-Маликини четке калтырган коалиция түздү. Ирактын шийи топторунун башкы уюмдары январ айына белгиленген жалпы шайлоодо жеңип чыгуу үчүн жаңы саясий ынтымак түзүштү, бирок ага өкмөт башчы Нури ал-Маликинин Дава партиясы киргизилген жок. Ал-Малики мырза болсо шийи коалициясын кеңейтүү, ага ал түгүл сунний арабдар менен күрттөрдүн партияларын кошуу талабын айтып чыккан болчу. Шийилердин жаңы ынтымагына иранчыл уюм – Ирактын Жогорку Исламдык Кеңеши, ошондой эле диниятчы Муктада ас-Садрдын анти-америкалык маанайдагы блогу жана башка айрым сунний партиялар баш кошту.
