Орусия эл аралык коомчулукту Абхазия менен Түштүк Осетиянын көз карандысыздыгын таанууга чакырды. Орусиянын Тышкы иштер министрлигинин бүгүнкү билдирүүсүндө “эгерде башка өлкөлөр мындай кадамга барса, анда Абхазия менен Түштүк Осетияга эл аралык байкоочулар кайтып келүүгө жол ачылмак” деп айтылат. Орусия Грузия менен кыска мөөнөттүү согуштан кийин өткөн жылы 26-августта Абхазия менен Түштүк Осетиянын көз карандысыздыгын тааныган. Бүгүнкү күнгө чейин эки аймактын көз карандысыздыгын Никарагуадан башка эч бир үчүнчү өлкө тааный элек.
