Иран космостук программасынын алкагында жердин төрт жандоочусун (спутник) курду. “Фажр”, “Расад”, “Зафар” жана “Амир-Кабир” илимий жандоочуларын бүгүн президент Махмуд Ахмединежад барып көргөнүн Иран өкмөттүк телеканалы кабарлады. Айрым Батыш жана Жакынкы Чыгыш мамлекеттери Ирандын космостук программасы өлкөнүн баллистикалык ракеталарын башкаруу жана космостук чалгындоо үчүн колдонуларын айтышат. АКШ башындагы кээ бир өлкөлөр Иран ядролук бомбага ээ болсо, аны Европага жана Израилге каршы колдонушу этимал дешет.
