Чүйдүн Чоң-Кемин капчыгайында мурдагы күнү, 7-сентябрда куураган чөп күйгөнүнөн тутанган өрттүн негизги очогу басылды. Бул тууралуу Өзгөчө кырдаалдар министрлигинен кабарлашты. Бирок өрт толугу бойдон өчүрүлүп бүтө элек. Учурда ал жерде тилсиз жоо менен жүздөн ашуун киши алышып жүрөт. Куткаруучулардын айтымында, кырсык тоолуу аймакта чыккандактан, өрттү басуу кыйын болууда. Бирок анын "Чоң-Кемин" улуттук паркына залакасы тиет деген коркунуч жок. Кырсыктан адамдар жабыркаган жок. Соңку суткада Кыргызстандын аймагында 28 өрт кырсыгы катталды. (RK)
