Тажик полициясы өткөргөн операция кезде Пакистан талиптеринин мүчөсү деп шектелген эки жаран кармалды. Умарали Тошпулатов жана Камилжон Кулбашев өлкө түштүгүндөгү Хатлон облусунда кармалганын Ички иштер министрлиги 24-июнда билдирди. Билдирүүдө алар согушкерлерге Пакистанда “атайын диний даярдык” өткөндөн кийин кошулганы жана экөө Ооганстандагы НАТО башындагы эл аралык күчтөргө каршы талиптер тарабында согушканы белгиленет.
Тажик өкмөтү Пакистандагы катталбаган диний мектептерде окуган тажикстандыктар экстремисттик идеяларга сугарылганын дембе-дем айтып, кооптонуусун билдирип жүрөт.
