Ички иштер министрлиги шайлоо алдында жана добуш берүү мезгилинде коомдук тартипти жана коопсуздукту сактоо үчүн атайын комплекстүү иш-чаралардын планын түздү. Ага ылайык, ИИМ министри чыгарган буйруктун негизинде оперативдүү Башкы штаб түзүлгөн. Штабды министрдин 1-орун басары жетектейт. Мындай оперативдүү штабдар өлкөнүн башка аймактарында да түзүлмөкчү.
ИИМдин басма сөз кызматы маалымдашынча, жалпы 2288 добуш берүү участогунда коопсуздукту жана тартипти сактоого 8800 милиция кызматкери жана 8 миңден ашуун ыктыярчылар тартылат. Ар бир шайлоо участогуна бирден жооптуу кызматкер жана патрулдук наряд бекитилет.
1-октябрдан 6-октябрга чейин милиция “күчөтүлгөн режимде” иш алып барышат.
Ички иштер кызматкерлери добуш берүүнү уюштурууга участкалык шайлоо комиссиясына көмөктөшөт, убактылуу тергөө абагында отурган жарандардын добуш берүүсүн уюштурат.(ZKo)
