Камакта жаткандардын качып кетүүсүнө жана түрмө кызматкерлеринин өлүмүнө жол бергени үчүн Чүйдөгү №50 абактын Иманбек Телтаев иштен алынды. Ошондой эле Башкы ыкчам тартип башкармалыгы менен Тарбия башкармалыгынын жетекчиси, Коргоо департаментинин командири, тартип жана көзөмөл бөлүмүнүн башчысы, байланыш жана техникалык камсыздоо тобунун улуу инспектору кызматтан четтетилди. Бул тууралуу буйрукка Жаза аткаруу мамлекеттик кызматынын башчысы Алик Мамыркулов кол койгонун аталган мекемеден кабарлашты.
12-октябрда 50-абакта отурган 9 адам ал жердеги үч кызматкерди өлтүрүп, качып кеткен. Алардын экөө дагы эле издөөдө. Бешөө өлдү. Эки киши камакта. (SE)
