Линктер

logo-print
дүйшөмбү, 05-декабрь, 2016 Бишкек убактысы 10:31

Мурдагы депутат Карганбек Самаковдун сотунда айыпталуучунун күбөсү тергөө тарабынан коркутуу болгонун кабарлады. Нотариус Эркин Андабеков бүгүнкү сотто 2011-2013 жылдар аралыгында бардык сатып алуу келишимдерин ал өзү каттаганын билдирип, жер сатууда эч кандай мыйзам бузуу болбогонун билдирди.

- Кара-Жыгач, Байтик айылдарындагы жерлерди убагында күбөлөндүргөнсүң деп мени 3-4 жолу тергөөгө чакырып, Самаковго каршы көрсөтмө бер, деп коркутушту. Болбосо соттоп, отургузабыз деди. Мен азыркыга чейин түшүнбөй турам, эмне үчүн мындай кылганы жатышат, – деди Эркин Андабеков.

Өз сөзүндө нотариус Андабеков башкы прокуратуранын тергөөчүсү Жеңиш Сейитов жана Кубанычбек аттуу прокурор тарабынан коркутуу болгонун кошумчалады.

Айыпталуучунун дагы бир күбөсү Самат Керимкулов 2005-2008 жылдары Аламүдүн районунун акими болгонун айтып, жерлерди трансформациялоодо бардык документтер толук болгондуктан кол койгонун ырастады. Ал 2008-жылы Медет Садыркулов менен жолугуп, трансформация мыйзам чегинде жүрүп жатканынан кабар алганын кошумчалады.

Жогорку Кеңештин мурдагы депутаты Карганбек Самаков Аламүдүн районундагы Кара-Жыгач, Байтик жана Лебединовка айыл өкмөттөрүнөн 262 гектар жерди мыйзамсыз трансформациялаган деп айыпталууда. Ага каршы өткөн жылы май айында кылмыш иши козголгон.

Самаков өзүнө коюлган айыптарды четке кагып келет.

Азаттык Фейсбукта

пикирлерди көрсөт

XS
SM
MD
LG